ޔޫއެފާ ޗެމްޕިއަންސް ލީގުގައި ރޭ ސްޕާޓާ ޕްރާގް އާއި ދެކޮޅަށް އިންޓަރ މިލާން ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް މުބާރާތުގެ ދެވަނަ ބުރުގެ ސީދާ ޖާގައެއް ކަށަވަރުކޮށްފި އެވެ.
ފުރަތަމަ ބުރުގެ ކުޅުން ނިމޭއިރު ގަދަ އަށެއްގައި ހިމެނޭ ޓީމުތަކަށް ދެވަނަ ބުރުގެ ސީދާ ޖާގައެއް ލިބިގެންދާއިރު އިންޓަރ މިލާނަށް ވަނީ 7 މެޗުން ލިބިފައިވާ 16 ޕޮއިންޓާއެކު ތާވަލުގެ 4 ވަނަ މަގާމް ލިބިފަ އެވެ.
މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 12 ވަނަ މިނިޓުގައި އިންޓަރ މިލާނަށް ކާމިޔާބު ކޮށްދީފައިވަނީ ކެޕްޓަން ލައުޓާރޯ މާޓިނޭޒް އެވެ.
އިންޓަރ މިލާނުން މޮޅު ކުޅުމެއް ދައްކާފައިވާ މި މެޗުގައި ލައުޓާރޯ މާޓިނޭޒް ޖެހި ލަނޑަށްފަހު ޑެންޒެލް ޑަމްފްރައިސް ވަނީ އިތުރު ލަނޑެއް ޖަހާފަ އެވެ. ނަމަވެސް މެޗުގެ ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފަ އެވެ.
2023 ވަނަ އަހަރުގެ ޗެމްޕިއަންސް ލީގުގެ ފައިނަލުގައި ކުޅެފައިވާ އިންޓާރ މިލާނުން މި ސީޒަނުގައި ކުޅުނު ހަތް މެޗުގެ ތެރެއިން އެ ޓީމުގެ ކޮޅަށް ވަދެފައިވަނީ އެންމެ ގޯލެކެވެ. މި މުބާރާތުގެ ފުރަތަމަ ބުރުގެ ފަހު މެޗުގައި އިންޓަރ މިލާން އަމިއްލަ ދަނޑުގައި ނިކުންނާނީ ފްރާންސްގެ މޮނާކޯ އާއި ދެކޮޅަށެވެ.
އިންޓަރ މިލާން އަތުން މި މެޗުގައި ބަލިވި ސްޕާޓާ ޕްރާގް ފުރަތަމަ ބުރުގެ ފަހު މެޗުގައި ޖަރުމަނުގު ބެޔާ ލެވަކޫސަން އާއި ދެކޮޅަށް ނިކުންނައިރު އެ ޓީމު އޮތީ މުބާރާތުން ކަޓާފަ އެވެ.