އަންނަ އަހަރު އާ 20 ރިސޯޓު ހުޅުވޭނެ ކަމަށް މިނިސްޓަރ އޮފް ޓޫރިޒަމް މޫސާ ޒަމީރު ވިދާޅުވެއްޖެއެވެ.
5 އަހަރުދުވެހުގެ ތެރޭގައި 50 ރިސޯޓު ހުޅުއްވުމަށް ސަރުކާރުން އަމާޒް ހިފާފައިވާއިރު، 2018 ވަނަ އަހަރުގެ މެދުތެރޭގައި އެ އަމާޒް ޙާޞިލްވާނެ ކަމަށްވެސް މިނިސްޓަރ ޒަމީރު ވިދާޅުވިއެވެ.
ރާއްޖޭގެ އިޤްޞާދަށް އެންމެ ބޮޑު އާމްދަނީއެއް ލިބެނީ ފަތުރުވެރިކަމުގެ ސިނާޢަތުން ކަމަށްވާއިރު، އެ ސިނާޢަތް އިތުރަށް ތަރައްޤީކުރައްވައި، ކުރިއެރުއްވުމަށް ސަރުކާރުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ.
ރާއްޖޭގެ ޓޫރިޒަމް އިޝްތިހާރުކުރައްވައި، މާރކެޓްކުރެއްވުމަށް ކުރެއްވިދާނެ ކަންތައްތައް ދެނަގަތުމަށް ބޭއްވެވި ކޮންފަރެންސްގެ ތެރެއިން ނޫސްވެރިންނާ ވާހަކަފުޅު ދައްކަވަމުން ޓޫރިޒަމް މިނިސްޓަރ މޫސާ ޒަމީރު ވިދާޅުވީ ސަރުކާރުން މިހާރު އިސްކަންދެއްވަނީ ކުރިން ދޫކުރައްވާފައިވާ ރަށްރަށުގެ މަސައްކަތް އަވަހަށް ނިންމުމަށް ބޭނުންވާ އެހީތެރިކަން ދެއްވުމަށް ކަމަށެވެ.
މިއަހަރުގެތެރޭގައި 9 ރިސޯޓެއް ހުޅުވިގެންދާނެ ކަމަށާއި އަންނަ އަހަރުގެތެރޭގައި 20 ރިސޯޓު ހުޅުވިގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިހާރު މި ހުޅުވެނީ މާލެ އަތޮޅުގައާއި އުތުރުގެ އަތޮޅުތަކުގައި ހުޅުވޭ ރިސޯޓްތައް ކަމަށެވެ. އަދި ދެކުނުގެ އަތޮޅުތަކުގައިވެސް ރިސޯޓް ތަރައްޤީކުރުމުގެ މަޝްރޫޢުތައް ކުރިއަށްދާކަން މިނިސްޓަރ ފާހަގަކުރެއްވިއެވެ.
މީގެ އިތުރުން މިނިސްޓަރ ވިދާޅުވީ އުތުރުގެ ރަށްރަށުގައި ފަތުރުވެރިކަން ތަރައްޤީކުރުމުގައި ދިމާވާ އެންމެ ބޮޑު ހުރަހަކީ ދަތުރުފަތުރުގެ ދަތިކަން ކަމަށާއި، ހދ. ހަނިމާދޫގައި މިހާރު އޮޕަރޭޓުކުރާ އެއަރޕޯޓުގެ އިތުރުން، ހދ.ކުޅުދުއްފުށި އަދި ށ.ފުނަދޫގައި އެއަރޕޯޓު ތަރައްޤީކުރެވުމުން އެސަރަޙައްދުގައި ފަތުރުވެރިކަން ކުރިއަރައިގެން ދިޔުމަށް އެހީތެރިވެދޭނެ ކަމަށެވެ.
ރިސޯޓްތައް ތަރައްޤީކުރުމުގެ މަސައްކަތްތައް ހަލުވިކުރުމުގެ ގޮތުން ސަރުކާރުން ވަނީ 2014 ވަނަ އަހަރުގެ ޑިސެމްބަރު މަހުން ފެށިގެން ރިސޯޓްތައް މަރާމާތުކުރުމަށް ގެންނަ ތަކެތިން އިމްޕޯޓް ޑިއުޓީ ނެގުން ހުއްޓަވާލައްވާފައެވެ.