މިއަހަރު ވާނީ މާލެއާއި އަތޮޅުތަކުގައިވެސް ސިއްޙީ ގިނަ ޚިދުމަތްތަކެއް ތަރައްޤީކުރެވޭނެ އަހަރަކަށް: ވަޒީރު ނާޒިމް

މިއަހަރަކީ މާލެއާއި އަތޮޅުތަކުގައިވެސް ސިއްޙީ ގިނަ ޚިދުމަތްތަކެއް ފަށާ ތަރައްޤީކުރެވޭނެ އަހަރަކަށް ވާނެކަމަށް ސިއްޙީ ވަޒީރު ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާޅޮސްމަޑުލު އުތުރުބުރީގެ ބައެއް ރަށްރަށަށް ކުރައްވަމުންގެންދަވާ ދަތުރުފުޅުގެ ތެރެއިން އުނގޫފާރުގައި ހުންނަވައި ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.

ބަލްކު ޕްރޮކިއުމެންޓް ނިޒާމުގެ ތެރެއިން ބޭސް ގެނައުމުގެ އިތުރުން ރަނގަޅު ފެންވަރުގެ ސިއްޙީ ވަސީލަތްތައްވެސް އެނިޒާމުގެ ތެރެއިން ރާއްޖެ ގެނެސް، ރަށްރަށަށް ފޯރުކޮށްދޭން ސަރުކާރުން ނިންމަވާކަން މިދަތުރުފުޅުގެ ތެރެއިން ރައީސް ވަނީ ހާމަކުރައްވާފައެވެ.

އެކަމަށް އިޝާރާތްކުރައްވައި ވާހަކަފުޅުދައްކަވަމުން، ވަޒީރު ނާޒިމް ވިދާޅުވީ ސިއްޙީ ނިޒާމްގެ ކަންކަން ރަނގަޅު ހާލަތަކަށް ގެންދިޔުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިއްމު ވަޢުދުފުޅެއްކަމަށެވެ. ވަޒީރު ވިދާޅުވިީ ސިއްޙީ ދާއިރާއަށް ގެންނަ އެންމެ ބޮޑު ބަދަލަކީ ކޮލިޓީ ރަނގަޅު ބޭސް ރާއްޖެ ގެނައުމާއި ސިއްޙީ ވަސީލަތްތައް ގާއިމްކުރުމުގެ އިތުރުން ހެޔޮއަގުގައި ރައްޔިތުންނަށް ޚިދުމަތް ލިބޭނެ އިންތިޒާމުތައް ހަމަޖެއްސެވުންކަމަށެވެ.

ވަޒިރު ވަނީ މިއަހަރުގެ ތެރޭގައި ސިއްޙީ ދާއިރާއަށް ވަރަށް ގިނަ ކަންކަން ތަންފީޒު ވެގެންދާނެކަން ފާހަގަކުރައްވާފައެވެ. އެގޮތުން އަތޮޅުތަކުގައި ގިނަ ޚިދުމަތްތަކެއް ފަށާނެކަމަށާއި މާލޭގައިވެސް އިތުރު ޚިދުމަތްތައް ތަރައްޤީކުރުމުގެ މަސައްކަތް ކުރާނެކަމަށް ވަޒީރު ވިދާޅުވިއެވެ. މިއާއެކު ސިއްޙީ ދާއިރާ ރިފޯމް ކުރުމުމަށް ރައީސް ގެންނަވާ ބަދަލުތަކަށް މުހިއްމު ކުރިއެރުންތަކެއް ފެންނާނެކަމަށް ވަޒީރު ނާޒިމް ވިދާޅުވިއެވެ.

"ރައީސްގެ ތަރައްޤީގެ އެޖެންޑާގައި ސިއްހީ ދާއިރާ ވަނީ އެންމެ ކުރީގައި. ރައްޔިތުންގެ އެންމެ ބޮޑު ކަންބޮޑުވުން އޮތީ ސިއްޙީ ދާއިރާއަށްކަން ރައީސްއަށް ވަރަށް ބޮޑަށް އެނގިލައްވާ. ރައީސްގެ ޒަޢާމަތުގައި ސިއްޙީ ދާއިރާއަށް ވަރަށް ހެޔޮ ރަނގަޅު ބަދަލުތަކެއް އަންނާނެ." ސިއްޙީ ވަޒީރު ޢަބްދުﷲ ނާޒިމް އިބްރާހިމް ވިދާޅުވިއެވެ.

ސިއްޙީ ދާއިރާއިން ކުރަމުން ދާ މަސައްކަތްތަކަށް ބަލާއިރު އާސަންދަ ޚިދުމަތް އެކަމަށް އެންމެ ބޭނުންޖެހިފައިވާ މީހުންނަށް ދެވޭކަން ކަށަވަރުކުރުމާއި ސަރުކާރުން ބޭހުގެ އަގު ކޮންޓްރޯލްކުރުމަށް ނިންމަވައި، އެކަންކުރުމަށް ފިޔަވަޅުތަކެއް ވަނީ އަޅާފައެވެ. އަދި އާސަންދަ ސްކީމް މެދުވެރިކޮށް ތައިލެންޑާއި ޔޫއޭއީން ބޭސްފަރުވާގެ ޚިދުމަތް ވާނީ ދޭން ފަށާފައެވެ. އަދި ރާއްޖޭގެ އެކި ސަރަހައްދުތަކުން ސިއްޙީ ކުއްލި ޙާލަތްތަކުގައި ފަރުވާއަށް އެއްތަނުން އަނެއް ތަނަށް ބަލި މީހުން އުފުލުމަށް "އެއަރ އެމްބިއުލާންސް"ގެ ޚިދުމަތްވަނީ ފައްޓަވާފައެވެ. ހަމައެއާއެކު އާސަންދައިގެ ދަށުން އައިވީއެފް ހެދުމުގެ ފުރުޞަތު ފުރަތަމަ ފަހަރަށް ދޭންވަނީ ފަށާފައެވެ.

ސިއްޙީ ޚިދުމް ފުޅާކުރުމަށްޓަކައި ތެލަސީމިއާ ހޮސްޕިޓަލާއި ކެންސަރު ހޮސްޕިޓަލް ހިމެނޭހެން އިތުރު 5 ހޮސްޕިޓަލް ތަރައްޤީކުރުމަށް މިއަހަރުގެ ބަޖެޓުގައިވަނީ ހިމަނާފައެވެ. މީގެ އިތުރުން ރާއްޖެއަށް އެތެރެކުރާ ދުންފަތުން ނަގާ ޓެކްސް ބޮޑުކޮށް، ވޭޕް އެތެރެކުރުންވަނީ މަނާކޮށްފައެވެ. އަދި ރާއްޖޭގައި ދުންފަތުގެ ބާވަތްތައް ވިއްކޭނެ އެންމެ ހަގު ޢުމުރަކީ 21 އަހަރުކަމަށްވެސްވަނީ ކަނޑައަޅާފައެވެ. މި ނޫނަށް ސިއްޙީ ޚިދުމަތް ފުޅާކުރުމަށްޓަކައި އަންނަނީ މަސައްކަތްތަކެއް ކުރައްވަމުންނެވެ.