އިނގިރޭސި ޕްރިމިއާ ލީގުގައި ރޭ ލީޑްސް ޔުނައިޓެޑް އާއި ދެކޮޅަށް މެންޗެސްޓަރ ސިޓީ ކުޅުނު މެޗުގެ ފަހު ވަގުތު ފިލް ފޯޑެން ކާމިޔާބުކޮށްދިން ލަނޑާއެކު 3-2 ގެ ނަތީޖާއަކުން ސިޓީ މޮޅުވެއްޖެ އެވެ.
މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗުގެ ފުރަތަމަ މިނިޓުގައި މެތިއުސް ނޫނޭޒް ދިން ޕާހަކުން ފިލް ފޯޑެން ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
އަދި މެޗުގެ 25 ވަނަ މިނިޓުގައި ސިޓީގެ ޑިފެންޑަރ ޖޮސްކޯ ގްވަޑިއޯލް ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
ނަމަވެސް ދެވަނަ ހާފަށް ނިކުތްއިރު ލީޑްސް އިން ވަނީ އެ ޓީމަށް ދެ ބަދަލެއް ގެނެސްފަ އެވެ. އެގޮތުން ބިޖޯލް އާއި ޑޮމިނިކް ކެލްވަޓް ލުވިން ވަނީ ކުޅެން އަރުވާފަ އެވެ. އަދި މި ބަދަލުތަކާއިއެކު އެ ޓީމުގެ ކުޅުން ވަނީ އިތުރަށް ރަގަޅުވެގެން ގޮސްފަ އެވެ.
މި މެޗުގެ ދެވަނަ ހާފުގެ ކުޅުން ފެށުނުތާ ހަތަރުވަނަ މިނިޓުގައި ޑޮމިނިކް ކެލްވަޓް ލުވިން ވަނީ ލަނޑެއް ޖަހާ ލީޑްސްގެ އުންމީދުތައް އައު ކޮށްދީފަ އެވެ.
އަދި މެޗުގެ 68 ވަނަ މިނިޓުގައި ލީޑްސް ޔުނައިޓެޑްގެ ލޫކަސް އެންމޭޗާ ވަނީ އިތުރު ލަނޑެއް ޖަހާ މެޗުގެ ނަތީޖާ 2-2 އަށް ބަދަލުކޮށްފަ އެވެ.
މެންޗެސްޓަރ ސިޓީ އަށް މި މެޗުން ތިން ޕޮއިންޓް ކަށަވަރުކޮށްދިން ލަނޑު މެޗުގެ އިތުރު ވަގުތުގެ ކުޅުމުގައި އެ ޓީމަށް ކާމިޔާބު ކޮށްދީފައިވަނީ ފިލް ފޯޑެން އެވެ.
މި މެޗުން ލިބުނު ތިން ޕޮއިންޓާއެކު މެންޗެސްޓަރ ސިޓީ އަށް ވަނީ ލީގުގައި މިހާތަނަށް ކުޅުނު 13 މެޗުން ޖުމްލަ 25 ޕޮއިންޓާއެކު ތާވަލުގެ ދެވަނަ މަގާމް ލިބިފަ އެވެ. އެއްވަނައިގައި އޮތް އާސެނަލް އަށް 12 މެޗުން ލިބިފައިވަނި 29 ޕޮއިންޓެވެ.
ލީޑްސް ޔުނައިޓެޑް އަށް 13 މެޗުން ލިބިފައިވާ 11 ޕޮއިންޓާއެކު އެ ޓީމު އޮތީ ރެލިގޭޝަން ޒޯނުގައި 18 ވަނައިގަ އެވެ.