އިލެކްޝަންސްގެ ވޯކް-އިން އިންޓަވިއުއަށް 100 އަށްވުރެ ގިނަ މީހުން

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ބޭނުންވާ މުވައްޒަފުން ހޯދުމަށްޓަކައި ކުރިއަށްގެންދިޔަ ވޯކް-އިން އިންޓަވިއުއަށް 100 އަށްވުރެ ގިނަ މީހުން ދިޔަކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

ވޯކް-އިން އިންޓަވިއު ކުރިއަށްގެންދިޔައީ ރޭ ކަލާފަނު ސްކޫލްގައެވެ.

އިލެކްޝަންސް ކޮމިޝަނުން ވިދާޅުވީ އިންޓަވިއުތަކަށް އައި ގިނަ މީހުން ކުރިމަތިލީ އޮފިސަރުންނަށާއި ސީނިއަރ އޮފިސަރުންގެ މަޤާމަށް ކަމަށާއި 100 އަށްވުރެ ގިނަ މީހުން އިންޓަވިއުއަށް ޙާޟިރުވި ކަމަށެވެ. އަދި މަޤާމުތަކަށް އެދި ފޯމު ހުށަހެޅި މީހުންގެ ތެރޭގައި ގިނައީ 18 އަހަރާއި 25 އަހަރާ ދެމެދުގެ ޒުވާނުންކަމަށްވެސް އިލެކްޝަންސް ކޮމިޝަނުން ވިދާޅުވިއެވެ.

އިލެކްޝަންސްއިން ވިދާޅުވީ ވޯކް-އިން އިންޓަރވިއުއަށް ޙާޟިރުވާއިރު އައިޑީ ކާޑު، ތަޢުލީމީ ސެޓްފިކެޓްގެ އިތުރުން ސީވީގެ ކޮޕީ ގެނައުމުން، ޝަރުތު ހަމަވާ ފަރާތްތަކަށް ފޯމު ހުށަހެމާއި ވަގުތުން އިންޓަވިއުކުރުމާއި ޕްރެކްޓިކަލް ޓެސްޓް ހެދުމުގެ އިންތިޒާމް ހަމަޖެހިފައިވާ ކަމަށެވެ.

މިއަދު ހުޅުމާލޭގެ ދެވަނަ ފިޔަވަހީގައިވެސް ވޯކް-އިން އިންޓަވިއު ކުރިއަށްގެންދިއުމަށް ވަނީ ހަމަޖެހިފައެވެ. މި އިންޓަވިއު އޮންނާނީ ކާމިލް ދީދީ ޕްރައިމަރީ ސްކޫލުގައި ހަވީރު 4:00 އިން ރޭގަނޑު 10:00 އަށެވެ.

އިލެކްޝަންސް ކޮމިޝަނުން 260 އަށްވުރެ ގިނަ މުވައްޒަފުން ހޯދަން އިއުލާނުކޮށްފައިވާއިރު، އޭގެ ތެރޭގައި އޮފިސަރުން، ކޮންޓެންޓް ކްރިއޭޓަރުން، ސީނިއަރު އޮފިސަރު، ޑްރައިވަރު، މެއިންޓަނަންސަ އޮފިސަރުގެ މަޤާމުގެ އިތުރުން ސެކިއުރިޓީ އޮފިސަރުގެ މަޤާމަށް ކުރިިމަތިލުމަށްވެސް ވަނީ ހުޅުވާލާފައެވެ.

މީގެ އިތުރުން މަސައްކަތު ވަޒީފާއަށާއި، ލޮޖިސްޓިކް އޮފިސަރ، އެސިސްޓެންޓް މާސްޓަަރ ޓްރޭނަރ، ގްރެފިކްސް ޑިޒައިނަރ، ޓެކް އޮފިސަރުގެ އިތުރުން، ފޮޓޯ ގްރާފަރ އަދި އޮފީސް އެސިސްޓެންޓްކަމުގެ މަޤާމަށް ކުރިމަތިލުމަށް ހުޅުވާލައިފައިވެއެވެ. އެ މަޤާމުތަކަށް ކުރިމަތިލުމަށް ހުޅުވާލާފައިވަނީ އަންނަ އަހަރުގެ ފެބްރުއަރީމަހުގެ 26ވާ ބުރާސްފަތި ދުވަހުގެ 15:00އާ ހަމައަށެވެ.

އިލެކްޝަންސް ކޮމިޝަނުން އަންނަނީ އަންނަ އަހަރުގެ އޭޕްރީލް މަހު ލޯކަލް ކައުންސިލް އަދި ޑަބްލިޔުޑީސީ އިންތިޚާބު ބޭއްވުމަށް ތައްޔާރުވަމުންނެވެ.