ތައިލެންޑްގައި ފެންބޮޑުވުމާއި ގުޅިގެން ބޮޑުވަޒީރަށް ރައީސް ތަޢުޒިޔާ ފޮނުއްވައިފި

ތައިލެންޑަށް ބޯކޮށް ވާރޭވެހި ހިނގި ފެންބޮޑުވުމުގެ ޙާދިސާތަކުގައި ލިބުނު ގެއްލުންތަކާއި ގުޅިގެން ތައިލެންޑްގެ ބޮޑުވަޒީރު އަނުތިން ޗާންވިރަކުލްއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތައުޒިޔާގެ ވިދާޅުވެއްޖެއެވެ.

ރައީސުލްޖުމްހޫރިއްޔާ ފޮނުއްވި ތަޢުޒިޔާގެ މެސެޖުގައި ވަނީ ތައިލެންޑްގައި ހިނގި ފެން ބޮޑުމުގެ ޙާދިސާގެ ސަބަބުން ބައެއްގެ ފުރާނަ ގެއްލި އެތައް ބައެއްގެ ގެދޮރު ގެއްލުމާއި ގުޅިގެން ހިތާމަފާޅުކުރައްވާކަމަށެވެ. އަދި ދިވެހި ސަރުކާރާއި ރައްޔިތުންގެ ނަމުގައި، ރައީސުލްޖުމްހޫރިއްޔާ ވަނީ ތައިލެންޑުގެ ބޮޑުވަޒީރަށާއި، ސަރުކާރަށާއި، ރައްޔިތުންނަށް ތަޢުޒިޔާ ވިދާޅުވެފައެވެ.

ރައީސްވަނީ މިހާދިސާތަކުގައި އަނިޔާވި ފަރާތްތަކަށް އަވަސް ޝިފާއެއް ލިބުމަށް އެދިވަޑައިގެންފައެވެ. އަދި މިހާރު ކުރިއަށްދާ ކުއްލި އެހީތެރިކަން ފޯރުކޮށްދިނުމުގެ މަސައްކަތްތައް ހުރަހެއްނެތި ކުރިއަށްގޮސް، ބޭނުންޖެހިފައިވާ ފަރާތްތަކަށް އަވަސް ލުޔެއް ލިބިގެންދިއުމަށް ރައީސުލްޖުމްހޫރިއްޔާވަނީ އެދިވަޑައިގެންފައެވެ.

ތައިލެންޑުގެ ވެރިރަށް ބެންކޮކުގައި މިމަހުގެ މެދުތެރެއިން ފެށިގެން، ހިނގި ފެންބޮޑުވުމުގެ އެކި ޙާދިސާތަކުގައި 8 މީހުންވަނީ މަރުވެފައެވެ. މިފެންބޮޑުވުމުގެ އަސަރު 329،000 ޢާއިލާއެއްގެ ގާތްގަނޑަކަށް 700،000 މީހުންނަށް ކޮށްފައިވާ ކަމަށް ބެންގކޮކް މެޓްރޮޕޮލިޓަން އެޑްމިނިސްޓްރޭޝަނުންވަނީ ހާމަކޮށްފައެވެ.