ރާއްޖޭގެ ޓޫރިޒަމް ސެކްޓަރ ކުރިއެރުވުމަށް ކުރެވެންހުރި ހުރިހާ މަސައްކަތެއް މިދާއިރާގެ ޕްރައިވެޓް ސެކްޓަރގެ ފަރާތުން ކުރާނެކަމަށާއި، އެ ޔަޤީންކަން ސަރުކާރަށް ދެއްވާކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީގެ ސެކްރެޓްރީ ޖެނެރަލް، އަޙްމަދު ނަޒީރު ވިދާޅުވެއްޖެއެވެ.
ފަތުރުވެރިކަމުގެ ދުވަހާއި ގުޅިގެން ޓޫރިޒަމް މިނިސްޓްރީން އެންމެފަހު ޙަރަކާތްތަކުގެ ގޮތުގައި ބޭއްވެވި ގާލާ ޑިނަރގައި ވާހަކަދައްކަވަމުން އަޙްމަދު ނަޒީރު ވިދާޅުވީ ފަތުރުވެރިކަމުގެ ސިނާޢަތުގެ މުސްތަޤްބަލް އޮތީ ވަރަށް އުޖާލާކޮށް ކަމަށާއި، މި ސިނާޢަތް ފެންނަމުން ދަނީ ތަރައްޤީވަމުންދާ އަދި ފަހި ސިނާޢަތެއްގެ ގޮތުގައިކަމަށެވެ. ނަޒީރު ދެއްކެވި ވާހަކައިގައި ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމަށް މިދާއިރާގައި ޙަރަކާތްތެރިވާ އަމިއްލަ ޖަމްޢިއްޔާތަކާއި ސަރުކާރު ގުޅިގެން ކުރަމުންދާ މަސައްކަތަކަށް އަލިއަޅުއްވާލެއްވިއެވެ.
img:http://s1.psmnews.mv/images/660x400/14763385398465.jpg|ޓުއަރިޒަމް ގާލާ ނައިޓްގެ ތެރެއިން / ފޮޓޯ: ރައީސް އޮފީސް
މި ދާއިރާގައި ރާއްޖޭގެ ވާދަވެރި މާކެޓްތަކަށްވުރެ އެއް ފިޔަވަޅު ކުރީގައި ރާއްޖެއަށް ފައިތިލަ ސާބިތުކުރެވެމުންދާ މުހިންމު އެއް ސަބަބަކީ، މި ސިނާޢަތް ކުރިއަރުވަން ސަރުކާރާ ޕްރައިވެޓް ސެކްޓަރ ގުޅިގެން ކުރަމުންދާ މަސައްކަތްތަކާއި، އޮތް ގާތް ގުޅުންކަމަށް ވިދާޅުވިއެވެ. ރާއްޖޭގެ ފަތުރުވެރިކަމުގެ ދާއިރާގައި ޕްރައިވެޓް ސެކްޓަރއިން އަދާކުރަމުންދާ ދައުރާއި ބެހޭ ގޮތުން ވާހަކަދައްކަވަމުން ނަޒީރުވަނީ، ރާއްޖޭގެ އެކި ސަރަޙައްދުތަކުގައި އާ ރިސޯޓްތައް ހުޅުވާ، ފަތުރުވެރިކަމުގެ އާ އުފެއްދުންތައް ތަޢާރަފްކުރުމާއި ސަފާރީ ބޯޓުފަހަރާއި ގެސްޓްހައުސްފަދަ ތަންތަން އޮޕަރޭޓްކޮށް މެނޭޖްކުރުމުގައި އެ ފަރާތްތަކުން އަދާކުރަމުންދާ ދައުރު ފާހަގަކުރައްވާފައެވެ.
މީގެ އިތުރުން، މި ދާއިރާގެ ކުރިއެރުމަށް ސަރުކާރުން ކުރައްވަމުން ގެންދަވާ މަސައްކަތްތަކާއި، ދެއްވަމުން ގެންދަވާ އެއްބާރުލެއްވުން ނަޒީރުވަނީ ފާހަގަކުރައްވާފައެވެ. މިގޮތުން އިބްރާހީމް ނާޞިރު އިންޓަރނޭޝަނަލް އެއަރޕޯޓަށް މިހާރު ގެންނަވަމުން ގެންދަވާ ތަރައްޤީ ވަކިން ޚާއްސަކޮށް ފާހަގަކުރެއްވިއެވެ. އަދި، އެއަރޕޯޓް ތަރައްޤީވެގެންދާއިރު ބޭރުގެ އުދުހުންތަކާއި އެއްވަރަށް އެތެރޭގެ ވައިގެ ދަތުރުފަތުރަށްވެސް އިސްކަން ދެއްވުމަށް އެދިވަޑައިގެންނެވިއެވެ. މީގެ އިތުރުން، ރާއްޖޭގެ ފަތުރުވެރިކަމުގެ ދާއިރާއަކީ ކުރިއަރަމުން އަންނަ ދުޅަހެޔޮ ދާއިރާއެއްކަން މިހާރު ހަދަމުންދާ އަދި ހުޅުވެމުންދާ ރިސޯޓްތަކުގެ އަދަދުންވެސް ފެނި، ހާމަވެގެންދާކަމަށް ނަޒީރުގެ ވާހަކައިގައި ވިދާޅުވިއެވެ.