އެމެރިކާގެ ވެރިރަށް ވޮޝިންގްޓަންގެ އެއާޕޯޓަކަށް ޖައްސަން އުޅުނު އާންމުން ދަތުރުކުރަމުންދިޔަ މަތިންދާބޯޓަކާއި އަސްކަރީ ހެލިކޮޕްޓަރެއް ޖެހި، ނުރައްކާތެރި އެކްސިޑެންޓެއް ހިނގައިފިއެވެ.
މި ހާދިސާ ހިނގާފައިވަނީ، ރޭގަން ވޮޝިންގްޓަން ނެޝަނަލް އެއާޕޯޓަށް ޖައްސަން އައި އެމެރިކަން އެއާލައިންސްގެ ފްލައިޓެއް، އެމެރިކާގެ އަސްކަރިއްޔާގެ ބްލެކް ހޯކްސް ހެލިކޮޕްޓަރެއްގައި، ވައިގެ ތެރޭގައި ޖެހިގެންނެވެ.
ވައިގެ ތެރޭގައި ހިނގި އެކްސިޑެންޓުގައި، އެ އުޅަނދުތައް އެއާޕޯޓު ކައިރީގައި އޮންނަ ޕޮޓޯމެކް ކޯރަށް ވަނީ ވެއްޓިފައެވެ. އެމެރިކާގެ ސީބީއެސް ނޫހުން ބުނެފައިވާ ގޮތުގައި، މިހާތަނަށް 18 މީހުންގެ ހަށިގަނޑު އެ ކޯރުން ވަނީ ނަގައިފައެވެ.
އެމެރިކަން އެއާލައިންސްއިން ބުނީ، ހާދިސާ ހިނގި ވަގުތު މަތިންދާބޯޓުގައި 60 ފަސަންޖަރުންނާއި ހަތަރު ކްރޫއިން ދަތުރުކުރަމުންދިޔަ ކަމަށެވެ. އެމެރިކާގެ އަސްކަރިއްޔާއިން ބުނީ، އެ ބޯޓުގައި ޖެހުނު ހެލިކޮޕްޓަރުގައި ސިފައިންގެ ތިން މީހުން ތިބި ކަމަށެވެ.
އެ މަތިންދާބޯޓުގައި ތިބި މީހުންގެ އާއިލާތައް ވަނީ ރޭގަން އެއާޕޯޓަށް ޖަމާވެފައެވެ. ނަމަވެސް، މި ހާދިސާއާ ގުޅޭ އެއްވެސް މަޢުލޫމާތެއް ނުލިބޭކަމުގެ ޝަކުވާ އާއިލާތަކުން ދަނީ ކުރަމުންނެވެ.
އެމެރިކަން އެއާލައިންސްގެ ފްލައިޓް 5342 ރޭގަން އެއާޕޯޓަށް ދަތުރުކުރަމުން ދިޔައީ ވިޗިޓާ، ކެންސަސްއިން ފުރައިގެންނެވެ.
މިއީ 2009 ވަނަ އަހަރުގެ ފަހުން، އެމެރިކާގައި ހިނގި އެންމެ ނުރައްކާތެރި ވައިގެ ހާދިސާއެވެ.
މަތިންދާބޯޓާއި ހެލިކޮޕްޓަރު ޖެހުނު ވަގުތު، ވައިގެ ތެރޭގައި ބޮޑު ގޮވުމެއް ގޮވައި، ރޯވެފައި އޮތް ބޯޓު ޕޮޓޯމެކް ކޯރަށް ވެއްޓެންދާ ބައެއް ވީޑިޔޯތައް ވަނީ އާންމުވެފައެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމުގެ ތަހުޤީޤު ފަށާފައިވާއިރު، މި ތަހުޤީޤަށް ފުރިހަމަ އެއްބާރުލުން ދޭނެ ކަމަށް އެމެރިކަން އެއާލައިންސްއިން ވަނީ ބުނެފައެވެ.