ށ. ކަނޑިތީމުގައި އަލަށް ޢިމާރާތްކުރައްވާ މިސްކިތުގެ މަސައްކަތް ނިންމާ އަންނަ އަހަރުގެ ތެރޭގައި ބޭނުންކުރަން ފެށޭވަރުވާނެ ކަމަށް ކަނޑިތީމު ކައުންސިލުން ވިދާޅުވެއްޖެއެވެ.
ކަނޑިތީމު ކައުންސިލްގެ ރައީސް އަލީ ރިފާޒް ވިދާޅުވީ އެރަށުގައި އިތުރު މިސްކިތެއް ނެތުމާއެކު ރަށުގެ ރައްޔިތުންނަށް ވަރަށް ބޮޑެތި ދަތިތަކާއި ދިމާވަމުންދާ ކަމަށެވެ. އެހެންކަމުން މިކަމަށް ޙައްލެއް ހޯއްދަވައިދެއްވުމުގެ ގޮތުން އެރަށުގައި ޢިމާރާތް ކުރައްވަމުން ގެންދަވާ މިސްކިތުގެ މިހާރު ކުރިއަށްދަނީ ފިނިޝިންގ މަސައްކަތްތައް ކަމަށާއި، އަންނަ އަހަރުގެތެރޭގައި މިސްކިތް ބޭނުންކުރަން ފެށޭވަރުވާނެ ކަމަށް ވިދާޅުވިއެވެ.
704 މީހުންގެ ޖާގައިގެ މި މިސްކިތް ބިނާކުރަމުންދަނީ އެރަށުގެ ކުރީގެ ފުޓްބޯޅަ ދަނޑު ސަރަޙައްދުގެ ހުޅަނގު ފަޅީގައިކަމަށް ކައުންސިލުން މަޢުލޫމާތު ދެއްވައެވެ. މި މިސްކިތަކީ އަލިފުޅުތުއްތު ފައުންޑޭޝަންގެ އެހީގެ ދަށުން ކަނޑިތީމުގައި ބިނާކުރާ މިސްކިތެކެވެ.