ޙިއްޞާގެ އަގު ދަށްކޮށް, މިހާރު ތިބި ޙިއްޞާދާރުންނަށް އިތުރު ޙިއްޞާ ވިއްކުމަށް، ޝެއަރ ސްޕްލިޓުކޮށް ރައިޓްސް އިޝޫކުރުމަށް އެމްޓީސީސީގެ ޑިރެކްޓަރުންގެ ބޯޑުން ނިންމައިފިއެވެ.
މި ނިންމުން ޙިއްޞާދާރުންގެ ޤަރާރަކުން ފާސްކުރުމަށް، މިމަހު ޚާއްޞަ ޢާއްމު ޖަލްސާއެއް ބޭއްވުމަށްވެސް އެކުންފުނިން ވަނީ ނިންމާފައެވެ. އެމްޓީސީސީގެ ޙިއްޞާއެއްގެ މިހާރުގެ މޫނުމަތީ އަގަކީ ފަންސާސް ރުފިޔާއެވެ. ޝެއަރ ސްޕްލިޓުކުރުމުގެ ނަތީޖާއެއްގެ ގޮތުން، މޫނުމަތީ އަގު ދަށްކުރެވި، މީގެކުރިން ދޫކޮށްފައިވާ، ކޮންމެ ޙިއްޞާއަކަށް ދިހަ ޙިއްޞާ ލިބޭނެއެވެ. އަދި ޝެއަރ ސްޕްލިޓުކުރުމުން، ކޮންމެ ޙިއްޞާއެއްގެ މޫނުމަތީ އަގަކީ ފަސް ރުފިޔާގެ ގޮތުގައި ކަނޑައެޅިގެންދާނެ ކަމަށް އެމްޓީސީސީން ބުނެއެވެ.
މީގެ އިތުރުން ރައިޓްސް އިޝޫއެއް ކުރިއަށް ގެންދިޔުމަށް އެމްޓީސީސީގެ ޑިރެކްޓަރުންގެ ބޯޑުން ހުށަހަޅާފައިވާއިރު، ރައިޓްސް އިޝޫކުރުމަކީ، ކުންފުނީގައި އެވަގުތަކު ތިބި ޙިއްޞާދާރުންނަށް ކުންފުނީގެ އިތުރު ޙިއްޞާ ހެޔޮ އަގެއްގައި، ގަތުމަށް ލިބޭ ފުރުޞަތެކެވެ.
ޝެއަރ ސްޕްލިޓުއަށްފަހު، ރަޓްސްގެ ގޮތުގައި ޙިއްޞާއެއް ފަސްދޮޅަސް ދެރުފިޔާގެ މަގުން ގަނެވޭ ކަމަށާއި ކަނޑައެޅިފައިވާ މުއްދަތުގެ ތެރޭގައި، ޙިއްޞާ ގަނެފައި ނުވާ ޙިއްޞާދާރުން އަދި މޯލްޑިވްސް ސްޓޮކް އެކްސްޗޭންޖު މެދުވެރިކޮށް ރައިޓްސް ޓްރޭޑްކޮށްފައިނުވާ ނަމަ، އެއިން ކޮންމެ ޙިއްޞާއެއް އާއްމުންނަށް ވިއްކުމުގެ ހުޅުވާލެވޭނެ ކަމަށް އެމްޓީސީސީން ބުނެއެވެ.
ޙިއްޞާދާރުންނަށް ޙިއްޞާގަތުމަށް ހުޅުވާލާ ފުރުޞަތުގައި ނުވިކި ހުންނަ ޙިއްޞާތައް، ޢަންމުންނަށް ވިއްކުމަށް ހުޅުވާލަން ނިންމާފައިވަނީ ޙިއްޞާއެއް 112 ރުފިޔާއަށް ކަމަށްވެސް އެމްޓީސީސީން ހާމަކުރެއެވެ.