ޔޫރަޕްގެ ފުޓްބޯޅަ ސީޒަންތައް ފެށުމުގެ ކުރިން ކުޅޭ ޔޫއެފާ ސުޕަރ ކަޕްގެ ޗެމްޕިއަންކަން ޖެހިޖެހިގެން ދެވަނަ ފަހަރަށް ޕީއެސްޖީން ކާމިޔާބުކޮށްފިއެވެ.
ޔޫއެފާ ޗެމްޕިއަންސް ލީގުގެ އެންމެ ފަހުގެ ޗެމްޕިއަން, ޕީއެސްޖީ އަދި ޔޫރޮޕާ ލީގުގެ ޗެމްޕިއަން, އެސްޓަން ވިލާގެ މެދުގައި ކުޅުނު މި މެޗުން ޕީއެސްޖީ މޮޅުވެފައިވަނީ 2-1 ގެ ނަތީޖާއަކުންނެވެ. މިއީ ކޮންމެ ފުޓްބޯޅަ ސީޒަނެއް ފެށުމުގެ ކުރިން ޔޫއެފާގެ އެންމެ ބޮޑު ދެ މުބާރާތް ކާމިޔާބުކުރާ ދެ ޓީމުގެ ދެމެދުގައި ކުޅެވޭ މެޗެކެވެ.
ސަލްޒްބަރގްގެ ރެޑްބުލް އެރީނާގައި ކުޅުނު މި މެޗުގެ 20 ވަނަ މިނިޓުގައި ޕީއެސްޖީގެ ކްވިޗާ ކްވަރަޓްސްކޭލިއާ ވަނީ ލަނޑެއް ޖަހާ އެ ޓީމަށް ކުރި ހޯދަދީފައެވެ.
ނަމަވެސް ފުރަތަމަ ހާފުގެ ކުޅުން ނިމުމުގެ ކުރިން މެޗުގެ ފަހު ވަގުތުގައި އެސްޓަން ވިލާގެ ބްރިއަން މަޖޯ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ. މި ލަނޑު ޖެހުމުގެ ކުރިންވެސް އޭނާއަށް ވަނީ ލަނޑު ޖަހާނެ ރަގަޅު ދެ ފުރުސަތެއް ލިބިފައެވެ.
މިއީ އުމުރުން 17 އަހަރުގެ މަޖޯ އެސްޓަން ވިލާގެ ޓީމަށް ކުޅުނު ފުރަތަމަ މެޗެވެ. އަދި މި ލަނޑާއެކު އޭނާ ވެފައިވަނީ ޔޫއެފާ ސުޕަރ ކަޕްގެ ތާރީޚުގައިވެސް މިހާތަނަށް ލަނޑުޖެހި އެންމެ ޒުވާން ކުޅުންތެރިޔާއަށް ވެފައެވެ.
މިދިޔަ ޖެނުއަރީ މަހު އެސްޓަން ވިލާ އާއި 10 މިލިއަން ޕައުންޑްގެ ފީއަކަށް މެޓްޒް އިން ގުޅުނު މަޖޯ އަށް އެ ޓީމަށް ކުޅެވޭ ގޮތް ނުވެފައިހުރީ އެ ކްލަބަށް ކުޅުންތެރިން ރަޖިސްޓްރީ ނުކުރެވޭ ގޮތަށް 8 މަހުގެ ސަސްޕެންޝަނަކާއި ކުރިމަތިލާން ޖެހުމާއި ގުޅިގެންނެވެ.
މި މެޗުން ޕީއެސްޖީ މޮޅުވި ލަނޑަކީ މެޗުގެ 61 މިނިޓުގައި ޑެޒިރޭ ޑުއޭ ކާމިޔާބުކޮށްދިން ލަނޑެކެވެ.
އެސްޓަން ވިލާ މި މެޗުން ބަލިވެފައިވާއިރު މިއީ އުނެއި އެމެރިކާ ސުޕަރ ކަޕުން ބަލިވި ހަތަރުވަނަ ފަހަރެވެ. މީގެ ކުރިން އޭނާ ވަނީ ސެވިއްޔާ އާއި ވިޔަރެއާލް އާއިއެކުވެސް ސުޕަރ ކަޕްގައި ކުޅެފައެވެ.