ޕޮލިމާ ކަރުދާހުން ޗާޕުކޮށްފައިވާ ފަސް ރުފިޔާގެ އައު ނޫޓު، މޯލްޑިވްސް މަނިޓަރީ އޮތޯރިޓީ، އެމްއެމްއޭއިން މާދަމާ ތަޢާރަފްކުރާނެއެވެ.
ފަސް ރުފިޔާގެ އައު ނޫޓު ތަޢާރަފްކުރުމަށް ހަމަޖެހިފައިވަނީ މާދަމާ ހެނދުނު ހަތެއް ޖަހާއިރު އިސްކަންދަރު ސްކޫލްގައި ބާއްވާ ޚާއްޞަ ހަފްލާއެއްގައެވެ. މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ވިދާޅުވީ މިހާރު ބޭނުންކުރާ ފަސްރުފިޔާގެ ނޫޓުގެ ބަދަލުގައި ބޭނުންކުރުމަށް ހަމަޖެހިފައިވާ، ފަސް ރުފިޔާގެ އައު ނޫޓު މާދަމާ ތަޢާރަފްކުރުމަށް ހަމަޖެހިފައިވީ ނަމަވެސް، ފަސް ރުފިޔާގެ އައު ނޫޓު ބޭނުންކުރަން ފަށާނެ ދުވަހެއް އަދި ކަނޑައަޅާފައި ނުވާކަމަށް އެމްއެމްއޭއިން ވިދާޅުވެއެވެ. އައު ނޫޓު ތަޢާރަފްކުރަނީ އާއްމުންނަށް ހަމައެކަނި ދައްކާލުމަށްޓަކައި ކަމަށް އެމްއެމްއޭއިން ވިދާޅުވިއެވެ.
ޕޮލިމާ ކަރުދާހުން ޗާޕްކޮށްފައިވާ މި ނޫޓުގައި ވެސް ރަންދިހަ ފަހެއްގެ ނޫޓްތަކުގައި ހުންނަ ގޮތަށް ފަހުގެ ސަލާމަތީ ފިޔަވަޅުތައް ވެސް ހިމެނިފައި ހުންނާނެ ކަމަށް އެމްއެމްއޭއިން ވިދާޅުވިއެވެ. ނޫޓުގެ ފަރުމާކުރުން ވެސް ހުންނާނީ ފަހުގެ ނޫޓްތަކުގެ ކޮންސެޕްޓްގައި ކަމަށް އެމްއެމްއޭއިން ހާމަކުރެއެވެ.
އެމްއެމްއޭ އިން މީގެ އަހަރެއްހާ ދުވަސް ކުރިން ވަނީ ޕޮލިމާ ކަރުދާހުގައި ޗާޕްކޮށްފައިވާ މުޅިން އައު ނޫޓް ސީރީޒްއެއް ނެރެފައެވެ. އެ ނޫޓް ސީރީޒްގައި ހިމެނެނީ، 10، 20، 50، 100، 500 އަދި 1000 ރުފިޔާގެ ނޫޓެވެ. އެމްއެމްއޭއިން ދިވެހި ރުފިޔާގެ އައު ނޫޓްތަކެއް ނެރުނީ ދިވެހިރާއްޖޭގެ މިނިވަންކަމަށް 50 އަހަރު ފުރުނު، ރަންޔޫބިލާ ދިމާކޮށެވެ.