އަޟްޙާ ޢީދު ބަންދާ ދިމާކޮށް ކަނޑު ދަތުރުކުރާ އުޅަނދުފަހަރު ޗެކްކުރުމުގެ ޕްރޮގްރާމެއް އެމްއެންޑީއެފް ކޯސްޓްގާރޑުން ފަށްޓަވައިފިއެވެ.
މޯލްޑިވްސް ނޭޝަނަލް ޑިފެންސް ފޯސްގެ މީޑިއާ އޮފިސަރގެ މަސްއޫލިއްޔަތުތަކާއި ވަގުތީ ގޮތުން ޙަވާލުވެވަޑައިގެން ހުންނެވި، ކެޕްޓަން އާދަމް އާޒިމް ވިދާޅުވީ، އަޟްޙާ ޢީދުބަންދާ ދިމާކޮށް ކަނޑުމަގުން ގިނަބަޔަކު އަތޮޅުތަކާއި މާލެއާ ދެމެދު ކަނޑުމަގުން ދަތުރުކުރާނެތީ، މީހުންގެ ސަލާމަތާއި ރައްކާތެރިކަމަށް އެކަށީގެންވާ ފިޔަވަޅު އުޅަނދުފަހަރުގައި އެޅިފައި ހުރިކަން ކޯސްޓްގާރޑުން ޔަޤީން ކުރައްވާނެ ކަމަށެވެ. އަދި މިގޮތަށް އެކި ދުވަސްވަރު ކޯސްޓްގާރޑުން ބަލައި ޗެކްކުރެއްވުމުގައި، އުޅަނދުފަހަރުން އެއްބާރުލުން ދެމުން އަންނަ ކަމާއި އުޅަނދުފަހަރުގެ ވެރިންނާއި ފަޅުވެރިންވެސް ޤަވާޢިދުތަކަށާއި ދަތުރުކުރާ މީހުންގެ ރައްކާތެރިކަމަށް ދޭ ސަމާލުކަން އިތުރުވަމުން އަންނަ ކަމަށް އެމްއެންޑީއެފުން ވިދާޅުވެއެވެ.
މިފަހަރުވެސް ކޯސްޓްގާރޑުން ބައްލަވާނެ ކަންކަމުގެތެރޭގައި އުޅަނދު ފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަ ކުރެވިފައި ހުރިތޯ ބެއްލެވުން ހިމެނޭ ކަމަށް ކެޕްޓަން ޢާޒިމް ވިދާޅުވިއެވެ. އަދި މެރިން ވީއެޗްއެފް ޗެކްކުރެއްވުމާއި އުޅަނދުގެ ކެޕްޓަން އަތުގައި ކަނޑުގެ އުޅަނދު ދުއްވުމުގެ ލައިސަންސް އޮތްތޯ ބައްލަވައި، ދަތުރުވެރިންގެ ސަލާމަތާއި ރައްކާތެރިކަމާގުޅޭ އެހެން ގިނަ ކަންތައްތަކެއްވެސް ބައްލަވާނެ ކަމަށް ހާމަކުރެއްވިއެވެ. މިޕްރޮގްރާމްގައި އެމްއެންޑީއެފް ނޮދަން އޭރިއާ، އެމްއެންޑީއެފް މާލޭ އޭރިއާ، އެމްއެންޑީއެފް ސެންޓްރަލް އޭރިއާ އަދި އެމްއެންޑީއެފް ސަދަން އޭރިއާގައި ޤާއިމު ކުރެވިފައިވާ ކޯސްޓްގާޑް ސްކޮޑްރަންތަކުން އޭރިއާތަކުގައި މިއަދުން ފެށިގެން ޢީދު ބަންދުގެ ނިޔަލަށް މި ޕްރޮގްރާމް ކުރިއަށް ގެންދަވަން ވަނީ ހަމަޖެހިފައެވެ.