ޖަޕާނުގައި ނިމެމުންދާ އޭޝިއަން ގޭމްސްގައި އަނެއްކާ ވެސް އިދާރީ އަދި ލޮޖިސްޓްކްސް މައްސަލަތަކެއް ފެންމަތިވެއްޖެއެވެ.
މި ފަހަރު ގޯސްވި ކަމަކީ ދެކުނު ކޮރެޔާގެ ފިރިހެން ވޮލީބޯޅަ ޓީމު ޕްރެކްޓިސް ކުރަން އޮތް ތަން ނޫން އެހެން ތަނަކަށް ގެންދިއުމެވެ. ޓީމު ގޮވައިގެން ދަތުރުކުރި ބަސް ޑްރައިވަރަށް މި ދެވުނީ ގޯސްތަނަކަށް އެނގުނީ ދާން ޖެހޭ ތަނަށްވުރެ އެއް ގަޑިއިރު އިތުރަށް ދުއްވި ފަހުންނެވެ. މިކަމާ ގުޅިގެން ކޮރެޔާއިން ވަނީ ޕްރެކްޓިސް ކެންސަލް ކޮށްފައެވެ. ނަމަވެސް ޓައިވާން އަތުން އެ ގައުމު ވަނީ 3-2 ސެޓުން މޮޅުވެފައެވެ.
"އޮގަނައިޒަރުން ވަނީ އަހަރުމެން ދަތުރު ކުރަން ބަސް ހަމަޖައްސައިދީފައި. އެކަމަކު ބަސް ޑްރައިވަރު އަހަރުމެން ގެންދިޔައީ އޮކަޒާކީ އަށް. އަސްލު އަހަރުމެން ގެންދަން ޖެހެނީ އިނުޔާމާ އަށް. މިހެންވެ އަހަރުމެން ވަނީ ޕްރެކްޓިސް ކެންސަލް ކޮށްފައި. މިކަމާހެދި އަހަރުމެންގެ މެޗަށް މާބޮޑު އަސަރެއް ނުކުރިޔަސް މިއީ ސީރިއަސް މައްސަލައެއް،" ކޮރެޔާގެ ވޮލީބޯޅަ އެސޯސިއޭޝަނުން ބުނެފައިވެ އެވެ.
އެ ޖަމާއަތުން ވަނީ އެ ގައުމުގެ އޮލިމްޕިކް ކޮމިޓީ މެދުވެރިކޮށް ރަސްމީކޮށް މި މައްސަލަ އިންޓަނޭޝަނަލް އޮލިމްޕިކް ކޮމިޓީ އަށް ހުށަހަޅާފައެވެ.
މިމަހުގެ 19އިން އޮކްޓޯބަރު މަހުގެ ތިނަކަށް ޖަޕާނުގައި ކުރިއަށްދާ ގޭމްސްގައި އިންތިޒާމީ މައްސަލަތައް ގިނައެވެ. މި ގޮތުން ޕާކިސްތާނުގެ ވޮލީބޯޅަ ޓީމާއި ކަޒަކިސްތާން ކުޅެން އޮތް މެޗަށް ޕާކިސްތާން ގެންދިޔައީ ވެސް ނުބައި ތަނަކަށެވެ. މިހެންވެ އެ މެޗު ފެށުން 45 މިނިޓަށް ފަސް ކުރަން ޖެހުނެވެ.
"މިއީ ޖަޕާނުގެ ފަރުވާ ކުޑަކަން މި އޭޝިއަން ގޭމްސްގައި. އެ މީހުންގެ އިންތިޒާމްތައް ހުރީ ވަރަށް ދޯދިޔާކޮށް،" ޕާކިސްތާނުގެ ކެޕްޓަން މުރާދް ޖީހާން އޭނާގެ އިންސްޓަގްރާމް މެދުވެރިކޮށް ބުނެފައިވެއެވެ.
މީގެ އިތުރުން ޗައިނާ އާއި އިންޑިއާ އާއި ތައިލެންޑުގެ އެތުލީޓުން ބިންމަތީގައި ނިދާ މަންޒަރު ފެންނަ ފޮޓޯތައް ވެސް އާއްމުވެފައެވެ. މިކަމާ ގުޅިގެން ޗައިނާއިން ބުނީ އެތުލީޓުން ބިންމަތީގައި ތިބެ ނިދައި އަރާމު ކުރީ އެ މީހުން ބަލައި އަންނަ އޮތް ބަސް އައުން ލަސްވުމުން ކަމަށާއި ދަތުރު ފަތުރުގެ މައްސަލަ ވަރަށް ގޯސް ކަމަށެވެ.
މިފަދަ ކަންކަމާ ގުޅިގެން ޖަޕާނުގެ ލޯކަލް އޮގަނައިޒިން ކޮމިޓީގެ ބުނެފައިވަނީ ކޮރެޔާ އާއި ޕާކިސްތާނަށް ވެސް ދިމާވީ ދަތުރު ފަތުރުގެ މައްސަލައެއް ކަމަށާއި މިފަދަ ކަންކަން ތަކުރާރު ނުވާނެ ގޮތަކަށް ޝެޑިއުލް ދިރާސާކޮށް ކަންކަން ބަލަމުންދާ ކަމަށެވެ.
ޖަޕާނުން ވަނީ މީގެ ކުރިން ވެސް މި ފަހަރުގެ ގޭމްސްގައި ކަންކަން އިންތިޒާމް ކުރަން ދަތިވާނެ ކަމަށް ބުނެފައެވެ. އެންމެ ބޮޑު ސަބަބަކީ ކުއްލި ގޮތަކަށް ކުޅިވަރުތައް ގިނަވެ، ގޭމްސްގައި ބައިވެރިވާ އެތުލީޓުންނާއި އޮފިޝަލުންގެ އަދަދު އިތުރުވުމެވެ. ކުރިން އަންދާޒާ ކުރީ މި ގޭމްސްގެ ބައިވެރިންގެ އަދަދު 17000ން ނިމޭނެ ކަމަށެވެ. ނަމަވެސް ޖަޕާނުން ބުނާ ގޮތުގައި މިހާރު ގޭމްސްގެ ބައިވެރިންގެ އަދަދު ވަނީ 19000 އަށްވުރެ މަތިވެފައެވެ. މިއީ ބަލަހައްޓަން އުނދަގޫވުމެއް ކަމަށެވެ.