ފޯމަށް ޖަވާބުދާރީވާން އިތުރު ފުރުޞަތު ދިނުމާމެދު ގޮތެއް ނުނިންމާ

ފޯމު ވެރިފިކޭޝަން މަރުހަލާގައި ދީފައިވާ 21 ދުވަހުގެ މުއްދަތުގައި އެއްވެސް ޖަވާބެއް ނުދީފިނަމަ، އިތުރު ފުރުޞަތެއް ދިނުމާމެދު މިނިސްޓްރީން އަދި ގޮތެއް ނުނިންމާކަމަށް ގެދޮރުވެރިކަމާ ބެހޭ ވުޒާރާއިން ވިދާޅުވެއްޖެއެވެ.

ހުށައަޅާފައިވާ ފޯމުތަކާ ގުޅިގެން މިވަގުތު ކުރިއަށްދަނީ ކްރޮސް ވެރިފިކޭޝަންގެ މަސައްކަތެވެ. ގެދޮރުވެރިކަމާ ބެހޭ ވުޒާރާއިން މީގެކުރިން ވިދާޅުފައިވަނީ ވެރިފިކޭޝަންގެ އެންމެހާ މަސައްކަތްތައް ޑިސެންބަރު މަހުގެ ފުރަތަމަ ހަފްތާއަށްދާއިރު ނިންމުމަކީ އަމާޒުކަމަށެވެ.

ވެރިފިކޭޝަން މަރުހަލާގައި ޖަވާބުދާރީވުމަށް އެންމެ ފުރަތަމަ ދިނީ 7 ދުވަހުގެ މުއްދަތެކެވެ. ނަމަވެސް ފަހުން ވަނީ އެ މުއްދަތު 21 ދުވަހަށް ބަދަލުކޮށްފައެވެ.

މިނިސްޓްރީންވަނީ މި މުއްދަތުގައި މިނިސްޓްރީއަށް ހާލަތު ބަޔާންކޮށް، ނުވަތަ އެކަމާ ގުޅޭ އެއްވެސް ލިޔެކިޔުމެއް ހުރިނަމަ ހުށައެޅުމަށް އެދިވަޑައިގެންފައެވެ. އަދި ބައެއް އިދާރާތަކުން ލިޔުން ހޯދުމުގައި ލަސްވާނަމަ، އެކަން ބަޔާންކޮށް މިނިސްޓްރީއަށް ޕޯޓަލް މެދުވެރިކޮށް ހުށައެޅުމަށެވެ.

އެއްވެސް ގޮތަކަށް ޖަވާބުދާރީ ނުވެ 21 މުއްދަތު ހަމަވެއްޖެނަމަ، އެކަމާމެދު ދެން ޢަމަލުކުރާނެ ވަކި ގޮތެއް ވުޒާރާއިން ހާމަކޮށްފައެއް ނުވެއެވެ. އަދި އިތުރު ފުރުޞަތެއް ދޭނެތޯ ނުވަތަ ނޫންތޯވެސް ނިންމާފައެއް ނުވެއެވެ.

ނަމަވެސް މިހާތަނަށް އުސޫލު އޮތްގޮތުން، 21 ދުވަހުގެ މުއްދަތުގައި ޖަވާބުދާރީ ނުވެއްޖެނަމަ، މިނިސްޓްރީން އެމީހެއްގެ ފޯމުގެ ޝަރުތުތަކާމެދު ގޮތެއް ނިންމާނެއެވެ.

މީހާގެ މިލްކުވެރިކަމާމެދު އިތުރަށް އޮޅުންފިލުވަންޖެހޭ ކަންކަން ހުރިކަން ވުޒާރާއިން 3 ގޮތަކަށް ދަނީ އަންގަމުންނެވެ. އެއީ އެސްއެމްއެސް، އީމެއިލް އަދި ޕޯޓަލްއިންވެސް ފެންނަން ހުންނާނެއެވެ. ޖަވާބުދާރީވާން ޖެހެނީ ޕޯޓަލް މެދުވެރިކޮށެވެ. އެހެންކަމުން ގަވާއިދުން ޕޯޓަލް ޗެކްކުރަމުން ގެންދިއުމަށް ގެދޮރުވެރިކަމާ ބެހޭ ވުޒާރާއިން ވަނީ އިލްތިމާސްކުރައްވާފައެވެ.

އަދި އެއްވެސް ކަމެއް ސާފުކުރަން ބޭނުންނަމަ، ހެލްޕް ޑެސްކް އަދި ކޯލް ސެންޓަރު ވަނީ ހުޅުވާލާފައެވެ.

ސަރުކާރުން ހުޅުވާލި ބޯހިޔާވަހިކަމުގެ މަޝްރޫޢަށް 58،585 ފޯމު ހުށަހަޅާފައިވާއިރު، މިހާރު ކުރިއަށްގެންދަނީ ފޯމުތައް ވެރިފައި ކުރުމުގެ މަރުޙަލާއެވެ.

މީހާގެ ބިންވެރިކަމާ ގުޅޭގޮތުން އެއްވެސް ފުށުއެރުމެއް ފާހަގަވާނަމަ އެކަން އަންގަމުންދަނީ އޮޓޮމޭޓެޑް ނިޒާމެއްގެ ތެރެއިންނެވެ. ބިންވެރިކަމާ ގުޅޭ މަޢުލޫމާތަކީ ކަމާގުޅޭ އެކި އިދާރާތަކުން ނަގާފައިވާ މަޢުލޫމާތަށް ބިނާކޮށް ހަދާފައިވާ ޑޭޓާބެސްގައި ރައްކާކޮށްފައިވާ މަޢުލޫމާތެވެ. ގެދޮރުވެރިކަމާ ބެހޭ ވުޒާރާއިން ވިދާޅުވީ، ބިންވެރިކަމާ ގުޅޭ ގިނަ ފުށުއެރުންތައް ހުރީ، އެ އައިސްފައިވާ ބަދަލުތަކުގެ ރެކޯޑްތައް ކަމާގުޅޭ އިދާރާތަކުގައި އެންމެ ރަނގަޅަށް އަދާހަމަކޮށް ރައްކާކޮށްފައި ނެތުމުންކަމަށެވެ.

ސަރުކާރުން މަސައްކަތް ކުރަމުންދަނީ، ޑިސެންބަރު މަހަށް ވެރިފިކޭޝަން މަސައްކަތްތައް ނިންމައި ޑިސެންބަރު މަހުގެ ތެރޭގައި ފްލެޓާއި ގޯތި ލިބޭ މީހުންގެ ލިސްޓް އާއްމުކުރުމަށެވެ.