1997ވަނަ އަހަރުން ފެށިގެން މިއަހަރުގެ މިހާތަނަށް 88 ރަށެއް ރިސޯޓް ތަރައްޤީކުރުމަށް ބިޑް ކުރެއްވި ނަމަވެސް އޭގެތެރެއިން 44 ރަށެއް އަދިވެސް އޮތީ ކޮންސްޓްރަކްޝަން މަރުހަލާގައިކަމަށް ޓޫރިޒަމް މިނިސްޓަރ މޫސާ ޒަމީރު ވިދާޅުވެއްޖެއެވެ.
މިނިސްޓަރ ވިދާޅުވީ، ބިޑްކޮށްގެން ދޫކުރާ ރަށްތައް ތަރައްޤީ ނުކުރެވޭކަމަށާއި، އެ މޮޑެލް މިހާރު ދޫކޮށްލަންޖެހޭކަމަށެވެ. އަދި އެމްޓީޑީސީގެ މޮޑެލްގެ ތެރެއިން 9 ރަށެއް ފަތުރުވެރިކަން ތަރައްޤީކުރުމަށް ދޫކުރައްވާފައިވާކަމަށާއި އޭގެ ތެރެއިން 4 ރަށެއް ރިސޯޓުތަކުގެ ގޮތުގައި ހުޅުވިގެންދިޔަ ކަމަށެވެ. އަދި އޭގެ ތެރެއިން ތިން ރަށެއްގެ އެއްބަސްވުން ބާތިލްކޮށްފައިވާކަން މިނިސްޓަރ ފާހަގަކުރެއްވިއެވެ. އަދި މީގެ ތެރެއިން އެއް ރަށް ތަރައްޤީ ކުރުމުގެ މަސައްކަތް ކުރިއަށްދާއިރު އެއް ރަށް ވިއްކާލާފައިވާކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ޒަމީރު ވިދާޅުވީ، މިހާރު ޤާނޫނުގައި ވާގޮތަށް ޖޮއިންޓްވެންޗަރ އުސޫލުން ނުވަތަ އަމިއްލަ ފަރާތްތަކާއި ސަރުކާރު ގުޅިގެން ތަރައްޤީކުރާ ގިނަ ރިސޯޓްތަކުގެ މަސައްކަތް ކުރިއަށްދާކަމަށެވެ.
މި އުޞޫލު ރާއްޖެއަށް ތަޢާރަފްކުރިއިރު ޓެކްސް ނަގަމުން ނުދާކަން ފާހަގަކުރައްވާ ޓޫރިޒަމް މިނިސްޓަރ ވިދާޅުވީ، ހަރުދަނާ ޓެކްސްގެ ނިޒާމެއް މިވަގުތު ރާއްޖޭގައި އޮތުމުން ޖޮއިންޓްވެންޗަރ އުސޫލުން ރަށްތައް ތަރައްޤީކުރުމުގައި ސަރުކާރުން ބައިވެރިވާޖެހޭކަމަށް ނުފެންނަކަމަށެވެ. އެހެންކަމުން ބިޑް ނުކޮށް ރަށްތައް ދޫކުރެވޭ އުޞޫލަކީ މިވަގުތު ރާއްޖެއަށް އެންމެ ފައިދާބޮޑު މޮޑެލްކަން މިނިސްޓަރ ފާހަގަކުރެއްވިއެވެ.
ބިޑްކޮށްގެން ފަތުރުވެރިކަން ތަރައްޤީކުރުމަށް ރަށް ދޫކުރި އުޞޫލުން އޮތް އެންމެ ބޮޑު ގޮންޖެހުމަކީ ރާއްޖޭގެ ބައެއް ސަރަހައްދުތަކަށް ފަތުރުވެރިކަން ފުޅާވެފައި ނެތުންކަން މިނިސްޓަރ ޒަމީރު ފާހަގަކުރެއްވިއެވެ. އެގޮތުން ހދ.އަތޮޅުގައި ފަތުރުވެރިކަން ތަރައްޤީކުރުމަށް 3 ރަށެއް ދޫކޮށްފައިވާއިރު މިވަގުތު އެއްވެސް ރަށެއް ނިމިފައި ނުވާކަން މިނިސްޓަރ ފާހަގަކުރެއްވިއެވެ. ހދއަތޮޅުގައި ރިސޯޓް ތަރައްޤީކުރާ ނާގޯށީގައިވެސް މިހާތަނަށް ނިމިފައިވަނީ މަސައްކަތުގެ ސާޅީސް އިން ސައްތައެވެ.