އިނގިރޭސި ޕްރިމިއަރ ލީގުގެ ކުލަބު މެންޗެސްޓާ ޔުނައިޓެޑުގެ ފޯވާޑް އަލެހަންދްރޯ ގަރްނާޗޯ، 40 މިލިޔން ޕައުންޑުގެ ފީ އަކަށް ގަންނަން ޗެލްސީން އެއްބަސްވެއްޖެއެވެ.
އުމުރުން 21 އަހަރުގެ ގަރްނާޗޯ ގަންނަން ޗެލްސީ އިން އެއްބަސްވެފައިވާއިރު ނިމިގެންދިޔަ ސީޒަނުގެ ފަހުކޮޅު މެންޗެސްޓަރ ޔުނައިޓެޑްގެ ކޯޗު ރުބެން އަމޮރިމް ވަނީ ގަރްނާޗޯ ވިއްކާލަން ނިންމާ އޭނާގެ މުސްތަގުބަލާއިމެދު ގޮތެއް ނިންމުމަށް އަންގާފަ އެވެ.
ގަރްނާޗޯ ގަންނަން ޗެލްސީ އިން ނިންމިއިރު ފާއިތުވެދިޔަ ތިން އަހަރުގެ ތެރޭގައި އެ ކްލަބުން ވަނީ ކުޅުންތެރިން ހޯދުމަށް 500 މިލިއަން ޕައުންޑް ހޭދަކޮށްފަ އެވެ. އަދި މިހާރު ކުރިއަށްދާ ޓްރާންސްފަރ ބާޒާރުގައި ޗެލްސީ އިން ވަނީ ގިނަ ކުޅުންތެރިންތަކެއް ވިއްކާލާފަ އެވެ.
ގަރްނާޗޯ ގެންނަން ޗެލްސީ އިން މަސައްކަތް ކުރަމުންދާއިރު އެ ޓީމުގެ ފޯވަޑް ކްރިސްޓޮފަރ އެންކުންކޫ އިޓަލީގެ އޭސީ މިލާނަށް ވިއްކާލުމުގެ މަސައްކަތް ކުރިއަށްދާކަމަށް މީޑިޔާ ރިޕޯޓްތައް ވަނީ ބުނެފަ އެވެ. މީގެ އިތުރުން ފޯވަޑް ނިކޮލަސް ޖެކްސަން ލޯނު އެއްބަސްވުމެއްގެ ދަށުން ޖަރުމަނުގެ ބަޔާން މިއުނިކަށް ދޫކޮށްލުމާއިގުޅޭ މަޝްވަރާތައް ވަނީ ފެށިފަ އެވެ.
40 މިލިއަން ޕައުންޑުގެ ފީއަކަށް ގަރްނާޗޯ ވިއްކާލަން ނިންމާފައިވާއިރު މިއީ މެންޗެސްޓަރ ޔުނައިޓެޑްގެ ތާރީޚުގައި އެ ކްލަބުން ކުޅުންތެރިއަކު ވިއްކާލާ ހަތަރުވަނައަށް އެންމެ ބޮޑު އަގެވެ. މީގެ ކުރިން އެ ކްލަބުން އެންމެ އަގު ބޮޑުކޮށް ވިއްކާލާފައިވާ އަނެއް ތިން ކުޅުންތެރިންނަކީ ކްރިސްޓިއާނޯ ރޮނާލްޑޯ ރޮމެލޫ ލުކަކޫގެ އިތުރުން އެންހަލް ޑިމާރިޔާ އެވެ.