ސަޢުދީ ޢަރަބިއާގެ ވެރިރަށް ރިޔާޛުގައި ބާއްވާ "ރިޔާޛް 2017 ޓްރެވަލް ފެއަރ"ގައި މަޓާޓޯއިން ބައިވެރިވުމަށް ނިންމައިފިއެވެ.
މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް، މަޓާޓޯއިން ބުނީ އަންނަމަހުގެ 7 ވަނަ ދުވަހުން ފެށިގެން 10 ވަނަ ދުވަހުގެ ނިޔަލަށް ކުރިއަށްދާ ރިޔާޛް ފެއަރގައި ރާއްޖެ ތަމްސީލްކުރުމަށް މާޓާޓޯގެ ފަރާތުން ޑެސްޓިނޭޝަން ސްޓޭންޑެއް ބެހެއްޓުމަށް ހަމަޖެހިފައިވާކަމަށެވެ.
މިފެއަރ މެދުވެރިކޮށް މެދުއިރުމަތީގެ ޤައުމުތަކުގެ ޓްރެވަލް އެޖެންޓުންނާއި ދިވެހި ވިޔަފާރިވެރިންނާއި ގުޅުވާލުމުގެ ފުރުސަތު މާޓާޓޯއިން ފަހިކޮށްދޭނެކަމަށް އެ އެސޯސިއޭޝަނުން ހާމަކުރެއެވެ.
ރާއްޖެއަށް ޒިޔާރަތްކުރާ ފަތުރުވެރިންގެ ތިނެއް ޕޮއިންޓު ހަތަރެއް އިންސައްތަ އަކީ މެދުއިރުމަތީގެ ޤައުމުތަކުން އަންނަ ފަތުރުވެރިންނެވެ. ރާއްޖޭގެ ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން، މިދިޔަ އަހަރު ސަޢުދީ ޢަރަބިޢާއިން ރާއްޖެއަށް ފަނަރަހާހަށްވުރެ ގިނަ ފަތުރުވެރިން ޒިޔާރަތްކުރިއެވެ. މިއީ 2015 ވަނަ އަހަރަށްވުރެ ތޭވީސް އިންސައްތަ އިތުރު އަދަދެކެވެ.
ރާއްޖޭގެ ފަތުރުވެރިކަން އިޝްތިހާރުކުރުމަށް މަޓާޓޯއިން އަންނަނީ ދުނިޔޭގެ އެކި ހިސާބުތަކުގައި ބާއްވާ ފަތުރުވެރިކަމުގެ ފެއަރތަކުގައި ބައިވެރިވަމުންނެވެ. އެގޮތުން މިއަހަރުގެތެރޭގައި 9 ފެއަރއެއްގައި ބައިވެރިވުމަށް މަޓާޓޯއިން ވަނީ ނިންމާފައެވެ.