ޒިންމާދާރުކަމާއެކު ޚަބަރާއި މަޢުލޫމާތު ފެތުރުމަށް އިލްތިމާސްކުރައްވައިފި

ދޮގު މަޢުލޫމާތާއި ފިތުނަ އުފެދޭ ފަދަ ކަންކަމުން ދުރުހެލިވެ، ޤައުމީ މަޞްލަޙަތު އިސްކޮށް، ޒިންމާދާރުކަމާއެކު ޚަބަރާއި މަޢުލޫމާތު ފެތުރުމަށް މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަނުން، ހުރިހާ ބްރޯޑްކާސްޓަރުންނަށް އިލްތިމާސްކުރައްވައިފިއެވެ.

އެމްއެމްބީސީން މިކަމަށް އިލްތިމާސްކުރެއްވީ، ދިވެހިރާއްޖޭގެ ބްރޯޑްކާސްޓިންގ ދުވަހުގެ މުނާސަބަތުގައި ނެރެފައިވާ ނޫސްބަޔާނެއްގައެވެ.

ޤައުމީ ބްރޯޑްކާސްޓިންގ ދުވަހުގެ ތަހުނިޔާ ބްރޯޑްކާސްޓަރުންނަށާއި، މި ދާއިރާގައި މަސައްކަތްކުރައްވާ މުވައްޒަފުންނަށާއި، ޚަބަރާއި މަޢުލޫމާތު ފެތުރުމުގެ ދާއިރާގެ އެންމެހައި ޚިދުމަތްތެރިންނަށް، ކޮމިޝަނުގެ ފަރާތުން ވަނީ ފޮނުވާފައެވެ.

ބްރޮޑްކާސްޓިން ކޮމިޝަންއިން ވިދާޅުވީ، ބްރޯޑްކާސްޓިންގ ދާއިރާ ތަރައްޤީކޮށް، ދާއިރާގެ މަސައްކަތްތެރިންގެ ޙައްޤުތައް ރައްކާތެރިކުރުމަށް ކޮމިޝަނުން ކުރަމުންދާ މަސައްކަތްތައް ހުއްޓުމެއްނެތި ކުރިއަށްގެންދާނެ ކަމުގެ ޔަޤީންކަންދޭ ކަމަށެވެ.

ޓެކްނޮލޮޖީގެ ގޮތުންނާއި މީޑިއާގެ ދާއިރާއަށް އަންނަމުންދާ ބަދަލުތަކާއެކު، ބްރޯޑްކާސްޓިންގ ދާއިރާ ކުރިއަރުވައި، ޒަމާނީ ވަސީލަތްތަކާއެކު ފެންވަރު ރަނގަޅު ޚިދުމަތްތަކެއް ރައްޔިތުންނަށް ފޯރުކޮށްދިނުމަށް ކޮމިޝަނުން އަބަދުވެސް މަސައްކަތް ކުރަމުން ގެންދާނެ ކަމުގެ ޔަޤީންކަންވަނީ ދީފައެވެ. މިގޮތުން ދާއިރާގެ މަސައްކަތްތެރިންގެ ފަންނީ ތަމްރީނުތަކާއި، ޤާބިލުކަން އިތުރުކުރުމާއެކު ޤާނޫނާއި ޤަވާއިދުތަކުގެ އިމުގެ ތެރެއިން، މިނިވަން އަދި ޒިންމާދާރު ނޫސްވެރިކަމަކާއި ބްރޯޑްކާސްޓިންގ ވެއްޓެއް ޤާއިމުކުރުމަށް ބާރުއެޅުމަކީ ކޮމިޝަންގެ މައިގަނޑު އެއް އަމާޒުކަމަށް ވިދާޅުވިއެވެ.

މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ޤާނޫނުގައި ބަޔާންކޮށްފައިވާ ގޮތުގެ މަތިން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުގެ ނަމުގައި ދައުލަތުގެ އޮފީހެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފެއްދެވީ، މިދިޔަ އަހަރުގެ ސެޕްޓެމްބަރު މަހުގެ 18 ވަނަ ދުވަހުއެވެ.

އައު ޤާނޫނުގައިވާ ގޮތުގެ މަތިން އުފެއްދެވި މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުގެ މަސްއޫލިއްޔަތުތަކުގެ ތެރޭގައި މި ޤާނޫނާއި ޤާނޫނުގެ ދަށުން ހަދާ ޤަވާއިދުގައި ބަޔާންކުރާ ސުލޫކީ މިންގަނޑުތަކާއި ޤާނޫނުގައި ބަޔާންކުރާ އުސޫލުތަކާ ޚިލާފަށް ޢަމަލުކުރާ ބްރޯޑްކާސްޓަރުންނާއި، މީޑިއާތަކާއި، މީޑިއާގައި މަސައްކަތްކުރާ ފަރާތްތަކާއި ނޫސްވެރިންނާ ގުޅޭގޮތުން ޝަކުވާ ހުށަހެޅޭނެ ނިޒާމެއް ޤާއިމުކުރަންޖެހޭނެއެވެ. އަދި އެކަންކަން ބަލައި، ސުލޫކީ މިންގަނޑުތަކާ ޚިލާފުވާ ފަރާތްތަކުން ޚިލާފުވި ޚިލާފުވުން ބަލައި ފިޔަވަޅު އެޅުމަކީ، ކޮމިޝަނުގެ މަސްއޫލިއްޔަތެކެވެ.