5 ސީޒަނަށްފަހު އިޙްސާސް ޕްރޮގުރާމްގެ ވަދާޢީ ޝޯވ މިރޭ

ރަމަޟާން މަހާ ދިމާކޮށް ޓެލެވިޜަން މޯލްޑިވްސްއިން ގެނެސްދޭ އިޙްސާސް ޕްރޮގުރާމްގެ ވަދާޢީ އެޕިސޯޑް މިރޭ ޓީވީއެމުން ގެނެސްދޭނެއެވެ.

އިޙްސާސް ޕްރޮގުރާމަކީ މުޖުތަމަޢުގައި އެކި އުނދަގޫތައް ތަޙައްމަލުކޮށްފައިވާ ނުވަތަ ތަޙައްމަލުކުރަމުންދާ މީހުންގެ ހިތްދަތި ތަޖުރިބާތަކުގެ ވާހަކަ އެ މީހުން މެދުވެރިކޮށް ގެނެސްދޭ ޕްރޮގުރާމެކެވެ. އެ ގޮތުން އެ މީހުންނާ އިންޓަވިއުކޮށް، ޙަޔާތުގެ މައްޗަށް ތައްޔާރުކޮށްފައިވާ ރިޕޯޓުތައް މި ޕްރޮގުރާމްތެރެއިން ގެނެސްދީފައިވެއެވެ.

އިޙްސާސް ޕްރޮގުރާމްގެ ސީރީޒް ފިނާލޭ ޓީވީއެމުން ދެއްކުމަށް ހަމަޖެހިފައިވަނީ މިރޭ 22:30 ގައެވެ. މިރޭގެ އެޕިސޯޑުގައިވެސް ޚާއްސަ އެހީއަށް ބޭނުންވާ ކުއްޖެއްގެ ވާހަކަ ގެނެސްދިނުމަށް ވަނީ ހަމަޖެހިފައެވެ. އެގޮތުން މި ޕްރޮގުރާމްގެ ފަހު އެޕިސޯޑް ޚާއްސަކޮށްފައިވަނީ ހުސައިން ޒައިން ޢަލީއަށެވެ. އޭނައަކީ 19 އަހަރުގެ ޒުވާން އިމާމެކެވެ.

އިޙްސާސް ޕްރޮގުރާމްގެ ޕްރޮޑަކްޝަން ޓީމުން ބުނީ މިރޭގެ އެޕިސޯޑުގައި ޚާއްސަ އެހީއަށް ބޭނުންވި ނަމަވެސް، ޚަތީބަކަށްވުމާ ހަމައަށް ޒައިންކުރި ތަޖުރިބާތަކާއި އޭނާގެ މައިންބަފައިން ތަޙައްމަލުކުރި ދަތިތަކުގެ ވާހަކަ ގެނެސްދެވޭނެ ކަމަށެވެ. ޒައިން މިހާރު ދަނީ ހިފްޒު ކުލާސްވެސް ފުރިހަމަކުރަމުންނެވެ. އޭނާ ވަނީ 20 ފޮތް ހިތުދަސްކޮށްފައެވެ.

އިޙްސާސް ޕްރޮގުރާމް އެންމެ ފުރަތަމަ ދައްކަން ފެށީ 2021 ވަނަ އަހަރުއެވެ. އެހާ ހިސާބުން ފެށިގެން މި އަހަރާ ހަމައަށް ވިދިވިދިގެން 5 އަހަރު ޕްރޮގުރާމް ގެނެސްދީފައިވެއެވެ. އެގޮތުން 27 އެޕިސޯޑްގެ 5 ސީޒަން ގެނެސްދީފައިވެއެވެ.

އިޙްސާސް ޕްރޮގުރާމް ފާހަގަކޮށްލެވެނީ ބެލުންތެރިންގެ މެދުގައި ބޮޑު މަޤުބޫލުކަމެއް ލިބުނު ޕްރޮގުރާމެއްގެ ގޮތުގައެވެ. 2022 ވަނަ އަހަރު ދިން މޯލްޑިވްސް ބްރޯޑްކާސްޓް އެވޯޑްސްގައި އިޖުތިމާޢީ ހޭލުންތެރިކަމުގެ ދާއިރާއިން އަހަރުގެ އެންމެ މޮޅު ޓީވީ ޕްރޮގުރާމް އެވޯޑު ލިބިފައިވަނީ މި ޕްރޮގުރާމަށެވެ. އަދި އެންމެ މޮޅު ޓީވީ ޕްރެޒެންޓަރގެ އެވޯޑު ލިބިފައިވަނީ އިޙްސާސް ހުށައަޅައިދިން އާމިނަތު ނަމްޒާއަށެވެ.

އިޙްސާސްގެ އެކި އެޕިސޯޑުތައް މެދުވެރިކޮށް ބޮޑެތި ބަލިތައް ތަޙައްމަލުކުރަމުންދާ މީހުންނާއި ނުކުޅެދުންތެރިކަން ހުންނަ މީހުންނާއި އެ މީހުންގެ ބެލެނިވެރިންކުރާ ތަޖުރިބާތަކާއި ޖިންސީ ގޯނާގެ ޝިކާރައަކަށްވި މީހުންގެ ވާހަކަތައް ގެނެސްދީފައިވެއެވެ. މިއިން ކޮންމެ އެޕިސޯޑަކުންވެސް ބެލުންތެރިންގެ ހިތްތަކާ ކުޅެލި ވާހަކަތަކެއް ގެނެސްދީފައިވެއެވެ.