މެލޭޝިއާގައި ތަޢުލީމު ހާސިލްކުރާ ދަރިވަރުންނަށް ފަސޭހަ އިންތިޒާމުތަކެއް ހަމަޖައްސައިދެނީ

މެލޭޝިއާގައި ތަޢުލީމް ޙާސިލްކުރަމުންދާ ދިވެހި ދަރިވަރުންނަށް މިހާރު ދިމާވާ ދަތިތަކަށް ހައްލު ހޯދައިދެއްވާނެކަމުގެ ޔަޤީންކަން އެ ޤައުމުގެ ބޮޑުވަޒީރު އަންވަރު އިބްރާހީމް ދެއްވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޕީއެސްއެމްގެ ނޭޝަން ޗެޓް ޕްރޮގްރާމްގައި ވާހަކަފުޅުދައްކަވަމުން، ރައީސް ޑރ. މުޢިއްޒު ވިދާޅުވީ، އެ މަނިކުފާނުގެ ދައުވަތަކަށް މެލޭޝިއާގެ ބޮޑުވަޒީރު އަންވަރު އިބްރާހީމް ދާދިފަހުން ދިވެހިރާއްޖެއަށް ކުރެއްވި ފުރަމާނަ ދަތުރުފުޅަކީ، މުހިންމު ނިންމެވުންތަކެއް ނިންމެވި ދަތުރުފުޅެއްކަމަށެވެ. އަދި އެ ދަތުރުފުޅުގެ ތެރެއިން ވަރަށް އުފާވެރި ޚަބަރުތަކެއް ބޮޑުވަޒީރު ދެއްވާފައިވާކަމަށް ރައީސް ޑރ. މުޢިއްޒު ވިދާޅުވިއެވެ.

މެލޭޝިއާގައި ރާއްޖޭގެ 2700 އެއްހާ ދަރިވަރުން ތަޢުލީމު ޙާސިލްކުރަމުންދާއިރު، އެ ދަރިވަރުންގެ އާއިލާތަކާއެކު 6000އެއްހާ ދިވެހިން މެލޭޝިއާގައި ދިރިއުޅެއެވެ. ރައީސް ވިދާޅުވީ، މެލޭޝިއާގައި ކިޔަވަމުންދާ ދަރިވަރުންނަށް ބޭނުންވާ ކަންކަމާއި، އެ ޤައުމުގައި ދިރިއުޅޭ ދިވެހިންނަށް ފަސޭހަ އިންތިޒާމުތަކެއް ހަމަޖައްސަވައިދެއްވާފައިވާނެކަމުގެ ޔަޤީންކަން، މެލޭޝިއާގެ ބޮޑުވަޒީރު އަންވަރު އިބްރާހީމް ދެއްވާފައިވާކަމަށެވެ.

އެގޮތުން ބައެއް ދާއިރާތަކުން ތަޢުލީމް ޙާސިލްކުރާ ދަރިވަރުންނަށް މިހާރަށްވުރެ ފަސޭހައިން އިންޓަރންޝިޕްގެ ފުރުޞަތު ހޯދައިދިނުމަށް މަސައްކަތް ކުރައްވާނެކަމުގެ ޔަޤީންކަން ބޮޑުވަޒީރު ދެއްވާފައިވާކަމަށް ރައީސް ވިދާޅުވިއެވެ.

"ކަންކަން ފަސޭހަކޮށްދެއްވާނެކަމަށް ވިދާޅުވި. އޭގެ ތެރޭގައި ކިޔަވާ ކުދިންނަށް ބޭނުންވާ ކަންތައްތަކާއި، ކިޔަވަން ދާ ބޭނުންވާ ކުދިންނަށް ބޭނުންވާ ކަންތައްތަކާއި، މިސާލަކަށް ޑޮކްޓަރުކަން ކިޔަވާކުދިންގެ އިންޓަރންޝިޕް ކަންތައްތައް ހަމަޖައްސަވައިދެއްވަން މަސައްކަތްކުރައްވާނެކަމަށް ވިދާޅުވި." ރައީސް ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ، ދެ ޤައުމު ދެމެދު ސޮއިކުރެވޭ 100 މިލިޔަން ޑޮލަރުގެ ކަރަންސީ ސޮވޮޕް އަވަސްކުރުމަށް އިސްކަންދެއްވާނެކަމުގެ ޔަޤީންކަން ބޮޑުވަޒީރު އަންވަރު ދެއްވާފައިވާކަމަށެވެ.

ދެ ޤައުމުގެ ދެމެދުގައި ޕްރެފެރެންޝަލް ޓްރޭޑް އެގްރީމަންޓް، ޕީޓީއޭ ނުވަތަ ޚާއްޞަ އިނާޔަތްތަކާއެކު ވިޔަފާރިކުރުމުގެ އެއްބަސްވުމެއް ޤާއިމުކުރުމުގެ މަޝްވަރާތައް އަވަހަށް ފެށުމުގެ އުއްމީދު ބޮޑުކަން އެ މަނިކުފާނު ފާހަގަކުރެއްވިއެވެ.

ރާއްޖެއާއި މެލޭޝިއާއާ ދެމެދު، އިޤްތިޞާދީ ގޮތުން އޮތް ގުޅުން ބަދަހި ކުރުމަށާ، އިޖުތިމާއީ އެހީތެރިކަން ދެއްވުމާއި ގުޅޭގޮތުން މަޝްވަރާކޮށްފައިވާކަމަށް ރައީސް ވިދާޅުވިއެވެ. މެލޭޝިއާއަކީ ރާއްޖެއަށް ޚާއްސަ ޤައުމެއްކަމަށް ފާހަގަކުރައްވާ ރައީސް ވިދާޅުވީ އެކި ދާއިރާތަކުން ގުޅުން ބަދަހިކުރުމަށާއި، އިންވެސްޓްމެންޓުގެ ފުރުޞަތުތައް ހޯދައިދިނުމަށް މަސައްކަތްކުރުމަށް މަޝްވަރާކުރައްވާފައިވާކަމަށް ރައީސް ވިދާޅުވިއެވެ.

މެލޭޝިއާގެ ބޮޑުވަޒީރުގެ ދަތުރުފުޅުގައި، ދެ ޤައުމުގެ ދެމެދު އިތުރަށް މަޝްވަރާ ކުރެއްވި ކަންތައްތަކުގެ ތެރޭގައި މޫސުމީ ބަދަލުތަކުން އަރައިގަތުމަށް ކުރެވޭ މަސައްކަތްތުގައި އެއްބާރުލުން ދިނުން ހިމެނެއެވެ. އެމްބަސީއަށް ދިމާވާ ދަތިތައްވެސް ހައްލުކޮށްދެއްވާނެކަމުގެ ޔަޤީންކަން ބޮޑުވަޒީރު އަންވަރު ވަނީ ދެއްވާފައެވެ. ޖުމްލަކޮށް ރާއްޖެއިން އެދިވަޑައިގެންފައިވާ ކަންކަމަށް އެއްބާރުލުން ދެއްވާނެކަމުގެ ޔަޤީންކަން ބޮޑުވަޒީރު އަންވަރު ވަނީ ދެއްވާފައެވެ.

މެލޭޝިއާއި ދިވެހިރާއްޖޭގެ ގުޅުން އިތުރު ހަރުފަތަކަށް ގެންދިއުމަށް ޖޮއިންޓް ކޮމިޓީއެއް އެކުލަވާލުމުގެ މަސައްކަތްވެސް ދަނީ ކުރަމުންނެވެ.