ރާއްޖޭގައި ފުރަތަމަ ފަހަރަށް މަޑް ކްރެބް ބޮޑުކުރުމުގެ މަޝްރޫޢަކަށް ހުއްދަދީފި

ދިވެހިރާއްޖޭގައި 'މަޑް ކްރެބް' ބޮޑުކުރުމުގެ މަސައްކަތް ކުރުމަށްޓަކައި، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން އަމިއްލަ ފަރާތަކަށް ހުއްދަ ދީފައެވެ. މިއީ ރާއްޖޭގައި މިފަދަ މަޝްރޫޢެއް ހިންގުމަށް ހުއްދަ ދެވުނު ފުރަތަމަ ފަހަރެވެ.

ގދ. ފިޔޯރީގައި ކުރިއަށްގެންދާ މި ޕައިލަޓް މަޝްރޫޢަކީ ރާއްޖޭގެ ކަނޑުފަޅުގެ ވަސީލަތްތައް ސިންދަފާތުކޮށް، އެކުއަކަލްޗަރގެ ދާއިރާއިން އައު އާމްދަނީގެ ފުރުޞަތުތައް ހުޅުވާލުމަށް ސަރުކާރުން ކުރައްވާ މަސައްކަތުގެ ދަށުން ދެވުނު މުހިންމު ހުއްދައެކެވެ.

''މަޑް ކްރެބް' އަކީ އާންމުކޮށް ކަނޑޫފާތަކާއި ކުޅިތަކުގެ މަޑު ފަސްގަނޑު ހުންނަ ސަރަޙައްދުތަކުގައި އުޅޭ، ވަރަށް އަގުހުރި ކަކުނީގެ ބާވަތެކެވެ. މިއީ މަސްގަނޑު ބޮޑު، އަދި ކެއުމަށް ވަރަށް މީރު އެއްޗަކަށްވާތީ މުޅި ދުނިޔޭގެ ސީފޫޑް މާކެޓްގަޔާއި ފަތުރުވެރިކަމުގެ ދާއިރާގައި މިއީ މަޤުބޫލު އެއްޗެކެވެ. އޭގެ އިތުރުން، މިއީ ކަނޑޫފާތަކުގެ ތިމާވެށީގެ އިކޯސިސްޓަމް ބެލެންސްކޮށް، ޤުދުރަތީ މާހައުލު ރައްކާތެރިކުރުމުގައިވެސް މުހިންމު ދައުރެއް އަދާކުރާ އެއްޗެކެވެ.

މި މަޝްރޫޢުގެ ދަށުން މިބާވަތުގެ ކަކުނި އާލާކުރާނީ ކުދި ކަކުނި ނަގައިގެން، އެއަށް ޚާއްޞަކޮށް ތައްޔާރުކުރެވޭ ސަރަހައްދުތަކުގައި ބަހައްޓައިގެން ކާނާދީ ބޮޑުކުރުމުގެ ނުވަތަ 'ފެޓެނިންގ' އުޞޫލުންނެވެ. މިގޮތަށް އާލާކުރުމުގައި ކަކުންޏަށް ބޭނުންވާ އެކަށީގެންވާ ކާނާ ދިނުމާއި، ފެނުގެ ލޮނުކަމުގެ މިންވަރާއި ސާފުތާހިރުކަން އެކަށީގެންވާ ގޮތެއްގައި ބަލަހައްޓައި، މާކެޓަށް ނެރެވޭވަރަށް ބޮޑުވަންދެން ރައްކާތެރިކަމާއެކު ބެލެހެއްޓޭނެއެވެ.

ރާއްޖޭގައި މުޅިން އަލަށް ފަށާ މި މަޝްރޫޢުގެ ސަބަބުން ރިސޯޓުތަކަށާއި ސީފޫޑް ރެސްޓޯރެންޓްތަކަށް ބޭނުންވާ އަގުބޮޑު ކަކުނި ބޭރުގެ މާކެޓްތަކުން އެތެރެކުރުން ކުޑަވެ، ރާއްޖޭގައި އުފައްދައިގެން ވިއްކޭނެ މަގު ތަނަވަސްވެގެންދާނެކަމަށް މަސްވެރިކަމާބެހޭ ވުޒާރާއިން ވިދާޅުވެއެވެ.

މިއީ ސަރުކާރާއި އަމިއްލަ ވިޔަފާރިވެރިންނަށްވެސް ރަނގަޅު އާމްދަނީއެއް ހޯދިދާނެ މަސައްކަތެއްގެ ގޮތުގައި މަސްވެރިކަމާބެހޭ ވުޒާރާއިން ފާހަގަކުރައްވައެވެ. އަދި ހަމައެކަނި ކަނޑުމަހުގެ މަސްވެރިކަމަށް ބަރޯސާވުން ކުޑަކޮށް، ރާއްޖޭގެ އިޤްތިޞާދީ ދާއިރާތައް ފުޅާކުރުމަށްވެސް ލިބިގެންދާނެ ވަރަށް ބޮޑު ފުރުޞަތެއްކަމަށް ވުޒާރާއިން ވިދާޅުވިއެވެ.