ޖަރުމަން ކަޕުގެ ސެމީ ފައިނަލްގައި ބަޔާ ލެވަކޫސަނާ ދެކޮޅަށް ރޭ ކުޅުނު މެޗު 2-1 ގެ ނަތީޖާއަކުން ކާމިޔާބުކޮށް، މުބާރާތުގެ ފައިނަލުގެ ޖާގައެއް ތިންވަނަ ޑިވިޝަނުގެ އާމީނިއާ ބީލެފެލްޑުން ހޯދައިފިއެވެ.
އާމީނިއާގެ ދަނޑުގައި ކުޅުނު މި މެޗުގެ ވަރަށް ކުރީކޮޅު ލެވަކޫސަނުން ލަނޑެއް ޖަހައި ކުރި ހޯދާފައިވަނިކޮށް، ފަހަތުން އަރައި މެޗުން މޮޅުވެ މުބާރާތުގެ ފައިނަލުގެ ޖާގައެއް އާމީނިއާއިން ހޯދާފައިވާއިރު، މީގެ ކުރިން އެ ޓީމުން ވަނީ ޖަރުމަން ލީގުގެ އިތުރު ތިން ޓީމެއް އަތުން މި މުބާރާތުގައި މޮޅުވެފައެވެ. އެގޮތުން މި ސީޒަނުގައި އެ ޓީމުން ވަނީ ޖަރުމަން ލީގުގެ ޔޫނިއަން ބާލިން އާއި، ފްރެއިބާގްގެ އިތުރުން ވާޑާ ބްރޭމަން އަތުން މޮޅުވެފައެވެ. މިއީ ދެވަނަ ޑިވިޝަނާއި ތިންވަނަ ޑިވިޝަނުގެ ޓީމަކަށް މި މުބާރާތުގެ ތާރީޚުގައިވެސް އެއް ސީޒަނެއްގައި ޖަރުމަން ލީގުގެ ހަތަރު ޓީމުގެ މައްޗަށް ކުރި ހޯދުނު ފުރަތަމަ ފަހަރެވެ.
ރޭ ކުޅުނު މެޗުގެ 17 ވަނަ މިނެޓުގައި ބަޔާ ލެވަކޫސަންގެ ޖޮނަތަން ޓާ ވަނީ ލަނޑެއް ޖަހައި އެ ޓީމަށް ކުރި ހޯދަދީފަ އެވެ. ނަމަވެސް އޭގެ ތިން މިނިޓު ފަހުން އާމީނިއާއިން ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ލެވަކޫސަންގެ ގޯލުކީޕަރު ލޫކަސް ރެޑެކީ ކައިރިން ނައްޓާލުމަށްފަހު މާރިއަސް ވޯލްއެވެ.
މެޗުގެ ފުރަތަމަ ހާފުގެ އިތުރު ވަގުތުގެ ކުޅުމުގައި އާމީނިއާގެ މެކްސިމިލިއަން ގްރޮސާ ވަނީ އިތުރު ލަނޑެއް ޖަހާ ލެވަކޫސަންގެ މައްޗަށް ކުރި ހޯދާފައެވެ.
މި މެޗުން ލެވަކޫސަން ބަލިވެފައިވާއިރު މިއީ ޒަބީ އަލޮންސޯގެ އިރުޝާދުގެ ދަށުން ކުޅެމުންދާ ޓީމު މި މުބާރާތުގައި ބަލިވި ފުރަތަމަ ފަހަރެވެ. މި މުބާރާތުގެ ފައިނަލުގައި އާމީނިއާއާ ދެކޮޅަށް ނިކުންނާނީ އާރްބީ ލައިޕްޒީގް އާއި ސްޓުޓްގާޓް ބައްދަލުކުރާ ސެމީގެ މެޗުން މޮޅުވާ ޓީމެކެވެ.
ޖަރުމަން ކަޕްގެ ފައިނަލުގައި ޖަރުމަން ލީގުގެ ކްލަބެއް ނޫން ޓީމެއް ވާދަކުރާ މިއީ ހަތަރުވަނަ ފަހަރެވެ. މީގެ ކުރިން މި މުބާރާތުގައި ފައިނަލުގައި ކުޅެފައިވާ ލީގު ނޫން ކްލަބްތަކަކީ ޔޫނިއަން ބާލިން އާއި އެނާޖީ ކޮޓްބަސް އަދި ހާތާ ބާލިންއެވެ.