ޔަހޫދީ ދައުލަތުގެ ނިރުބަވެރި ފައުޖުތަކުން ފަލަސްޠީނުގެ ޣައްޒާގެ އެކި ސަރަޙައްދުތަކަށް ދެމުންގެންދާ ރަޙުމުކުޑަ ޙަމަލާތަކުގެ ތެރެއިން، އާދީއްތަ ދުވަހު ދައިރު އަލްބަލަޙްގެ ދެކުނުން ދަތުރުކުރި އުޅަނދަކަށް އަމާޒުކޮށް ދިން ޙަމަލާއެއްގައި، ފަލަސްޠީނުގައި އިންސާނީ އެހީތެރިކަން ފޯރުކޮށްދިނުމުގައި ޙަރަކާތްތެރިވާ އިސް މަސްޢޫލުވެރިޔަކު ޝަހީދުވެ، އިތުރު ބަޔަކު ޒަޚަމްވެއްޖެއެވެ.
ޤުދުސް ނިއުސް ނެޓްވޯކުން އިތުބާރުހުރި މަސްދަރުތަކާ ޙަވާލާދީ ރިޕޯޓުކޮށްފައިވާ ގޮތުގައި، މި ޙަމަލާގައި ޝަހީދުވެފައިވަނީ ތުރުކީގެ އިންސާނީ އެހީދޭ ޖަމްޢިއްޔާއެއް ކަމަށްވާ "ދައިނީޛް ފިނާރީ" ގެ ޑިރެކްޓަރު ސަޤްރު އަލްޤައިސީއެވެ. މި އުޅަނދަށް އަމާޒުވި ޙަމަލާގައި ފަލަސްޠީނުގެ އިތުރު 10 މީހަކު ޒަޚަމްވެފައިވެއެވެ.
މީގެ އިތުރުން އަލްމަޔާދީން ނިއުސްއިން ރިޕޯޓުކޮށްފައިވާ ގޮތުގައި، ދައިރު އަލްބަލަޙްގެ ދެކުނުން އަލްޙާވޫޒް ކައިރީގައި ދަތުރުކުރި ކާރަކަށް ޔަހޫދީން ޑްރޯނަކުން ދިން ވަރުގަދަ ޙަމަލާއެއްގައި އެކަކު ޝަހީދުވެ، އިތުރު އަށް މީހުން ވަނީ ޒަޚަމްވެފައެވެ.
ހަމައެއާއެކު، ޣައްޒާގެ ހުޅަނގުއުތުރުގައި ހުންނަ އިންޖީނިއަރުންގެ މައި މަރުކަޒެއް ކައިރިއަށް ދިން ޑްރޯން ޙަމަލާއެއްގައި ގިނަ ޢަދަދެއްގެ ޢާންމުން ޒަޚަމްވެފައިވާއިރު، ޔަހޫދީންގެ އަސްކަރީ ހެލިކޮޕްޓަރުތަކުން ވަނީ ޣައްޒާ ސިޓީގެ އިރުމަތީ ސަރަޙައްދުތަކަށް ބަޑީގެ ޙަމަލާތައް އަމާޒުކޮށް، ޢިމާރާތްތައް ބިމާހަމަކުރުމުގެ އަނިޔާވެރި އަމަލުތަކެއް ހިންގައިފައެވެ.
އަދި ޣައްޒާގެ އަލްމަޣާޒީ ރެފިއުޖީ ކޭމްޕުގެ އިރުމަތީ ސަރަޙައްދުތަކަށް ވަނީ ބަރު ހަތިޔާރު ބޭނުންކޮށްގެން ޙަމަލާތައް ދީފައިވާއިރު، ޚާން ޔޫނިސްގެ އުތުރުގައިވާ ޙަމަދު ސިޓީގެ އިރުމައްޗަށާއި، ޙާލުގައި ޖެހިފައިވާ ރައްޔިތުން ތިބި ވަގުތީ ހިޔާއަކަށް ވެސް ޔަހޫދީ ސިފައިން ވަނީ ވަރުގަދަ ބަޑީގެ ޙަމަލާތަކެއް ދީފައެވެ.
ޣައްޒާގެ ޞިއްޙަތާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތައް ދައްކާ ގޮތުގައި، 11 އޮކްޓޯބަރު 2025 ގެ ހަނގުރާމަ ހުއްޓައިލުމުގެ އެއްބަސްވުމަށް ޢަމަލުކުރަން ފެށިފަހުން ވެސް، ޔަހޫދީން ދިން ޙަމަލާތަކުގައި ފަލަސްޠީނުގެ 1،445 މީހުން ޝަހީދުވެ، 5،072 މީހުން ވަނީ ޒަޚަމްވެފައެވެ. އަދި އިތުރު 835 މީހުންގެ ހަށިގަނޑު ވަނީ ވެއްޓިފައިވާ އިމާރާތްތަކުގެ ދަށުން ފެނިފައެވެ. ޔަހޫދީ ދައުލަތުން ހިންގަމުންދާ ނަސްލުހޭދަކުރުމުގެ ލާއިންސާނީ ޖަރީމާތަކުގައި މިހާތަނަށް ޝަހީދުވި މީހުންގެ ޖުމްލަ ޢަދަދު މިހާރު ވަނީ 74،228 އަށް އަރައިފައެވެ.
ޖަލު ޙުކުމްތައް ތަންފީޒުކޮށް ނިމުމުންވެސް، ޣައްޒާއަށް ނިސްބަތްވާ ފަލަސްޠީނުގެ 43 އަސީރުން ދޫނުކޮށް ޤާނޫނާ ޚިލާފަށް ޔަހޫދީންގެ ޖަލުތަކުގައި ބަންދުގައި ބައިތިއްބާފައިވާ ކަމަށް އަސީރުންގެ މީޑިއާ އޮފީހުން ވަނީ ހާމަކޮށްފައެވެ. މިގޮތަށް ޣައިރުޤާނޫނީ ބަންދުގައި ތިބި ފަރާތްތަކުގެ ޖިސްމާނީ އަދި ނަފްސާނީ ދުޅަހެޔޮކަން އިންތިހާއަށް ދަށަށް ގޮސްފައިވާއިރު، އެމީހުންގެ ޢާއިލާތަކާ އެއްވެސް މުޢާމަލާތެއް ކުރުމުގެ ޙައްޤުން ޔަހޫދީން ވަނީ އެމީހުން މަޙްރޫމްކޮށްފައެވެ.
މިގޮތުން، 10 އަހަރުގެ ޖަލު ޙުކުމެއް ފުރިހަމަކޮށްފައިވާ އިބްރާހީމް އަލްޝާޢިރު އަދިވެސް މިނިވަންނުކޮށް ބަހައްޓާފައިވާއިރު، ސިއްޙީ ފަރުވާ ނުލިބުމުގެ ސަބަބުން އޭނާގެ ބަރުދަން އިންތިހާއަށް ލުއިވެ، ފުރާނައަށް ވަނީ ނުރައްކާވެފައެވެ. އަދި ސެޕްޓެމްބަރު 2025 ގައި މިނިވަންވާން އޮތް މަޙްމޫދު އަޙްމަދު، އެއްވެސް ޝަރީޢަތަކާ ނުލައި "އިދާރީ ބަންދަކަށް" ބަދަލުކޮށް، ތިން ފަހަރެއްގެ މަތިން އޭނާގެ ބަންދުގެ މުއްދަތު ވަނީ އިތުރުކޮށްފައެވެ.
ހަމައެއާއެކު، ފަސް އަހަރުގެ ޖަލު ޙުކުމެއް ޖޫން 2024 ގައި ތަންފީޒުކޮށް ނިމިފައިވާ ޔޫސުފް ޤަރުމޫތުވެސް އަދިވެސް ދޫނުކޮށް ހިފަހައްޓާފައިވާއިރު، ޔަހޫދީންގެ ޙަމަލާތަކުގައި އޭނާގެ ޢާއިލާގެ 36 މެންބަރަކު ވަނީ ޝަހީދުވެފައެވެ.
އަސީރުންގެ މީޑިއާ އޮފީހުން ފާހަގަކުރި ގޮތުގައި، ޙުކުމް ތަންފީޒުކޮށް ނިމިފައިވާ މީހުން ދޫނުކޮށް ބޭތިއްބުމަކީ ބައިނަލްއަޤްވާމީ އިންސާނީ ޙައްޤުތަކާ ބެހޭ ޤާނޫނުތަކާއި، އަސީރުންގެ ޙައްޤުތައް ރައްކާތެރިކުރާ ބައިނަލްއަޤްވާމީ މުޢާހަދާތަކާ ކަނޑައެޅިގެން ޚިލާފަށް ހިންގާ ބޮޑެތި ޖަރީމާތަކެކެވެ.