ހައުސިންގ މަޝްރޫޢުތަކަށް ކޮންޓްރެކްޓަރުން ހޯދަން އަންނަ ހަފްތާގައި ހުޅުވާލުމަށް ދަނީ ތައްޔާރުވަމުން: ވަޒީރު ޑރ.މުއްޠަލިބް

ރައީސުލްޖުމްހޫރިއްޔާ ވިދާޅުވެފައިވާގޮތަށް، އަތޮޅުތަކަށް އިޢުލާނުކުރެއްވި ހައުސިންގ މަޝްރޫޢުތަކަށް ކޮންޓްރެކްޓަރުން ހޯދުމަށް ކުރިއަށް މިއޮތް ހަފްތާގެ ތެރޭގައި ހުޅުވާލުމަށް ތައްޔާރުވަމުންދާކަމަށް އިމާރާތްކުރުމާ ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

ވަޒީރު މިހެން ވިދާޅުވީ ރައީސުލްޖުމްހުރިއްޔާ ރ. އަތޮޅަށް މިހާރު ކުރައްވަމުންދާ ދަތުރުފުޅުގައި، ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ.

ސަރުކާރުން އަތޮޅުތަކުގައި ހިންގެވުމަށް ކަނޑައަޅުއްވާފައިވާ ބޯހިޔާވަހިކަމުގެ ހުރިހާ މަޝްރޫޢެއްގެ އަމަލީ މަސައްކަތް ފެށުމަށް ކޮންޓްރެކްޓަރުން ހޯދަން މިމަހު އިޢުލާންކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނުކުރެއްވީ ކ.ގުޅީގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

މި މަސައްކަތާ ގުޅޭގޮތުން ގެދޮރުވެރިކަމަ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވީ ތައްޔާރުވަމުންދަނީ އެއްފަހަރާ އެތަށް ހާސް ހައުސިން ޔުނިޓް ތަރައްޤީކުރުމުގެ މަޝްރޫޢުއަށް ކޮންޓްރެކްޓަރުން ހޯދުމަށްކަމަށެވެ. މިކަމާ ގުޅޭ ޓެކްނިކަލް މަސައްކަތްތައް ފިނޭންސް މިނިސްޓްރީއާއެކު ކުރަމުންދާކަމަށާއި އަންނަ ހަފްތާގައި ކޮންޓްރެކްޓަރުން ހޯދުމަށް ހުޅުވާލުމަށް ތައްޔާރުވަމުންދާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ މި ފުރުޞަތު ދިވެހި ކުންފުނިތަކާ އަދި ބޭރުގެ ކުންފުނިތަކަށްވެސް ހުޅުވާލާނެކަމަށެވެ. އަދި ޕްރޮޖެކްޓްތަކަށް ހުޅުވާލާނީ، ފައިނޭންސިންގެ އެކިއެކި ސްކީމްތަކުގެ ތެރެއިންކަމަށެވެ.

"އަންނަ ހަފްތާގައި ޓެންޑަރިން ޕަބްލިޝް ކުރެވޭނެ. މަޝްރޫޢުތައް ގެންދާނެ ބަޖެޓުންވެސް، ކޮންޓްރެކްޓަރ ފައިނޭންސް އުސޫލުންވެސް. އަދި ކޮންޓްރެކްޓަރާއި ދަޢުލަތުގެ ބަޖެޓުން ބައެއް ހިމެނޭގޮތަށްވެސް ގެންދާނަން. އަދި ބައެއް ޕްރޮޖެކްޓްތަކަށް ލޯނު ފެސިލިޓީވެސް ހޯދާނެ." ގެދޮރުވެރިކަމާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުތަކުގެ ތެރޭގައި ރާއްޖޭގެ އުތުރުގައި 20000 ހައުސިން ޔުނިޓް އަދި ދެކުނުގައި 20000 ހައުސިން ޔުނިޓްގެ މަޝްރޫޢު ހިންގެވުން ހިމެނެއެވެ. އެގޮތުން މިއަހަރުގެ ބަޖެޓުގައި ބޯހިޔާވަހިކަމާ ގުޅޭ މަސައްކަތްތަކަށް 2.5 ބިލިއަން ރުފިޔާ ވަނީ ހިމަނާފައެވެ. މީގެތެރެއިން 1 ބިލިޔަން ރުފިޔާ ހިމަނާފައި ވަނީ އުމްރާނީ މަސައްކަތްތަކަށެވެ.

ވަޒީރު އިތުރަށް ވިދާޅުވީ ރަށްރަށުގައި ފަށާ ނުނިމި ހުރި މަސައްކަތްތައް އަވަސްކުރުމަށްވެސް ކަމާގުޅުންހުރި ވުޒަރާތަކާ އިދާރާތައް ގުޅިގެން މަސައްކަތް ކުރަމުންދާކަމަށެވެ. އެގޮތުން ބޮޑު ހިލަ ނުލިބިގެން ނުނިމި ހުރި މަސައްކަތްތައް އަވަސްކުރުމަށް، ބޮޑުހިލައިގެން ބަލްކް ޝިޕްމަންޓްތަކެއް ގެނައުމަށް މަސައްކަތް ކުރަމުންދާކަމަށެވެ.

ވަޒީރު ވިދާޅުވީ އައު މަޝްރޫޢުތައް އަވަހަށް ފެށޭނީ، ކުރިން ފަށާފައި ހުރި މަސައްކަތްތައް އަވަހަށް ނިންމުމުންކަމަށެވެ. މި މަސައްކަތުގައި ސަރުކާރު ކުންފުނިތަކާ ގިނަ މަސައްކަތްތަކެއް ހަވާލުކުރައްވާނެކަމަށް ވިދާޅުވިއެވެ. ވަޒީރު ވިދާޅުވީ ބިންހިއްކުން ފަދަ މަޝްރޫޢުތައް އަވަހަށްކުރުމަށް، ޑްރެޖަރާ އިތުރު ވަސީލަތްތައްވެސް ހޯދުމަކީ އަމާޒެއްކަމަށެވެ.