އައްޑޫ އާރި ކިޅީގައި ބިދޭސީއަކު މަރުވެފައި އޮއްވާ ފެނިއްޖެ

އައްޑޫ ސިޓީ އާރިކިޅީގައި ބިދޭސީއަކު މަރުވެފައި އޮއްވާ ފެނިއްޖެއެވެ.

ފުލުހުންގެ ޚިދުމަތުން ވިދާޅުވީ އާރިކިޅީގައި ޚަބަރު ހުސްވެފައި މީހަކު އޮތް ކަމުގެ މައުލޫމާތު ލިބުނީ މިއަދު ހެނދުނު 9:33 ހާއިރު ކަމަށެވެ.

އެމީހާ އައްޑޫ އިކުއިޓޯރިއަލް ހޮސްޕިޓަލަށް ގެންދިޔަ އިރުވެސް މަރުވެފައިވާ ކަމަށް ހޮސްޕިޓަލުން މައުލޫމާތު ދޭ ކަމަށް ވެސް ފުލުހުން ވިދާޅުވެފައެވެ.

އައްޑޫ އިކުއިޓޯރިއަލް ހޮސްޕިޓަލުން ވިދާޅުވީ އާރިކިޅީގައި ޚަބަރު ހުސްވެފައި އޮތް މީހަކު ފެނިގެން އެ ހޮސްޕިޓަލަށް ގެންދިޔައީ ހެނދުނު 10:00ހާއިރު ކަމަށެވެ. އޭނާ ގެނައި އިރުވެސް މަރުވެފައިވާ ކަމަށާއި މަރުވެފައިވަނީ 33 އަހަރުގެ ބިދޭސީ ފިރިހެނެއް ކަމަށް އެ ހޮސްޕިޓަލުން ވިދާޅުވިއެވެ.

މި މައްސަލައާ ގުޅޭ އިތުރު މައުލޫމާތެއް ފުލުހުން ހިއްސާކޮށްފައި ނުވެއެވެ.

ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.