ޚަބަރު

ތޫފާން ދިތުވާގެ ބާރު ގަދަ ވަނީ، މިއަދު އިންޑިޔާގެ އިރުދެކުނަށް އަރާނެ


ދެކުނު އޭޝިޔާ ސަރަޙައްދުގައި އުފެދިފައިވާ ބާރުގަދަ ތޫފާން، ދިތުވާ މިއަދުގެ ވަގުތެއްގައި އިންޑިޔާގެ އިރުދެކުނު އައްސޭރިފަށުގެ ސަރަޙައްދުތަކަށް އަރާނެ ކަމުގައި އެ ޤައުމުގެ މޫސުމާ ބެހޭ އިދާރާއިން އިންޒާރު ކޮށްފިއެވެ. ތޫފާނުގެ ނުރައްކާ އެންމެ ބޮޑަށް ކުރިމަތިވެފައި އޮތީ، އިންޑިޔާގެ އިރުދެކުނުގައި އޮތް ތަމިލް ނާޑޫ ސްޓޭޓްގެ އުތުރާއި، ޕުދުޗެރީގެ ސަރަޙައްދުތަކުގެ އިތުރުން އަންދްރަ ޕްރަދޭޝް ސްޓޭޓްގެ ދެކުނުގެ ސަރަޙައްދުތަކަށެވެ.

އިންޑިޔާގެ މޫސުމާ ބެހޭ އިދާރާއިން ބުނީ، މިއަދުގެ (ނޮވެންބަރު 30ވަނަ ދުވަހުގެ) ހެނދުނުގެ ވަގުތެއްގައި ތޫފާން ދިތުވާ އެ ސަރަޙައްދުތަކަށް އަރާނެ ކަމުގައެވެ. އަދި، ތޫފާނުގެ ބާރު އިތުރަށް ގަދަވަމުންދާ ކަމުގައި ވެސް އެ އިދާރާއިން އިންޒާރު ކުރިއެވެ. ތޫފާނާ ގުޅިގެން ތަމިލް ނާޑޫގެ އައްސޭރިފަށުގެ ސަރަޙައްދުތަކަށް މިހާރު ވެސް ދަނީ ބޯކޮށް ވާރޭވެހެމުންނެވެ. އަދި، އެ ސަރަޙައްދުގައި އާދަޔާ ޚިލާފަށް ވައި ބާރުވެފައިވާ ކަމުގައި ވެސް ރިޕޯޓުތައް ބުނެއެވެ.

ތަމިލް ނާޑޫން މި ވަގުތު ތޫފާނުގެ އަސަރު އެންމެ ބޮޑަށް ކުރަމުން ދަނީ ވޭދާރާނިޔަމްގައި އޮތް ކޯޑީއާކްރާއީ ގޮނޑުދޮށް އޮތް ސަރަޙައްދަށެވެ. އެ ސަރަޙައްދަށް އާދަޔާ ޚިލާފަށް ވައި ބާރުވެ، ބޯކޮށް ވާރޭވެހެމުންދާ ކަމުގައި ރިޕޯޓުތައް ބުންޏެވެ. ތޫފާން ދިތުވާ އިންޑިޔާގެ އިރުދެކުނުގެ ސަރަޙައްދުތަކަށް އަރާނެ ކަމުގެ އިންޒާރު ދިނުމާ އެކު، އެ ސަރަޙައްދުތަކުގެ އިދާރާތަކުން ވަނީ ރައްކާތެރި ކަމުގެ ފިޔަވަޅުތައް އަޅަން ފަށާފައެވެ. އަދި، ކުއްލި ހާލަތްތަކުގައި ހަރަކާތްތެރިވާ ޓީމުތައް ތައްޔާރީ ހާލަތަކަށް ގެނެސްފައެވެ.

ތަމިލް ނާޑޫގެ އިތުރުން އަންދްރަ ޕްރަދޭޝާއި ޕުދުޗެރީއަށް ތޫފާން ދިތުވާ އަރާނެ ކަމުގެ އިންޒާރާ އެކު، އިންޑިޔާގެ މޫސުމާ ބެހޭ އިދާރާއިން ވަނީ އެ ސަރަޙައްދުތަކުގައި ރަތް ސަމާލު އިޢުލާނު ކޮށްފައެވެ. އަދި، ރައްކާތެރި ކަމުގެ ފިޔަވަޅުތައް އެޅުމަށް، އައްސޭރިފަށުގެ ސަރަޙައްދުތަކުގައި ދިރިއުޅޭ ރައްޔިތުންނަށް އިރުޝާދު ދީފައެވެ. މި ގޮތުން، ގެދޮރުން ބޭރަށް ނުދިޔުމަށް ޢާންމު ރައްޔިތުންނަށް އަންގައި، އެ އިދާރާއިން ވަނީ ކަނޑު މައްޗަށް ނޭރުމަށް މަސްވެރިންނަށް އިރުޝާދު ދީފައެވެ. ތޫފާން ދިތުވާއާ ގުޅިގެން ރައްކާތެރި ކަމުގެ ފިޔަވަޅުތައް އަޅާފައިވާ ސަރަޙައްދުތަކުގެ ތެރޭގައި ތަމިލް ނާޑޫގެ ވެރިރަށް ޗެންނައި ވެސް ހިމެނެއެވެ.