ޙޫޘީންގެ ހަމަލާތަކުން ސަޢުދީ ޢަރަބިއްޔާ ދިފާޢުކުރުމަށް ޕާކިސްތާނުގެ ހުރިހާ ވަސީލަތްތައް ބޭނުން ކުރާނެ ކަމަށް އެ ޤައުމުގެ ދިފާޢީ ވަޒީރު، ޚަވާޖާ މުޙައްމަދު އާސިފް ވިދާޅުވެއްޖެއެވެ.
ސަޢުދީ ޢަރަބިއްޔާއާއި ޕާކިސްތާނާއި ތުރުކިޔެއިން ދިފާޢީ އެއްބަސްވުމެއްގައި ސޮއިކޮށްފައި ވަނީ އޮގަސްޓު މަހުގެ 7ވަނަ ދުވަހު މައްކާގައެވެ. އެ އެއްބަސްވުމުގެ މަޤްސަދަކީ ސަލާމަތީ ކަންކަން ވަރުގަދަކޮށް، ޤައުމުތަކުގެ މެދުގައި ދިފާޢީ އެއްބާރުލުން އިތުރުކޮށް، ސަރަޙައްދީ ޞުލްޙަ މަސަލަސްކަން ކުރިއެރުވުމެވެ.
އިޓަލީއަށް ކުރައްވަމުންދާ ދަތުރުފުޅެއްގައި ވާހަކަދައްކަވަމުން ޚަވާޖާ ވިދާޅުވީ ޕާކިސްތާނާއި ތުރުކިޔެއާއި ސަޢުދީ ޢަރަބިއްޔާއާ ދެމެދު ޤާއިމްކޮށްފައިވާ ދިފާޢީ އެއްބަސްވުމުގެ ދަށުން ޕާކިސްތާނުގެ އަސްކަރީ ޤާބިލުކަން ސަޢުދީ ޢަރަބިއްޔާއަށް ފޯރުކޮށްދޭނެ ކަމަށެވެ. އެ ގޮތުން ޕާކިސްތާނަށް ލިބިފައިވާ އެންމެހާ ވަސީލަތްތައް އެއްބަސްވުމުގެ ދަށުން އެ ޤައުމުން ސަޢުދީ ޢަރަބިއްޔާއަށް ފޯރުކޮށްދޭން ޖެހޭ ކަމަސް އޭނާ ވިދާޅުވިއެވެ. ނަމަވެސް އެ ކަމުގެ އިތުރު ތަފްޞީލެއް ޙިއްޞާ ކުރައްވައިފައެއް ނުވެއެވެ.
ޚަވާޖާގެ ވާހަކަފުޅުގައި ޔަމަނަށް ދީފައިވާ އެއްވެސް ވައިގެ ހަމަލާއެއްގައި ޕާކިސްތާނުން ބައިވެރިވެފައިވާ ކަމަށް ސީދާ ވިދާޅުވެފައެއް ނުވެއެވެ. ފާއިތުވި ދުވަސްތަކުގައި ޙޫޘީންގެ ގިނަ ހަމަލާތަކެއް އަމާޒުވަމުންދާ ސަޢުދީ ޢަރަބިއްޔާއިން ޕާކިސްތާނުގެ އެހީތެރި ކަމަށް މިހާ ތަނަށް އެދިފައިވާ ކަން ނުވަތަ ނޫން ކަން ވެސް އޭނާ ސާފުކޮށްދެއްވާފައެއް ނުވެއެވެ.
ޚަވާޖާ މި ފަދަ މޭރުމަކުން ވާހަކަދައްކަވާފައި މި ވަނީ ޕާކިސްތާންއާއި ތުރުކިޔެއާއި ސަޢުދީ ޢަރަބިއްޔާގެ އަސްކަރީ ވެރިން ޙޫޘީންގެ ހަމަލާތަކާ ގުޅޭ ގޮތުން މަޝްވަރާ ކުރުމަށް ސަޢުދީ ޢަރަބިއްޔާގެ ރިޔާޟްގައި ބައްދަލު ކުރެއްވިތާ ކުޑަ ދުވަސްކޮޅެއް ފަހުންނެވެ.
މީގެ ކުރިން ޕާކިސްތާނުގެ އަސްކަރިއްޔާގެ ތަރުޖަމާނު، ލެފްޓިނެންޓް ޖެނެރަލް އަޙްމަދު ޝަރިފް ޗައުދަރީ ވެސް ވަނީ ސަޢުދީ ޢަރަބިއްޔާ ދިފާޢު ކުރުމަށް ޕާކިސްތާނަށް ކުރެވެން ހުރި ކަމެއް ކުރާނެ ކަމުގެ ޔަޤީންކަން ދެއްވައިފައެވެ.