ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނަރަލް ސެކްރެޓަރީގެ މަގާމުން ނާހިލް އަހްމަދު ސިއްދީގް އިސްތިއުފާދީފި އެވެ.
ޖެނެރަލް ސެކްރެޓަރީގެ މަގާމަށް ނާހިލް އައްޔަނުކުރީ މިދިޔަ ނޮވެމްބަރު މަހުގެ ތެރޭގައެވެ. އުމުރުން 25 އަހަރުގެ ނާހިލް އެ މަގާމުން އިސްތިއުފާ ދިނީ މަގާމާ ހަވާލުވިތާ ތިން މަސްދުވަސް ނުވަނީހެވެ. އޭނާ ވެފައިވަނީ އެ މަގާމު މިހާތަނަށް އަދާކުރި އެންމެ ޒުވާން އެސްޖީއަށެވެ.
އެފްއޭއެމްގެ އޮފިޝަލަކު ވަނީ ނާހިލްގެ އިސްތިއުފާ ސިޓީ ލިބިފައިވާކަން ކަށަވަރުކޮށްދީފައެވެ. އޮފިޝަލް ވިދާޅުވީ އޭނާ އިސްތިއުފާ ދީފައިވާކަން، ފީފާ އަށް ވެސް މިހާރު އަންގާފައި ވާނެ ކަމަށެވެ.
ޖީއެސްގެ މަގާމަށް ދިއުމުގެ ކުރިން ނާހިލް ހުރީ ސްޕޯޓްސް މިނިސްޓްރީގެ ސީނިއާ ޕޮލިޓިކަލް ޑައިރެކްޓަރުގެ މަގާމުގައެވެ. އޭގެ ކުރިން އޭނާ ވަނީ އެފްއޭއެމްގެ އެކި މަގާމުތައް އަދާކޮށްފަ އެވެ.
ނާހިލް ވަނީ ވެސްޓް އޮފް އިންގްލެންޑް ޔުނިވަސިޓީގެ ބިޒްނަސް މެނޭޖްމެންޓް އަދި ބިޒްނަސް އެޑްމިނިސްޓްރޭޝަނުން ފުރަތަމަ ޑިގްރީއާއި މާސްޓާސް ޑިގްރީވެސް ހާސިލުކޮށްފަ އެވެ. އަދި ޒުވާން ގައުމީ ފުޓުބޯޅަ ޓީމުގައިވެސް އޭނާ ވަނީ ކުޅެފައެވެ.
އެފްއޭއެމްގެ ކޮމްޕެޓިޝަން ޑިޕާޓްމަންޓުގައި ވެސް ނާހިލް ވަނީ މީގެކުރިން މަސައްކަތްކޮށްފައެވެ. އޭނާ އެ މަގާމުން ވަކިވީ މިއަހަރުގެ ކުރީކޮޅުގައެވެ. ގައުމީ 16 އަހަރުން ދަށުގެ ޓީމާއި އޭއެފްސީ 16 އަހަރުން ދަށުގެ މުބާރާތުގެ ކޮލިފައިންގައި ޗައިނާގައި މެޗުތައް ކުޅުނުއިރު، ރާއްޖެ ޓީމުގެ ހެޑް އޮފް ޑެލިގޭޝަނުގެ ގޮތުގައި ނާހިލް ވަނީ މަސައްކަތްކޮށްފައެވެ.
އެފްއޭއެމްގެ ރަސްމީ ވަޒީފާއަށް ޖެނުއަރީ 2022 ގައި ވަނުމުގެ ކުރިން އޭނާ ވަނީ އިންޓާންޝިޕް މަރުހަލާއެއްގައި އެ އެސޯސިއޭޝަނުގައި މީގެކުރިން މަސައްކަތްކޮށްފަ އެވެ. އެއީ ފެބްރުއަރީ 2017 ގައެވެ.