ސަޢުދީ ޢަރަބިއްޔާގެ ރިޔާޟުގައި މިހާރު ކުރިއަށްދާ ހަވަނަ އިސްލާމިކް ސޮލިޑާރިޓީ ގޭމްސްގެ އަންހެން ސިންގަލްސްގައި ވާދަކޮށް ރާއްޖޭގެ ފާތުމަތު ދީމާ ޢަލީ ދެވަނަ ބުރުން ޖާގަ ހޯދައިފިއެވެ. މި މެޗު ދީމާ ކާމިޔާބުކޮށްފައިވަނީ އަޒަރުބައިޖާންގެ މިކެއިލޯވާއާ ވާދަކޮށް 4 ސެޓު 2 ސެޓުންނެވެ.
މިއީ މިމުބާރާތުގެ އަންހެން ސިންގަލްސްގައި ދީމާ ކުޅުނު ފުރަތަމަ މެޗަށްވާއިރު މިއީ ބެސްޓް އޮފް ސެވަން އަށް ކުޅުނު މެޗެކެވެ. މިމެޗުގެ ފުރަތަމަ ސެޓު ދީމާވަނީ ފަސޭހަކަމާއެކު 11-7 އިން ކާމިޔާބުކޮށްފައެވެ. އެހެންނަމަވެސް ދެވަނަ ސެޓު އިދިކޮޅުން ވާދަވެރިކަމާއެކު ނުކުމެވަނީ އެންމެ ދެ ޕޮއިންޓުގެ ފަރަގަކުން 13-11 އިން ނަގާފައެވެ. މެޗުގެ ތިންވަނަ ސެޓުގައިވެސް މިކެއިލޯވާ މޮޅު ކުޅުމެއް ދެއްކިއިރު އޭނާ ވަނީ 11-9އިން ސެޓު ހޯދާފައެވެ.
މެޗުގެ ހަތަރުވަނަ ސެޓްގައި ދީމާގެ ފަރާތުންވެސް މޮޅު ކުޅުމެއް ފެނިފައިވާއިރު އޭނާ ވަނީ ފަސޭހަކަމާއެކު 11-4އިން ސެޓު ކާމިޔާބުކޮށްފައެވެ. ކޮންމެ ކުޅުންތެރިއަކުވެސް ފަސްވަނަ ސެޓަށް ނުކުތްއިރު ދެ ސެޓު ނަގާފަވާއިރު، ވާދަވެރި މިސެޓު ދީމާ ވަނީ 11-8 އިން ކާމިޔާބުކޮށްފައެވެ.
އެހެންނަމަވެސް މެޗުގެ ފަސްވަނަ ސެޓުގައި ދީމާގެ ފަރާތުން ފެނުން ކުޅުން ލަސްކަމަށް ފާހަގަވިއެވެ. އިދިކޮޅުން ކުޅެމުން ދިޔަ މިކެއިލޯވާ ކުޅުން އަވަސް ކުރުމަށް މަސައްކަތް ކުރަމުންދިޔަ ނަމަވެސް ދީމާ ވަނީ ކުޅުން ލަސްކޮށް ފަސޭހަކަމާއެކު 11-2 ގެ ބޮޑު ފަރަގަކުން ސެޓު ހޯދާފައެވެ.