ތައިލެންޑުގެ ވެރިރަށް ބެންކޮކަށް ކުރިމަތިވި ފެންބޮޑުވުމުގެ ސަބަބުން 329،000 ޢާއިލާއަކުން ގާތްގަނޑަކަށް 700،000 މީހުންނަށް އަސަރުކޮށްފައިވާ ކަމުގައި ބެންގކޮކް މެޓްރޮޕޮލިޓަން އެޑްމިނިސްޓްރޭޝަނުން (ބީއެމްއޭ) ހާމަކޮށްފިއެވެ. އެ ސިޓީގެ ގަވަރުނަރުގެ ނައިބު ޓަވީދާ ކަމޯލްވޭ ވިދާޅުވީ، ވެރިރަށުން އެންމެ ބޮޑު ގެއްލުމެއް ލިބުނު ލާތު ކްރާބަންގ އަވަށުން 30،000 އާއި 40،000 އާ ދެމެދުގެ ޢަދަދަކަށް މީހުން ހާލުގައި ޖެހުނު ކަމުގައެވެ. މީގެ އިތުރުން ކްލޮންގ ޗާން ހިމެނޭހެން ބަންގ ކާޕީ އަވަށުން 20،000 މީހުންނަށާއި، ކަނަޔައޮ އަވަށުން 30،000 އާއި 40،000 އާ ދެމެދުގެ ޢަދަދެއްގެ މީހުންނަށް އަދި ކެނަލްތައް ނުވަތަ ކޯރުތައް ކައިރީގައިވާ ލަކްސީ، ސަޕަން ސުންގ އަދި ސުއަން ލުއަންގ އަވަށްތަކުން 10،000 މީހުންނަށް އަސަރުކުރި ކަމުގައެވެ.
ފެންބޮޑުވި ގެތަކުގައި އެނދުމަތިވެފައި ތިބި ގާތްގަނޑަކަށް 1،500 މީހުން މިހާރު ވަނީ ބީއެމްއޭގެ ހަސްފަތާލުތަކަށް ބަދަލުކޮށްފައެވެ. ހާލުގައި ޖެހިފައިވާ ފަރާތްތަކަށް ހިކިކާނާއާއި ފުޅީގައި ބަންދުކޮށްފައިވާ ފެން ވަގުތުން ބޭނުންވާ ކަމުގައި ޓަވީދާ ވިދާޅުވިއެވެ. އަދި، ފެންބޮޑުވެފައިވާ ސަރަޙައްދުތަކުގައި ތިބި މީހުންނަށް އެހީ ފޯރުކޮށްދިނުމަށް މޮބައިލް ބަދިގެތަކާއި، އުސް ތަންތަނުގައި ދަތުރުކުރެވޭ ފަދަ އުޅަނދުފަހަރާއި، ކުދި ބޯޓުފަހަރު ބޭނުންވާ ކަމުގައި ބީއެމްއޭއިން ބުނެއެވެ. މީގެ އިތުރުން، ހޮޓްލައިން ނަންބަރުތަކަށް އެހީއަށް އެދި ގިނަ ފޯނުކޯލުތަކެއް އަންނަ ކަމުގައި އެ އިދާރާއިން ބުންޏެވެ.
ފެން ހިންދުމުގެ މަސައްކަތް މެދުކެނޑުމެއް ނެތި ކުރިއަށްދާ ކަމަށާއި، ކެނަލްތަކުގެ ފެންގަނޑު ވަރަށް އަވަހަށް ތިރިވާން ފަށާނެ ކަމުގައި ބެންގކޮކްގެ ގަވަރުނަރު ޗަދްޗަތު ސިތިޕުން ވިދާޅުވިއެވެ. އަދި، އަވަށްތަކުން ފެން ހިނދޭނީ ކެނަލްތަކުގެ ލެވެލް ދަށްވުމުން ކަމަށާއި، ފެން ހިންދުން އަވަސްކުރުމަށް ޓަކައި ބިންގަނޑު ތިރި ސަރަޙައްދުތަކުގައި ޕަންޕުތައް ހަރުކުރާނެ ކަމުގައި ވެސް އޭނާ ވިދާޅުވިއެވެ. ސެޕްޓެންބަރު 28 ވަނަ ދުވަހުގެ ހެނދުނު ވެސް އެ ސިޓީގެ ގިނަ މަގުތަކެއްގައި އޮތީ ފެންބޮޑުވެފައެވެ.
ބެންގކޮކުގެ ގަވަރުނަރުގެ ނައިބު ވިސަނޫ ސުބްސޮމްޕާން ވިދާޅުވީ، އިރުމަތީ ބެންގކޮކުގެ މައި ކެނަލްތައް ހިންދުމަށް ތިން ދުވަސް ނަގާނެ ކަމުގައެވެ. އަދި ރަމްހަމްހާއެންގ މަގުގެ ޙާލަތު ރަނގަޅުވި ނަމަވެސް، ލާތު ކްރާބަންގުން ފެން ހިންދުމަށް ހަފުތާއެއްހާ ދުވަސް ނަގާނެ ކަމުގައި އޭނާ ވިދާޅުވިއެވެ.