ޔަހޫދީ ދައުލަތުގެ ކުރިއަށް އޮތް އިންތިޚާބުގައި ވާދަކުރުމުގެ ފުރުޞަތު ފަލަސްޠީނަށް ނިސްބަތްވާ ފާހަގަކޮށްލެވޭ ސިޔާސީ ލީޑަރަކަށް ގެއްލިއްޖެއެވެ. ޔަހޫދީ ދައުލަތުގެ ހުރިހާ ރައްޔިތުންނަށް ހަމަހަމަ ޙައްޤުތަކެއް ހޯދައިދިނުމަށް ވަކާލާތުކުރާ ބަލަދް ޕާޓީގެ ލީޑަރު ސާމީ އަބޫ ޝަހާދާއަށް އިންތިޚާބުގައި ވާދަކުރުމުގެ ފުރުޞަތު ގެއްލުނީ، ޣައްޒާ ޤަތުލުޢާންމާ ގުޅޭގޮތުން އޭނާ ދެއްކެވި ވާހަކަތަކަކާ ގުޅިގެން ސުޕްރީމް ކޯޓުން ދިން އިންޒާރަކާ ގުޅިގެންނެވެ. މިއީ، ޑިމޮކްރަސީއަށް ކުރިމަތިވި ތާރީޚީ ކާރިސާއެއްގެ ގޮތުގައި އޭނާ ސިފަކުރެއްވިއެވެ. މި ނިންމުމާއެކު، ސިޔާސީ މައިދާނަށް ނުކުންނަން ބޭނުންވާ ފަލަސްޠީނު ރައްޔިތުންނަށް ކުރިމަތިވާ ގޮންޖެހުންތަކާމެދު ބޮޑެތި ސުވާލުތަކެއް އުފެދިފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
މި މައްސަލައިގައި ޔަހޫދީ ދައުލަތުގެ އިންތިޚާބީ އިދާރާތަކުން ދެފުށްދެގޮތް އުސޫލެއް ގެންގުޅޭކަމުގެ ބޮޑެތި ތުހުމަތުތަކެއް ވަނީ ކުރިމަތިވެފައެވެ. ފަލަސްޠީނު މީހުންނާ ދެކޮޅަށް އަނިޔާވެރިވުމަށް ގޮވާލާ، ކަނާތުފިޔައިގެ ހައްދުފަހަނައެޅި ޔަހޫދީ ލީޑަރުންނަށް އިންތިޚާބުގައި ވާދަކުރުމަށް އެއްވެސް ހުރަހެއް އަޅާފައެއް ނުވެއެވެ. އޭގެ ތެރޭގައި ފަލަސްޠީނު މީހުން ބަނޑަށްޖެއްސުމަށާއި ޣައްޒާއިން އެއްކޮށް ބޭރުކުރުމަށް ގޮވާލާ އިތަމާރް ބެން-ގްވީރާއި ބެޒަލެލް ސްމޮޓްރިކް ފަދަ ވަޒީރުން ހިމެނެއެވެ. ޤާނޫނީ ހަމަތަކުގެ މަތިން ޢަރަބިންނަށް ނިސްބަތްވާ ޕާޓީތައް ބާކީކުރަން ހުށަހެޅުމުން، މަރުކަޒީ ކޮމިޓީން ވަނީ އެ ކަމަށް ދެކޮޅު ހަދާފައެވެ.
ފަލަސްޠީނުގެ ސިޔާސީ ތަޖުރިބާކާރުން ބުނާގޮތުގައި މިއީ ޔަހޫދީ ދައުލަތުގެ ނިޒާމީ މައްސަލައެކެވެ. ޤާނޫނު ތަންފީޒުކުރުމުގައި ޔަހޫދީންނަށް އެއް މިންގަނޑެއް އަދި ފަލަސްޠީނު މީހުންނަށް ތަފާތު މިންގަނޑެއް ކަނޑައަޅާފައިވާ ކަން މި ކަމުން ސާބިތުވާ ކަމުގައި ދާރިސުން ބުންޏެވެ. ޔަހޫދީންގެ ހަރުކަށި ފިކުރަށް ސިޔާސީ ނިޒާމުގެ ތެރެއިން ޖާގަ ލިބޭއިރު، ފަލަސްޠީނު މީހުންގެ ޙައްޤުތަކަށް ވަކާލާތުކުރުން ބެލެވެނީ ޔަހޫދީ ދައުލަތަށް އޮތް ވަރަށް ބޮޑު ނުރައްކަލެއްގެ ގޮތުގައި ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. މިއީ ޑިމޮކްރަސީގެ ނަމުގައި ހިންގާ ޖަރީމާއެއް ކަމަށް ވެސް އެ ފަރާތްތަކުން ސިފަކުރެއެވެ.
ޔަހޫދީ ދައުލަތުގެ އާބާދީގެ %20 އަކީ ފަލަސްޠީނު ރައްޔިތުން ކަމުގައިވީ ނަމަވެސް، ސިޔާސީ މައިދާނުގައި އެ މީހުންނަށް ގިނަ ގޮންޖެހުންތަކެއް ކުރިމަތިވެއެވެ. މީގެ ކުރީގެ އިންތިޚާބުތަކުގައި ވެސް ޢަރަބި ކެންޑިޑޭޓުން ބާކީކުރުމަށް ވަރަށް ގިނަ މަސައްކަތްތަކެއް ކޮށްފައިވާ ކަމުގައި ދާރިސުން ބުންޏެވެ. ތަޖުރިބާކާރުން ފާހަގަކުރާ ގޮތުގައި މިއީ ޞަހްޔޫނީ ދައުލަތުގެ ސިފަ ދެމެހެއްޓުމަށް ޓަކައި، ފަލަސްޠީނު ރައްޔިތުން ސިޔާސީ މައިދާނުން އެކަހެރިކުރުމަށް ރޭވިގެން ހިންގާ ޖަރީމާތަކެކެވެ.