ބެލްޖިއަމް މެޗަކީ އުނދަގޫ ޓެސްޓެއް, ބަދަލުތަކެއް ފެންނާނެ: ޒިދާން

ޔުއެފާ ނޭޝަންސް ލީގުގައި މިރޭ ބެލްޖިއަމްއާ ދެކޮޅަށް ކުޅޭ މެޗުން ބަދަލުތަކެއް ފެންނާނެ ކަމަށާއި, ޔަގީނުންވެސް އެއީ އުނދަގޫ ޓެސްޓެއް ކަމަށް ފްރާންސް ކޯޗު ޒައިނުއްދީން ޒިދާން ބުނެފިއެވެ.

މެޗުގެ ކުރިން ވާހަކަ ދައްކަމުން ޒިދާން ފުރަތަމަ ވެސް ބުނީ ޓީމް ކޮންމެސް ވަރަކަށް ރޮޓޭޓްކޮށް, ބަދަލުތަކެއް ފެންނާނެ ކަމަށެވެ. ތުރިކުޔޭ އަތުން 1-0 ން މޮޅުވި މެޗުގައި ލަނޑު ޖެހި އެމްބާޕޭ އަށް އަނިޔާވެ, އެމެޗުގައި ބަދަލުކުރިއެވެ. އެހެންކަމުން ޔަގީނުންވެސް އެމްބާޕޭ މިރޭ މެޗުން ނުފެންނާނެއެވެ. އެޔަގީންކަން ދެމުން ޒިދާން ބުނީ އެހެން ބައެއް ބަދަލުތައްވެސް ފެންނާނެ ކަމަށެވެ. އެކަމަކު ތަފްސީލް ނުދީ ޒިދާން ބުނީ އެބަދަލުތައް މެޗުން ފެންނާނެ ކަމަށެވެ. އެމްބާޕޭ މިހާރު ވަނީ އޭނާގެ ކްލަބް ރެއާލް މެޑްރިޑާ ގުޅިފައެވެ.

ބެލްޖިއަމްއާ ގުޅޭގޮތުން ވާހަކަދައްކަމުން ބުނީ އެއީ ވޯލްޑްކަޕްގައި ވެސް މޮޅަށް ކުޅުނު ވަރަށް ވަރުގަދަ ޓީމެއް ކަމަށެވެ. ފްރާންސަށް ބެލްޖިއަމް މެޗަކީ "ޓަފް ޓެސްޓެއް" ކަމަށް ޒިދާން ބުންޏެވެ. ބެލްޖިއަމްއިން 2-0 ން އިޓަލީ ބަލިކޮށްފައިވާކަންވެސް ޒިދާން ފާހަގަކުރިއެވެ. ބެލްޖިއަމްއިން އިޓަލީ ބަލިކުރީ ނޭޝަންސް ލީގުގައި އެޓީމް ކުޅުނު ފުރަތަމަ މެޗުގައެވެ.

އާ ކޯޗު ވެން ބޮމެލްއާއެކު ބެލްޖިއަމް އަކީ ވަރަށް ބަރުގަދަ ޓީމެއް ކަމަށާއި, އެޓީމްގައި ހުނަރުވެރި ތަފާތު މޮޅު ވަކިވަކި ކުޅުންތެރިން ތިބިކަންވެސް ފްރާންސް ކޯޗު ޒިދާން ފާހަގަކުރިއެވެ.

"

ޖުމްލަކޮށް އަހަންނަށް އިނގޭ އަހަރެމެން މިނިކުންނަނީ ވަރަށް އުނދަގޫ މެޗަކަށް ކަން. އަހަރެން ޝައުގުވެރިވަނީ ވެސް އެކަހަލަ މެޗުތަކަށް. އަހަރެމެންނަށް ހުރީ ވަރަށް ރަނގަޅު މެޗުތަކެއް. ވާދަކުރަންޔާ އެކަހަލަ މެޗުތަކެއް ޝައުގުވެރި.

ޒިދާން/ ފްރާންސް ކޯޗު

ކުރު މުއްދަތެއްގެ ތެރޭގައި ހަތަރު މެޗު ކުޅެން ޖެހޭކަން ފާހަގަކުރަމުން ޒިދާން އިތުރަށް ފާހަގަކުރީ ތުރުކިޔެ އާއި ބެލްޖިއަމްގެ ދަތުރެވެ. އެހެންވީމާ ޔަގީނުންވެސް ޓީމް ރޮޓޭޓް ކުރަން ޖެހޭނެކަމަށް ޒިދާން ބުންޏެވެ. ބެލްޖިއަމްއާ ދެކޮޅަށް ކުޅޭ މެޗަކީ ފްރާންސް އިން މިފަހަރުގެ ނޭޝަންސް ލީގުގައި ކުޅޭ ދެވަނަ މެޗެވެ. އޭގެފަހުން ހުކުރު ދުވަހު ޕެރިހުގައި ވާދަކުރާނީ އިޓަލީއާއެވެ. އަދި އަންނަ މަހުގެ 5 ވަނަ ދުވަހު ބެލްޖިއަމްއާ ދެކޮޅަށް ދެވަނަ ލެގުގައި ވާދަކުރާނެއެވެ.
ޒިދާން ބުނީ އޭނާގެ އެންމެ އަވަސް އަމާޒަކަށް އޮތީ ކުޅުންތެރިން ރަނގަޅަށް ދެނެގަނެ, އޭނާ ކުޅުންތެރިންގެ ފަރާތުން ބޭނުންވާ ކަންކަން ކުޅުންތެރިންނަށްވެސް ދެނެގަނެވުން ކަމަށެވެ. އެކަމަކު އެހުރިހާ ކަމަކާއެކުވެސް އެންމެ މުހިއްމީ މެޗުތަކުގެ ނަތީޖާ ކަމަށެވެ.