ސިފައިންގެ އަސްކަރީ ތަމްރީންތަކެއް ޅ.މާފިލާފުށީގައި

މިމަހުގެ 16 ވަނަ ދުވަހުން ފެށިގެން ސިފައިންގެ އަސްކަރީ ތަމްރީންތަކެއް ޅ.މާފިލާފުށީގައި ކުރިއަށްގެންދިއުމަށް ހަމަޖެހިފައިވާކަމަށް ދިފާޢީ ވުޒާރާއިން ވިދާޅުވެއްޖެއެވެ.

ދިފާޢީ ވުޒާރާއިން ވިދާޅުވީ، މޯލްޑިވްސް ނޭޝަނަލް ޑިފެންސް ފޯސް، އެމް.އެން.ޑީ.އެފުން ކުރިއަށްގެންދާ އަސްކަރީ ތަމްރީނުތަކެއް މިމަހުގެ 16 ވަނަ ދުވަހުގެ 18:00އިން މިމަހުގެ 21 ވަނަ ދުވަހުގެ 23:59އަށް، ޅ. މާފިލާފުށީގައި ކުރިއަށްގެންދިއުމަށް ހަމަޖެހިފައިވާކަމަށެވެ.

އެ ވުޒާރާއިން ވިދާޅުވީ، މި ތަމްރީނުތަކުގައި ބޭނުންކުރާ ފްލެއަރސް ދަތުރުކުރާނީ ޅ. މާފިލާފުށިގެ ވަށައިގެން 200 މީޓަރު ދުރުމިނަށްކަމަށެވެ. އަދި ފްލެއަރސް ދަތުރުކުރާނެ އުސްމިނަކީ 200 މީޓަރެވެ.

މިމަހުގެ 9 ވަނަ ދުވަހުން ފެށިގެން ހަތިޔާރާއެކު ސިފައިންގެ ތަމްރީންތަކެއް މާލެ ސަރަޙައްދުގައިވެސް ދަނީ ކުރިއަށްގެންދަމުންނެވެ. އަންނަ މަހުގެ 5 ވަނަ ދުވަހުގެ ނިޔަލަށް ކުރިއަށްގެންދާ މި ހަރަކާތް ބާއްވަނީ ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގައެވެ.

ދިފާޢީ ވުޒާރާއިން ވިދާޅުވީ އެ މުއްދަތުގެ ތެރޭގައި ކޮންމެ އާދިއްތަ އަދި ބުރާސްފަތި ދުވަހެއްގެ ހަވީރު 16:00އިން 18:00އަށް އެ ތަމްރީންތައް ކުރިއަށްދާނެކަމަށެވެ. އަދި ކޮންމެ އަންގާރަ ދުވަހެއްގެ 22:00އިން 1:00އަށް ތަމްރީންތައް ކުރިއަށްގެންދިޔުމަށްވެސްވަނީ ހަމަޖެހިފައެވެ.