އަވައްޓެރި އިންޑިއާއަށް މިހާރު ކުރައްވަމުންގެންދަވާ ދަތުރުފުޅުގައި އިކޮނޮމިކް މިނިސްޓަރ މުހައްމަދު ސައީދު އެޤައުމުގެ ކޮމަރސް މިނިސްޓަރ ނިރްމަލާ ސިތްރަމަން އާއި ބައްދަލުކުރައްވައިފިއެވެ.
އިންޑިއާގެ ކޮމަރސް މިނިސްޓްރީގައި އޮތް މި ބައްދަލުވުމުގައި ދެ ބޭފުޅުންވަނީ، ދެޤައުމުގެ ދެމެދުގައި އޮތް އިޤްތިޟާދީ ގުޅުމާއި ބެހޭގޮތުން މަޝްވާރާކުރައްވާފައެވެ. މިގޮތުން ދެޤައުމު ގުޅިގެން ވިޔަފާރީގެ ގުޅުމާއި، އިންވެސްޓްމެންޓްތައް ފުޅާކުރެވިދާނޭ ގޮތްތަކާއި ބެހޭގޮތުން މަޝްވަރާކޮށްފައިވާކަމަށް އިކޮނޮމިކް މިނިސްޓްރީން މައުލޫމާތުދެއްވައެވެ. ހާއްސަ ގޮތެއްގައި އިންޑިއާގެ ބޮޑުވަޒީރު ނަރެންދްރަ މޯދީ އާއި، ރައީސް ޔާމިންގެ އިޤްތިޟޯދީ ސިޔާސަތްތަކުގެ ތެރޭގައި ހިމެނޭ މުހިއްމު ކަންތައްތަކާއި ބެހޭގޮތުން މި ބައްދަލުވުމުގައި މަޝްވަރާކޮށްފައިވާކަމަށް މިނިސްޓަރ ސައީދު ވަނީ ފާހަގަކުރައްވާފައެވެ.
އިޤްތިޟާދީ ވަޒީރު މުހައްމަދު ސައީދު އިންޑިއާއަށް ކުރައްވަމުން ގެންދަވާ ދަތުރުފުޅުގައި އެޤައުމުގެ ވިޔަފާރިއާއި ބެހޭ ވަޒީރާ ބައްދަލުކުރައްވާފައިވާއިރު، އިކޮނޮމިކް މިނިސްޓްރީން ދަނީ ތިންވަނަ މޯލްޑިވްސް އިންވެސްޓްމަންޓް ފޯރަމް އިންޑިއާގެ ނިއުދިއްލީގައި ބޭއްވުމަށް ތައްޔާރުވަމުންނެވެ. މޯލްޑިވްސް އިންވެސްޓްމަންޓް ފޯރަމް ބޭއްވުމަށް ހަމަޖެހިފައިވަނީ، މިހިނގާ ނޮވެމްބަރުމަހުގެ އެކާވީހުން ބާވީހަށް ނިއުދިއްލީގެ ތާޖް ޕެލެސްގައެވެ.
މިފަހަރުގެ ފޯރަމް ކުރިއަށްގެންދިއުމަށް ހަމަޖެހިފައިވަނީ، އިންޑިއާގެ ދުއިސައްތަ ފަންސާސް ހާހަށްވުރެ ގިނަ ކުންފުނި ތަމްސީލްކުރާ ޖަމްޢިއްޔާ، ފެޑަރޭޝަން އޮފް އިންޑިއަން ޗެމްބަރސް އޮފް ކޮމަރސް އެންޑް އިންޑަރސްޓްރީ، (އެފްއައިސީސީއައި) އާ ގުޅިގެނެވެ.