އިޓާލިއަން ސެރިއާގައި ރޭ ލާޒިއޯ އާއި ދެކޮޅަށް އޭސީ މިލާން ކުޅުނު މެޗު 1-0 ގެ ނަތީޖާއަކުން މިލާން މޮޅުވެ ތާވަލުގެ އެއްވަނަ މަގާމް ހޯދައިފި އެވެ.
މި މެޗުން މިލާން މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 13 މެޗުން ޖުމްލަ 28 ޕޮއިންޓާއެކު ތާވަލުގެ އެއްވަނަ މަގާމް ލިބިފަ އެވެ. ދެވަނައިގައި އޮތް ރޯމާ އެއް މެޗު މަދުން ކުޅެގެން އެ ޓީމަށް ލިބިފައިވަނި 27 ޕޮއިންޓެވެ. މި މެޗުން ބަލިވި ލާޒިއޯ އަސް 13 މެޗުން ލިބިފައިވާ 18 ޕޮއިންޓާއެކު އެ ޓީމު އޮތީ ތާވަލުގެ 8 ވަނައިގަ އެވެ.
މިލާނުގެ ސެން ސީރޯ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފައިނުވި ނަމަވެސް ލާޒިއޯ ވަނީ މިލާނުގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ.
މި މެޗުގައި ފެނިގެންދިޔަ ހަމައެކަނި ލަނޑަކީ މެޗުގެ 51 ވަނަ މިނިޓުގައި މިލާނުގެ ފިކަޔޯ ޓޮމޯރީ ދިން ޕާހަކުން ރަފައެލް ލެއާއޯ ކާމިޔާބުކޮށްދީފައިވާ ލަނޑެކެވެ.
މެޗުގެ ފަހު ވަގުތު މިލާނުގެ ޑިފެންޑަރ ޕެވްލޮވިޗްގެ އަތުގައި އޭރިޔާ ތެރެއިން ބޯޅަ ޖެހުނުކަމަށް ބަލާ ވީޑިއޯ އެސިސްޓެންޓް ރެފްރީން ވަނީ ފަސް ވަރަކަށް މިނިޓު ވަންދެން ބެލުމަށްފަހު އެއީ ޕެނަލްޓީއެއް ނޫން ކަމަށް ނިންމާފަ އެވެ.
އަދި އެ ވަގުތުގެ ތެރޭގައި އެކަމާ ހިތްހަމަ ނުޖެހިގެން މިލާނުގެ ކޯޗު މަސިމިލިއާނޯ އަލެގްރީ އުޅުމުން ރެފްރީ ވަނީ އޭނާއަށް ރަތް ކާޑު ދައްކާ ދަނޑުން ފޮނުވާލާފަ އެވެ.