އޯޓިޒަމް ހުންނަ މީހުންނަށް އެހީވުމުގައި އިންސާނީ ވަޞީލަތް އަދިވެސް އިތުރުކުރަންޖެހޭ

އޯޓިޒަމް ހުންނަ މީހުންގެ އާބާދީ އިތުރުވަމުންދިޔަނަމަވެސް އަދިވެސް އެފަދަ ފަރާތްތަކަށް ބޭނުންވާ ޚިދުމަތްތައް އެންމެ އެކަށީގެންވާގޮތުގައި ރާއްޖޭގައި ޤާއިމުވެފައި ނެތެވެ. ބޭނުންވާ ވަޞީލަތްތަކާއި އަދި މިދާއިރާއިން އިންސާނީ ވަޞީލަތްތައްވެސް ރާއްޖޭގައި މަދެވެ.

އޯޓިޒަމާއި ގުޅޭގޮތުން ހޭލުންތެރިކަން އިތުރުކުރުމަށް ބާރުއަޅާ މިދުވަސް ފާހަގަކުރަމުންދާއިރު އެންމެ ބޮޑަށް ސަމާލުކަންދޭންވީ އެއްކަމަކީ ސްކޫލް ކުދިންގެ މެދުގައި މިދާއިރާއަކީވެސް ވަޒީފާއިން ކުރިއަށްދެވޭނެ ރަނގަޅު ފުރުސަތުތަކެއް ހުރިކަން ބުނެދީ ހޭލުންތެރިކަން އިތުރުކުރުމަށެވެ.

އޯޓިޒަމާއި ގުޅޭގޮތުން ހޭލުންތެރިކަން އިތުރުކުރުމަށް މަސައްކަތް ކުރަމުންދާއިރު ސިޔާސަތުތައް ކަނޑައަޅާ ހިސަބުން ފެށިގެން އާންމުން ދެކޭގޮތް ބަދަލުކުރުމަށްވެސް މަސައްކަތް ކުރަންވަނީ ޖެހިފައެވެ. އޯޓިޒަމް ހުރި މީހުންކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާގެ ތަފާސްހިސަބުތަކަށް ބަލާއިރު އޯޓިޒަމް ހުންނަކަމަށް ރަޖިސްޓަރ ވެފައިވާ މީހުންގެ އާބާދީ 1200 އަށްވުރެ ގިނައެވެ. އެހެންކަމުން މިފަރާތްތަކަށް ބޭނުންވާ ޚިދުމަތްތައް ހުރި ނެތްގޮތް ބަލާ އެކަންކަމަށް ހަރުދަނާ މަސައްކަތްތަކެއް ކުރަންވަނީ ޖެހިފައެވެ.

އޯޓިޒަމާއި ގުޅޭގޮތުން ހޭލުންތެރިކަން އިތުރުކުރުމަށް ޕީއެސްއެމްއިން ގެނެސްދިން ޕެނަލް ޑިސްކަޝަންގައި ވާހަކަދައްކަވަމުން ޑިރެކްތަރ ޖެނެރަލް އޮފް ހެލްތު ސަރވިސް ޑރ. އަޙްމަދު ޢަޝްރަފް ވިދާޅުވީ، ރާއްޖޭގައި އޯޓިޒަމް ހުންނަ ކުދިންނަށް ބޭނުންވާ ވަޞީލަތްތައް އެކަށީގެންވާ މިންވަރާ ގާތަށްވެސް އަދި ނެތްކަމަށެވެ. މިގޮތުން މިކަމަށް ޚާއްސަ އެއްވެސް ދިވެއްސަކު އަތޮޅުތަކުގެ ރަށްތަށުގައި ނެތްކަން ފާހަގަކުރެއްވިއެވެ. އެހެންކަމުން މުސްތަޤުބަލުގައި މިދާއިރާއިން މީހުން އުފެއްދުމަށް ސްކޫލް ކުދިންނަށް މިއީ ފުރުސަތު އޮތް ދާއިރާއެއްކަން ބުނެދިނުމަކީ މުހިއްމުކަމެއްކަމަށް ވިދާޅުވިއެވެ.

"ސިއްޙީ ދާއިރާއަށް ބަލާއިރު އޮތް އެންމެ ބޮޑު ހުރަހަކީ އޯޓިޒަމް ހުންނަ ފަރާތްތަކަށް ބޭނުންވާ ޚިދުމަތްތައް ހުރިހާ ރަށެއްގައި ފޯރުކޮށްދިނުން. ހަގީގަތުގައި މަސައްކަތް ކުރަންޖެހެނީ، ހުރިހާ ކުދިންނަށްވެސް ވާޞިލުވެވޭ ފަސޭހަ ނިޒާމެއް ޤާއިމުކުރަން. މިދާއިރާގައި އިންސެންޓިވްސްތަކެއް ދީގެން ކުދިން ނެރެން އެބަޖެހޭ" ޑރ. ޢަޝްރަފް ވިދާޅުވިއެވެ.

މިޕެނަލް ޑިސްކަޝަންގައި ވާހަކަދައްކަވަމުން ކޮންސަލްޓެންޓް އިން ސައިކިއޭޓްރީ، ޑރ. މައުމޫން ޝަރީފް ވިދާޅުވީ، އަތޮޅުތަކުގައި ތިބި އޯޓިޒަމް ހުންނަ މީހުންނަށް ބޭނުންވާ ފަރުވާ ދެވޭނެ އިންތިޒާމު ހަރުދަނާކުރުމަށް ސިއްޙީ ޚިދުމަތްދޭ ތަންތަނާއި އަދި ބެލެނިވެރިންވެސް މިހާރަށްވުރެ ބޮޑަށް އަހުލުވެރިކުރުވިދާނެކަމަށެވެ. މިގޮތުން ކުދިންނަށް ބޭނުންވާ ތެރަޕީތައް ގޭގައި ދިނުމަށް ބޭނުންވާ ކުދިކުދި ކަންކަން ބެލެނިވެރިންނަށް ދަސްކޮށްދެވިދާނެކަމަށެވެ.

"ގިނަ ވަގުތު ހޭދަކުރަނީ ތެރަޕީއަކު ނޫން. ގިނަ ވަގުތު ހޭދަކުރަނީ ގޭގައި. އެހެންވީމަ އަޅުގަނޑުމެންނަށް މައިންބަފައިންނަށް ނުވަތަ ޓީޗަރުންނަށް ނުވަތަ ހެލްތު ވޯކަރުންނަށް ދަސްކޮށްދެވިދާނެ ސްޕީޗް ތެރަޕީގެ ޓިޕްސްތަކެއް." ޑރ.މައުމޫން ވިދާޅުވިއެވެ.

ކޮންމެ އަހަރެއްގެ އޭޕްރީލް މަހުގެ 2 ވަނަ ދުވަސް ފާހަގަކުރަނީ ބައިނަލްއަޤުވާމީގޮތުން ފާހަގަކުރާ އޯޓިޒަމާއި ގުޅޭގޮތުން ހޭލުންތެރިކުރުވުމުގެ ދުވަހުގެ ގޮތުގައެވެ. މިއަހަރަށް ކަނޑައަޅާފައިވާ ޝިޢާރަކީ، "އެޑްވާންސިންގ ނިއުރޯޑައިވަރސިޓީ އެންޑް ދަ ޔޫއެންސަސްޓެއިނަބަލް ޑިވެލޮޕްމަންޓް ގޯލްސް" މިޝިޢާރެވެ.