އިނގިރޭސި ޕްރިމިއަރ ލީގުގެ ޗެމްޕިއަން މެންޗެސްޓާ ސިޓީގެ ކެޕްޓަން ކައިލް ވޯކާ، ލޯނު އެއްބަސްވުމެއްގެ ދަށުން އިޓަލީގެ އޭސީ މިލާނަށް ބަދަލުވެއްޖެއެވެ.
މި ސީޒަނުގެ ނިޔަލަށް ކައިލް ވޯކާ އޭސީ މިލާނަށް ބަދަލުވި ނަމަވެސް އެ ކްލަބުން ބޭނުންވެއްޖެ ހާލަތެއްގައި ކުރިއަށް އޮތް ހޫނު މޫސުމުގެ ޓްރާންސްފަރ ބާޒާރުގައި އޭނާގެ އެއްބަސްވުން ދާއިމީ ކުރުމުގެ ފުރުސަތު އެ ކްލަބަށް އެބައޮތެވެ.
މެންޗެސްޓަރ ސިޓީއަށް 316 މެޗު ކުޅެދީފައިވާ ވޯކާ އެންމެ ފަހުން ސިޓީއަށް މެޗެއް ކުޅެދިފައިވަނީ މި މަހުގެ ހަތަރުވަނަ ދުވަހު ވެސްޓް ހޭމް ޔުނައިޓެޑާ ދެކޮޅަށެވެ. އަދި އެ މެޗަށްފަހު ވޯކާ ވަނީ އިތުރު ފުރުސަތުތައް ހޯދަން ބޭނުންވާކަމަށް ބުނެފައެވެ.
އުމުރުން 34 އަހަރުގެ ވޯކާ އިތުރު ފުރުސަތުތައް ނުވަތަ އެހެން ކްލަބަކަށް ކުޅުމުގެ ވިސްނުން ގެންގުޅޭ ކަމަށް ފުރަތަމަ ބުނުމާއެކު ގިނަ ބަޔަކަށް ގަބޫލުކުރެވުނީ އޭނާ ސައުދީ ޕްރޯ ލީގުގެ ކްލަބަކަށް ބަދަލުވުމުގެ މަސައްކަތް ކުރަމުންދާ ކަމަށެވެ.
ކައިލް ވޯކާ ލޯނެއްގެ ދަށުން އޭސީ މިލާނަށް ގެންގޮސްފައިވާއިރު އެ ކްލަބުން ދަނީ މެންޗެސްޓަރ ޔުނައިޓެޑްގެ ފޯވަޑް މާކަސް ރަޝްފޯޑް ހޯދުމުގެ މަސައްކަތްވެސް ކުރަމުންނެވެ. މެންޗެސްޓަރ ޔުނައިޓެޑްގެ ކޯޗު ކަމާއި ރުބެން އަމޮރިމް ހަވާލުވުމާއެކު ރަޝްފޯޑް އަށް ވަނީ ކުޅުމުގެ ފުރުސަތު ގެއްލިފަ އެވެ.
2017 ވަނަ އަހަރު 50 މިލިއަން ޕައުންޑުގެ ފީއަކަށް ޓޮޓްނަމް ހޮޓްސްޕަރ އިން މެންޗެސްޓަރ ސިޓީ އާއި ގުޅުނު ވޯކާ ވަނީ ޕެޕް ގަޑިއޯލާގެ އިރުޝާދުގެ ދަށުން އެ ޓީމުން އިނގިރޭސި ޕްރިމިއާ ލީގު ހަ ފަހަރު ހޯދިއިރުވެސް އެ ޓީމުގައި މުހިންމު ދައުރެއް އަދާކޮށްފަ އެވެ.
ކައިލް ވޯކާ ލޯނެއްގެ ދަށުން ސިޓީން ދޫކޮށްލާފައިވާއިރު އެ ޓީމުން ވަނީ ދާދި ފަހުން ބްރެޒިލްގެ ޒުވާން ޑިފެންޑަރ ވިޓަރ ރެއިސް އާއި އަބްދުކާދިރު ކުސަނޯވް އެ ކްލަބަށް ގެންގޮސްފަ އެވެ. މީގެ އިތުރުން ފްރެންކްފަރޓްއަށް ކުޅެމުންދިޔަ މިސްރުގެ ފޯވަޑް އުމަރު މަރުމޫޝް ވެސް ވަނީ ސިޓީއަށް ސޮއިކޮށްފަ އެވެ. މި ތިން ކުޅުންތެރިން ހޯދުމަށް މެންޗެސްޓަރ ސިޓީން ވަނީ 123 މިލިއަން ޕައުންޑް ހޭދަކޮށްފަ އެވެ.