މި ސަރުކާރުން ވެރިކަމާ ހަވާލުވެވަޑައިގެންނެވިއިރު، ދިވެހިރާއްޖޭގެ ދަރަނި 33 ބިލިޔަން ރުފިޔާއަށް އަރާފައިވާ ކަމަށާއި، ވެރިކަމުން ވަކިވެވަޑައިގަންނަވާނީ އެދަރަނި އަދާކުރެއްވުމަށްފަހު ކަމަށް ރައީސުލްޖުމްޙޫރިއްޔާ އަބްދު ﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ފުވައްމުލައް ސިޓީގެ ފެނާއި ނަރުދަމާގެ މަސައްކަތް އިފްތިތާޙް ކޮށްދެއްވުމަށްފަހު ވާހަކަފުޅު ދައްކަވަމުން ރައީސް އަބްދު ﷲ ޔާމީން ވިދާޅުވީ، 33 ބިލިޔަން ރުފިޔާގެ ދަރަންޏަކީ، ރާއްޖޭގެ ބޭންކުތަކުން ނުވަތަ މަރުކަޒީ ބޭންކުން ނަގާފައިވާ ދަރަނި ކަމަށްވީނަމަވެސް ހަމައެހެންމެ ބައިނަލްއަޤްވާމީ ބޭންކަކުން ނަގާފައިވާ ދަރަންޏަކަށް ވީނަމަވެސް އެފައިސާގެ އަގު އަބަދުމެ ދިވެހި ސަރުކާރުން ދައްކަވަން ޖެހިވަޑައިގަންނަވާ ކަމަށެވެ.
ރައީސުލްޖުމްޙޫރިއްޔާ ވިދާޅުވީ ދިވެހި ދައުލަތުގެ މުޅި ބަޖެޓަށް ލިބޭ އާމްދަނީގެ 10 އިންސައްތަ ހޭދަކުރަނީ، ދަރަނިތަށް އަދާކުރެއްވުމަށް ކަމަށެވެ.
އަދި އަދުގެ ސަރުކާރުން ކުރިއަށް ގެންދަވާ ތަރައްޤީގެ އެއްވެސް މަޝްރޫޢެއްގެ ސަބަބުން ދައުލަތް ދަރަނިވެރި ނުވާނެކަން ފާހަގަކުރައްވަމުން ރައީސް ޔާމީން ވިދާޅުވީ، އިދިކޮޅު ފަރާތްތަކުގެ ވާހަކަތައް ހުރިގޮތުން ސަރުކާރުގެ ދަރަނިތައް އެފަރާތްތަކަށް އަދާ ނުކުރެވޭނެކަން އެނގިވަޑައިގަންނަވާ ކަމަށެވެ. އެހެންކަމުން އެކަންކަން ފުރިހަމަ ކުރެއްވުމަށް އިތުރު އެއް ދައުރު އެމަނިކުފާނަށް ލިބެން ޖެހިވަޑައިގަންނަވާ ކަމަށް ޤަބޫލުފުޅު ކުރައްވާ ކަމަށް ރައީސް ޔާމީން ވިދާޅުވިއެވެ.
އެމަނިކުފާނު ވިދާޅުވީ، ޤައުމުގެ ކުރިއެރުމަށްޓަކައި ކުރައްވާ ބައެއް ކަންކަމުގެ ސަބަބުން އުނދަގޫތަކަކާ ކުރިމަތިވެދާނެ ކަމަށާއި، ދުރުނޫން މުސްތަޤުބަލެއްގައި އެފަދަ ކަންކަން ވެސް ޙައްލު ކުރައްވާނެ ކަމަށެވެ.
ރާއްޖެއިން ބޭރުގައި ތިބި ސިޔާސީ ބޭފުޅުން ޤައުމީ މަސްލަޙަތު ހިމާޔަތް ކުރަން މަސައްކަތް ކުރަން އެބަޖެހޭކަން ފާހަގަ ކުރައްވަމުން ރައީސް އަބްދު ﷲ ޔާމީން ވިދާޅުވީ، ރާއްޖެ ބަދުނާމުކޮށް ވާހަކަދައްކައި، އަމިއްލަ ފަޔަށް ހަންޖަރުޖެހުން ފަދަ ކަންކަން ކުރުމަކީ ހަމަޖެހޭ ކަމެއް ނޫން ކަމަށެވެ. އަދި އެފަދަ ކަންކަމުގެ ސަބަބުން ދިވެހި ރައްޔިތުންގެ ތަރައްޤީއާއި، ކުރިއެރުމަށް ކޮންމެހެން ބޭނުންވާ ބައެއް ކަހަލަ ކަންކަމުން މަޙުރޫމް ވަމުންދާކަން ފާހަގަ ކުރައްވާފައިވެއެވެ.
ރައީސް ޔާމީން ވިދާޅުވީ، ޒިންމާދާރު އިދިކޮޅު ފަރާތެއްގެ ޙައިޞިއްޔަތުން ރައްޔިތުންގެ ތާޢީދު ހޯދުމުގެ މަސައްކަތް ޤައުމަށް އައިސް ކުރުން މުހިންމު ކަމަށް ވިދާޅުވެ އިދިކޮޅު ފަރާތަކަށް ފާޑު ވިދާޅުވެފައިވެއެވެ.
ރައީސް ޔާމީން ވިދާޅުވީ ސަރުކާރުގައި ތިއްބެވި މެމްބަރުންނާއި ސަރުކާރާއި އިދިކޮޅު ފަރާތަކުގެ ޒިންމާއަކަށް ވާންޖެހޭނީ ތަރައްޤީއަށް ހުރަސްނޭޅޭ ގޮތަށް ޒިންމާދާރު ކަމާއިއެކު ސަރުކާރު ހަމަ މަގަށް އެޅުވުން ކަމަށެވެ.