ގައުމީ ޝޫޓިން މުބާރާތް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ސްޕޯޓްސް ކޮމިޝަނަރ ޠަލާލް

ގައުމީ ޝޫޓިން ޗެމްޕިއަންޝިޕް ފެށުމުގެ ރަސްމިއްޔާތު ކޮމިޝަނަރ އޮފް ސްޕޯޓްސް މުޙައްމަދު ޠަލާލް ޝަރަފުވެރިކޮށްދެއްވައިފިއެވެ.

ބުރާސްފަތި ދުވަހުގެރޭ ޒުވާނުންގެ މަރުކަޒުގެ ހަރުގޭގައި ބޭއްވި މި ރަސްމިއްޔާތުގައި މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ޖެނެރަލް ސެކްރެޓަރީ ތަމޫހު އަޙްމަދު ސައީދު އާއި ޝޫޓިންގ އެސޯސިއޭޝަންގެ އިސްވެރިންވެސް ބައިވެރިވެވަޑައިގެންނެވިއެވެ.

ރާއްޖޭގައި ޝޫޓިންގ ކުރިއަރުވައި، މިކުޅިވަރުން ޒުވާން އެތުލީޓުން އުފެއްދުމުގެ މަގުސަދުގައި މި މުބާރާތް ބާއްވާއިރު، އާންމުންނަށްވެސް ހުޅުވާލައިގެން މި މުބާރާތް ކުރިއަށްގެންދާ މިއީ ދެވަނަ އަހަރެވެ.

މި މުބާރާތުގައި ހަތަރު ކެޓެގަރީއެއްގައި ޝޫޓަރުން ވާދަކުރާނެއެވެ. އެއީ ގައުމީ ޓީމުގައި ހިމެނޭ ޝޫޓަރުންނާއި ކުރިން ގައުމީ ޓީމުގައި ހިމެނި ބައިނަލްއަގުވާމީ މުބާރާތްތަކުގައި ވާދަކޮށްފައިވާ އެތުލީޓުންނަށް ޚާއްސަކޮށްގެން ކުރިއަށްގެންދާ ޕްރޮފެޝަނަލް ކެޓެގަރީ އާއި، 12 އަހަރުން މަތީގެ މީހުންނަށް އާންމުކޮށް ހުޅުވާލައިގެން ކުރިއަށްގެންދާ އޯޕަން ކެޓެގަރީ އާއި، 16 އަހަރާއި 21 އަހަރާ ދެމެދަށް ޚާއްސަކޮށްގެން ކުރިއަށްގެންދާ ޖޫނިއަރ ކެޓެގަރީގެ އިތުރުން 12 އަހަރާއި 16 އަހަރާ ދެމެދުގެ ކުދިންނަށް ޚާއްސަ ޔޫތު ކެޓެގަރީއެވެ.

މިދިޔަ އަހަރުވެސް މި މުބާރާތް ބާއްވާފަވާއިރު، އެ މުބާރާތް ވެގެންގޮސްފައިވަނީ ބޮޑު ތަރުހީބެއް ލިބުނު މުބާރާތަކަށެވެ. އެގޮތުން މިދިޔަ އަހަރުގެ މުބާރާތުގައި 400 ވަރަކަށް ޝޫޓަރުން ބައިވެރިވި ނަމަވެސް، ޖާގައިގެ ދަތިކަމާހުރެ މުބާރާތުން ފުރުސަތުދީފައިވަނީ 370 އެތުލީޓުންނަށެވެ.