ޔަހޫދީންގެ ހަމަލާތަކާއެކު ވެސް މި އަހަރުގެ ނޮވެމްބަރު މަހުގެ 28ވަނަ ދުވަހު ބޭއްވުމަށް ހަމަޖެހިފައިވާ ފަލަސްޠީނުގެ ޤާނޫނުހަދާ މަޖިލީހުގެ އިންތިޚާބަށް ޣައްޒާގައި ތައްޔާރީތައް ކުރިއަށްދާ ކަމަށް ޣައްޒާގެ އިދާރާތަކުން ބުނެފިއެވެ.
މި އަހަރުގެ އިންތިޚާބުގައި ގާތްގަނޑަކަށް 1.25 މިލިޔަން މީހުންނަށް ވޯޓުލުމުގެ ހައްޤު ލިބިގެންވެއެވެ. އެ އިންތިޚާބަށް ޣައްޒާގައި 110އެއްހާ ވޯޓުލާ މަރުކަޒު ޤާއިމްކުރުމަށް ވަނީ ނިންމައިފައެވެ.
ފަލަަސްޠީނިއަން ސެންޓްރަލް އިލެކްޝަންސް ކޮމިޝަންގެ ޣައްޒާގެ ސަރަޙައްދީ ޑިރެކްޓަރ، ޖަމީލް އަލް-ޚާލިދީ ވިދާޅުވީ އިންތިޚާބާ ގުޅޭ ޓެކްނިކަލް އަދި ލޮޖިސްޓިކަލް ތައްޔާރީތައް އިދާރާތަކުން ވަމުންދާ ކަމަށެވެ. ނަމަވެސް އިންތިޚާބު ބޭއްވުމަށް ކުރިމަތިވެފައިވާ އެންމެ ބޮޑު ގޮންޖެހުމަކީ ސަލާމަތީ ގޮންޖެހުންތައް ކަމަށް އޭނާ ވިދާޅުވިއެވެ. ވޯޓުލާ މީހުންނާއި ކެންޑިޑޭޓުންނާއި އިންތިޚާބާ ގުޅޭ މަސައްކަތުގައި ޝާމިލުވާ މުވައްޒަފުންނާއި އޮބްޒާބަރުންނާއި މަންދޫބުންނަށް ރައްކާތެރިކަމާއެކު އިންތިޚާބުގައި ބައިވެރިވެވޭނެ ފަދަ މާހައުލެއް ޤާއިމް ކުރެވޭނެ ކަން ކަށަވަރު ކުރުމަށް އޭނާ ވަނީ ބައިނަލްއަޤްވާމީ ދުނިޔެއަށް ގޮވާލައްވައިފައެވެ. އަދި އިންތިޚާބުގައި ބައިނަލްއަޤްވާމީ އޮބްޒާވަރުންނަށް ބައިވެރިވެވޭނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.
ހަނގުރާމައިގެ ޙާލަތުގައި ޣައްޒާ އެއްކޮށްހެން ސުންނާފަތިވެފައިވާއިރު، ޣައްޒާގައި ވޯޓުލާ މަރުކަޒުތައް ޤާއިމް ކުރާނެ ސަރަޙައްދުތައް ހަމަޖެއްސުމަށް ވަނީ ދަތިވެފައެވެ. އިންތިޚާބާ ބެހޭ ކޮމިޝަނުން ދަނީ ތަޢުލީމީ ވުޒާރާއާއެކު މަސައްކަތްކޮށް، ވޯޓުލާ މަރުކަޒުތަކުގެ ގޮތުގައި ބޭނުން ކުރެވިދާނެ ފަދަ ޙާލަތުގައި ހުރި މަދަރުސާތައް ފާހަގަ ކުރަމުންނެވެ. ވޯޓުލާ ފޮއްޓާއި ކަރުދާހާއި ދެލި ޣައްޒާއަށް ނުވެއްދިއްޖެ ޙާލަތެއްގައި ކަންކުރާނެ ގޮތަކަށް ވެސް ކޮމިޝަނުން ތައްޔާރުވެފައިވާ ކަމަށް ޚާލިދީ ވިދާޅުވިއެވެ. އެ ގޮތުން ބައިނަލްއަޤްވާމީ މިންގަނޑުތަކާ އެއްގޮތަށް އިންތިޚާބު ކުރިއަށް ގެންދެވޭނެ ގޮތްތައް ވިސްނާފައިވާ ކަމަށް އޭނާ ވިދާޅުވިއެވެ.
އިންތިޚާބުގައި ބައިވެރިވާ ކެންޑިޑޭޓުން ނަން ހުށަހެޅުމަށް ސެޕްޓެމްބަރު މަހުގެ 26 ވަނަ ދުވަހު ހުޅުވާލާފައިވާއިރު، ފުރަތަަމަ ގަޑިއިރުގެ ތެރޭގައި ފަސް ޕާޓީއަކުންނާއި އަމިއްލަ ފަރާތްތަކުން ވަނީ ކެންޑިޑޭޓުންގެ ލިސްޓު ހުށަހަޅައިފައެވެ. އޮކްޓޯބަރު މަހުގެ 7ވަނަ ދުވަހާ ހަމައަށް ނަން ހުށަހެޅުމުގެ ފުރުޞަތު ހުޅުވާލާފައިވާއިރު، ކެންޕޭން ކުރަން ފެށުމަށް ހަމަޖެހިފައި ވަނީ ނޮވެމްބަރު މަހުގެ 6ވަނަ ދުވަހުއެވެ.
ފާއިތުވި އަހަރުތަކުގައި ގިނަ އުނދަގޫތަކާ ކުރިމަތިލާން ޖެހުނު ނަމަވެސް އަދި ގެއްލުމާއި ހަލާކުގެ ތެރޭގައި ދިރިއުޅެން ޖެހުނު ނަމަވެސް ވޯޓުގައި ބައިވެރިވުމަށް ފަލަސްޠީނުގެ ރައްޔިތުންގެ ޝައުޤުވެރިކަން ވަރަށް ބޮޑު ކަމަށް ޚާލިދީ ވިދާޅުވިއެވެ. އޭނާ ވިދާޅުވީ ސަލާމަތީ ޙާލަތު އިންތިޚާބު ބޭއްވުމަށް ތަންދޭ ނަމަ ތާވަލާ އެއްގޮތަށް އިންތިޚާބު ނުބޭއްވެންވީ ސަބަބެއް ނެތް ކަމަށެވެ.
ކުރިއަށް އޮތް އިންތިޚާބަކީ 2006ވަނަ އަހަރުން ފެށިގެން ފަލަސްޠީނުގައި ބާއްވާ ފުރަތަމަ ޤާނޫނުހަދާ މަޖިލީހުގެ އިންތިޚާބެވެ. އަދި ޕަލަސްތީނިއަން ލެޖިސްލޭޓިވް ކައުންސިލް ޤާއިމްކުރި ފަހުން ބާއްވާ ތިންވަނަ އިންތިޚާބެވެ. 2007ވަނަ އަހަރުން ފެށިގެން އެ ކައުންސިލްގެ މަސައްކަތްތައް ހުއްޓިފައިވާ އިރު، 2018ވަނަ އަހަރު އެ ކައުންސިލް ވަނީ ރަސްމީކޮށް އުވާލައިފައެވެ.