"ސިލޯނާއެކު ދިވެހީން" ޓެލެތޯންގެ އޮޑިޓް ފަރމަކަށް ކްރޯ މޯލްޑިވްސް

އަވަށްޓެރި ސްރީ ލަންކާއަށް ދިމާވެފައިވާ ހިތާމަވެރި ކާރިސާގައި ދިވެހިންގެ ފަރާތުން އެހީވުމަށް ކުރިއަށް ގެންދާ "ސިލޯނާއެކު ދިވެހީން" ޓެލެތޯންގެ އޮޑިޓް ފަރމެއްގެ ގޮތުގައި ކްރޯ މޯލްޑިވްސް ހަމަޖައްސައިފިއެވެ.

މިކަމުގެ އެއްބަސްވުމުގައި ޕީއެސްއެންމެ ފަރާތުން ސޮއިކުރެއްވީ ޑިރެކްޓަރ ޕްރޮޖެކްޓް، ލޭންޑް، އެންޑް ބިޒްނަސް ޑިވެލޮޕްމަންޓް ޢާއިޝަތު އާސިފާއެވެ. އަދި ކްރޯ މޯލްޑިވްސްގެ ފަރާތުން ސޮއިކުރެއްވީ މެނޭޖިން ޕަރޓްނަރ ޙަސަން މުޙައްމަދެވެ.

މި ޓެލެތޯންއާ ގުޅޭގޮތުން ވާހަކަދައްކަވަމުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޔާމީން ރަޝީދު ވިދާޅުވީ މިއީ ސްރީ ލަންކާއަށް ކުރިމަތިވެފައިވާ ހިތްދަތި ޙާލަތުގައި އެހީތެރިކަން ފޯރުކޮށްދިނުމުގައި ދިވެހި ރައްޔިތުންގެ ބައިވެރިވުން ދައްކުވައިދިނުމަށް ކުރިއަށްގެންދަން ނިންމި ޓެލެތޯނެއްކަމަށެވެ.

މި ޓެލެތޯންގައި ރާއްޖޭގެ ވަރަށް ގިނަ މީޑިއާތަކާއި އެކިއެކި އިދާރަތަކު އެއްބާރުލުން މިހާރުވެސ ލިބެމުންދާކަން ޔާމީން ފާހަގަކުރެއްވިއެވެ. އޭނާ ވިދާޅުވީ މި ޓެލެތޯނަށް ލިބޭ ފައިސާ ޖަމާކުރުމަށް ޚާއްސަ އެކައުންޓެއް ހަދާފައި ވާކަމަށެވެ. މާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމަށްވަނީ ހަމަޖެހިފައެވެ. އަދި މި ފަނޑަށް އެހީވުމަށް ފަސޭހަ ގިނަ އިންތިޒާމްތަކެއް ހަމަޖައްސާފަވާކަމަށްވެސް އޭނާ ވިދާޅުވިއެވެ.

"ކިއުއާރު ކޯޑެއްވެސް ދޭނެ. ކޯޑް ސްކޭންކޮށްލައިގެން ފަސޭހައިން ފައިސާ ޖަމާ ކުރެވޭނެ. ވަރަށް ގިނަ ބައެއްގެ އެހީތެރިކަން މިހާރުވެސް ދަނީ ލިބެމުން. އެދެނީ މިކަމުގައި ހުރިހާ ރައްޔިތުން ބައިވެ، ލައްކާގެ ރައްޔިތުންނާއެކު ދިވެހިން ތިބިކަން ދައްކުވައިދިނުން." ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޔާމީން ރަޝީދު ވިދާޅުވިއެވެ.

ޕީއެސްއެމްގެ ޑިރެކްޓަރ ޕްރޮޖެކްޓް، ލޭންޑް، އެންޑް ބިޒްނަސް ޑިވެލޮޕްމަންޓް ޢާއިޝަތު އާސިފާ ވިދާޅުވީ، މިނިވަން އޮޑިޓް ފަރމެއްގެ ބެލުމުގެ ދަށުން މިމަސައްކަތް ކުރިއަށްގެންދިއުމުގެ ބޭނުމަކީ، ދެފުށް ފެނަގޮތަށް އަދި ރައްޔިތުންގެ އިތުބާރު ދެމެހެއްޓޭނެގޮތަކަށް ޓެލެތޯން ކުރިއަށްގެންދިއުމެވެ.

"ބޭނުންވަނީ ވީހާވެސް ޓްރާންސްޕޭރެންޓްކޮށް މިކަން ކުރިއަށްގެންދަން. ފައިސާ ލިބެންވާ ފަރާތައް ލިބޭކަން ކަށަވަރުކުރުން." އާސިފާ ވިދާޅުވިއެވެ.

ކްރޯ މޯލްޑިވެސްގެ މެނޭޖިން ޕަރޓްނަރ ޙަސަން މުޙައްމަދު ވިދާޅުވީ، ކްރޯ ގްލޯބަލް އަކީ ދުނިޔޭގައި ހިނގާ މިފަދަ ބޮޑެތި ކާރިސާތަކުގައި އެހީތެރިކަން ދެމުންދާ ކުންފުންޏެއްކަމަށެވެ. ލަންކާއަށް އެހީވުމަށް ރާއްޖޭގައި ބާއްވާ ޓެލެތޯންގެ އޮޑިޓް މަސައްކަތް އެ ކުންފުނިން ކުރިއަށްގެންދަނީ، ކުންފުނީގެ އިޖުތިމާޢީ ޒިންމާގެދަށުންކަމަށް އޭނާ ވިދާޅުވިއެވެ.

"ޕީއެސްއެމްގެ މިފަދަ ޓެލެތޯންތަކުގައި ކުރިންވެސް މަސައްކަތްކޮށްފިން. ވަރަށް ރަނގަޅަށް އިންޓަރނަލް ކޮންޓްރޯލް ބެލެހެއްޓިގެން މަސައްކަތްތައް ގެންދާކަން ފާހަގަވޭ. އަދި ރައްދުވާ ފަރާތަށް ލިބޭކަން ކަށަވަރުކުރުން އެންމެ މުހިންމު ކަމަކީ." ކްރޯ މޯލްޑިވެސްގެ މެނޭޖިން ޕަރޓްނަރ ޙަސަން މުޙައްމަދު ވިދާޅުވިއެވެ.

މި ޓެލެތޯންގައި ނަގުދު ފައިސާ، ޓްރާންސްފަރ އަދި ބޭންކް ޗެކް މެދުވެރިކޮށް ފައިސާ ޖަމާކުރެވޭނެއެވެ. މި ޓެލެތޯން މާދަމާގެ ހެނދުނު 09:00އިން ފެށިގެން މެންދަމު 01:00އަށް ކުރިއަށްދާނެއެވެ.