ރާއްޖޭގެ ވެރިކަމުގެ ނިޒާމުގައި އިސްލާމް ދީނުގެ އުޞޫލުތައް އިތުރަށް ވަރުގަދަކުރައްވައި، އިސްލާމީ ޝަރިޢާ ރާއްޖޭގައި ތަންފީޛުކުރެއްވުމަށް ސަރުކާރުން ގެންގުޅުއްވާ ވަރުގަދަ ސިޔާސަތުގެ ސަބަބުން ބޭރުގެ އެކި ދަޢުލަތްތަކާއި ބައެއް ޖަމްޢިއްޔާ ޖަމާޢަތްތަކުގެ ޕްރެޝަރާ ރާއްޖެއަށް ވަނީ ކުރިމަތިލާންޖެހިފައެވެ. މިގޮތުން އިސްލާމްދީނުގެ ޙައްދުތައް ރާއްޖޭގައި ތަންފީޛުކުރެއްވުމަށް ސަރުކާރުން ކުރައްވާ މަސައްކަތްޕުޅާ ދެކޮޅަށް އެމެރިކާއާއި ހުޅަނގުގެ ބައެއް ޤައުމުތަކުން ވަނީ ވާހަކަދައްކައި ފާޑުކިޔާފައެވެ. ޚާއްޞަގޮތެއްގައި މަރުގެ ޙުކުމް ތަންފީޛްކުރެއްވުމަށް ސަރުކާރުން ގެންގުޅުއްވާ ސިޔާޞަތައް އެފަރާތްތަކުގެ ހަރުކަށި ފާޑުކިއުންތައް ވަނީ އަމާޒުކޮށްފައެވެ.
މީގެއިތުރުން އަލަށް ފާސްކުރައްވާފައިވާ އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނު ފާސްނުކުރުމަށް ގޮވާލާ އެފަރާތްތަކުން ވަނީ ވާހަކަދައްކާފައެވެ. ދިވެހިރާއްޖޭގެ ދީނީ އެއްބައިވަންތަކަން ވަރުގަދަކުރައްވައި ޙިމާޔަތް ކުރެއްވުމަށް ސަރުކާރާއި، ދައުލަތުގެ އެހެން ބާރުތަކުން ކުރައްވާ މުހިންމު ކޮންމެ މަސައްކަތަކާ ދެކޮޅަށް ބޭރުގެ ދައުލަތްތަކުން ވާހަކަދެއްކުމަކީ މާތްވެގެންވާ އިސްލާމް ދީނާ ދެކޮޅު ފިކުރުތަކަށް ދިވެހިރާއްޖޭގައި ޖާގަދިނުމަށް ގޮވާލާ ގޮވާލުންތަކެވެ. ދިވެހިރާއްޖޭގެ މުޅި ދުސްތޫރީ ނިޒާމުގެ އަޞްލު ކަމުގައިވާ އިސްލާމްދީނުގެ އަޞްލަކާ ޚިލާފަށް ރާއްޖޭގެ އެއްވެސް ބާރަކުން ކަން ކޮށްގެން ނުވާނެކަމަށާއި، އެފަދަ ކޮންމެ ކަމަކީ، އަދި ދީނުގެ އަޞްލަކާ ޚިލާފު ކޮންމެ ޤާނޫނަކީ ބާޠިލު އެއްޗެއްކަމަށް ދިވެހި ޖުމްހޫރިއްޔާގެ ޤާނޫނު އަސާސީގައި ޞަރީޙަ އިބާރާތުން ލިޔެ ބަޔާންކޮށްފައިވާ ހިނދު، އެކަން ކަށަވަރުކުރެއްވުމަށް ދަޢުލަތުގެ ބާރުތަކުން ކުރައްވާ މަސައްކަތްތަކަށް ހުރަސްއެޅުމަށް ބޭރުގެ ދައުލަތްތަކުން ކުރާ މަސައްކަތްތަކަކީ އިސްލާމީ ދައުލަތަކަށްވެ އޮވެ ދިވެހިރާއްޖެއިން ފުރުޞަތު ލިބޭނެ ކަންކަމެއްނޫނެވެ.
img:http://s1.psmnews.mv/images/660x400/14676261943315.jpg|މިނިވަން ދުވަހުގެ ދިދަ ނެގުމުގެ ރަސްމިއްޔާތެއްގެ ތެރެއިން- ފައިލް ފޮޓޯ: ރައީސް އޮފީސް
ސަރުކާރުގެ ސިޔާސަތަކީވެސް މިއީއެވެ. ރާއްޖެއަކީ ޑިމޮކްރަސީގެ ޅަފަތުގައި އޮތް ޤައުމަކަށް ވުމާއެކު ރާއްޖޭގެ ޑިމޮކްރަސީ ހަރުދަނާ ކުރެއްވުމަށް ބޭރުގެ ފަރާތްތަކުގެ ބިނާކުރަނިވި ފާޑުކިއުންތަކަށް ފުރުޞަތު ދެއްވުމަކީ ސަރުކާރުގެ ސިޔާސަތެކެވެ. އެހެންނަމަވެސް ދީނީ ސިޔާސަތާއި ދާޚިލީ ކަންކަމުގައި ދިވެހިންގެ ދިވެހިވަންތަ ގޮތް ކަނޑައެޅުއްވުމަކީ ސަރުކާރުގެ ސިޔާސަތެކެވެ.
އަބުރު ރައްކާތެރިކޮށްދިނުމުގެ ޤާނޫނު ވުޖޫދަށް އައި ހިސާބުންވެސް ބޭރުގެ ބައެއް މީޑިއާތަކާއި ޤައުމުތަކުން ކަންބޮޑުވުން ފާޅުކޮށްފައިވަނީ ރާއްޖޭގައި ދީނީ މިނިވަންކަމަށް އޮތް ފުރުޞަތު މިޤާނޫނުގެ ސަބަބުން ހަނިވެގެން ގޮސްފައިވާކަމަށް ބުނެއެވެ. އަބުރު ރައްކާތެރިކޮށްދިނުމުގެ ޤާނޫނުގައި އެންމެ ބޮޑު އިސްކަމެއްދެއްވައި އެންމެ ފުރަތަމަ މަނާ ކުރައްވާފައިވަނީ އިސްލާމް ދީނުގެ އަޞްލަކާ ޚިލާފުވާ ގޮތަށް ޚިޔާލުފާޅުކުރުމެވެ. މިއީ ހުޅަނގާއި އެމެރިކާ ފަދަ ޤައުމުތަކުން އެންމެ ކަންބޮޑުވާ އެއް ކަންތަކެވެ. ބޭނުން ދީނަކަށް އުޅުމުގެ މިނިވަންކަން ރާއްޖޭގައި ލިބެން ޖެހޭނެކަމަށާއި، އެއީ އިންސާނީ ޙައްޤެއް ކަމަށްބުނެ އެތައް ފަހަރެއްގެ މަތިން ބޭރުގެ އެކި ޤައުމުތަކާއި، އެމްނެސްޓީ ފަދަ ބައިނަލްއަޤްވާމީ ޖަމާޢަތްތަކުން ރާއްޖެއަށް ވަނީ ގޮވާލާފައެވެ.
"ސައްތަ އިންސައްތަ މިނިވަން އިސްލާމީ ޤައުމެއްގެ ގޮތުގައި ދިވެހިރާއްޖެ އޮތީތީ، އެކަމާ ޙަސަދަވެރިވާ އެކި ފަރާތްތައް މިއަދަކު މަދެއް ނޫން. އިރުއަރާ އޮއްސޭ ކޮންމެ ދުވަހަކީ، އިސްލާމްދީން ނޫން އެހެން ދީންތަކަށް ޖާގަދޭން ސަރުކާރަށް ޕްރެޝަރކުރާ ދުވަހެއް. އިސްލާމީ ޝަރީޢަތް މި ޤައުމުގައި ހިންގާތީއާއި، މަދަރުސާތަކުގައި އިސްލާމްދީން ކިޔަވައިދޭތީ، ދިވެހީންނަށް ދަތިކުރާނެކަމުގެ އިންޒާރުތައް އޮހެމުން އަންނަ ދުވަހެއް. ރާއްޖޭގައި އޮތް ޞުލްޙަވެރިކަމާއި، ރާއްޖޭގެ ރީތިކަމާއި، ކުރިއެރުން ނަގާލުމަށް މި ޤައުމުގެ މައްޗަށް ފާވެ، ޙަސަދަވެރިވެފައި ތިބި ޚިޔާނާތްތެރީންތަކެއް އެބަތިބި." އިސްލާމީ ގަޢުމަކަށްވީތީ ރާއްޖެއަށް އަންނަ ޕްރެޝަރުތަކާބެހޭ ގޮތުން ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވިއެވެ.
img:http://s4.psmnews.mv/images/660x400/14597101197393.jpg|ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް- ފޮޓޯ: ރައީސް އޮފީސް
އެހެންނަމަވެސް ދިވެހިރާއްޖޭގެ ޤާނޫނު އަސާސީން ރާއްޖޭގައި ދީނީ މިނިވަންކަން ދިނުމުގެ އެއްވެސް ފުރުޞަތެއް ލިބިދީފައެއް ނުވެއެވެ. އަދި މިކަމަކީ ދިވެހިން ޤަބޫލުކުރާ ދީނީ އަދި އިޖްތިމާޢީ އެންމެހައި އުޞޫލުތަކާ ކަނޑައެޅިގެން ޚިލާފުކަމެއް ކަމުން ރާއްޖޭގައި ދީނީ މިނިވަންކަން ދިނުމުގެ މައުޟޫޢަކީ ބަހުސްކުރަން ނުޖެހޭހާ ސާފުކޮށް، ޒަމާނުންސުރެ ކަނޑައެޅިފައި އޮންނަކަމެކެވެ. ކަން މިހެން އޮތްނަމަވެސް ރާއްޖެއިން ޒަމާނުންސުރެ ޢަމަލުކުރަމުން އަންނަނީ ދީނުގެ މެދުމިނުގެ ސިޔާސަތުކަކަށެވެ. ދީނީ ގޮތުން ހައްދު ފަހަނައަޅައިދިއުން ފަދަ ކަންކަމާ ދެކޮޅަށް ބައިނަލްއަޤުވާމީ މުޖުތަމަޢުގައި ރާއްޖެއިން އަބަދުވެސް ދަނީ ވަކާލާތުކުރަމުންނެވެ.
ބޭރުގެ ފަރާތްތަކުން ދިވެހިންނަށް މިހާތަނަށް ކުރިމަތިވި ކޮންމެ މުސީބާތެއްގައި ޤައުމަށް ޣައްދާރުވި ދިވެހި ކޮންމެވެސް ފަރާތްތަކެއްގެ އަތެއް ވާކަމީ އެނގެންއޮތް ޙަޤީޤަތެކެވެ. އެހެންކަމުން ދިވެހިންގެ ދީނީ ކަންކަމާ ގުޅޭގޮތުން ބޭރުގެ ފަރާތްތަކުން އެހާ ހާމަކަންބޮޑު ގޮތެއްގައި ވާހަކަދެއްކަމުންދަނީ ދިވެހިންގެ ތެރެއިން ބަޔަކު މިފަދަކަންކަމަށް ތަރުޙީބުދީ، އެފަދަ ފަރާތްތަކާ ގުޅިގެން މަސައްކަތްކުރާތީ ކަމުގައިވުން އެކަށީގެންވެއެވެ.
އެގެން އޮންނަކަމަކީ ދިވެހިރާއްޖެ އަބަދުވެސް ދެމިއޮންނާނީ ސައްތައިންސައްތަ އިސްލާމީ ދައުލަތެއްގެ ގޮތުގައިކަމެވެ. ދައުލަތުގެ އެންމެހައި ބާރުތައް ގުޅިގެން އެކަން ގެންދަވަނީ ފުރިހަމައަށް ކަށަވަރުކުރައްވަމުންނެވެ.