އެސްޓީއޯއިން ރޯދަމަހަށް ޚާއްޞަކޮށްގެން އެތެރެކުރާ ފިޔާ، ބިސް އަދި އަލުވި އަންނަ ހޮނިހިރު ދުވަހު ވިއްކަން ފަށާނެ ކަމަށް އެކުންފުނިން ހާމަކޮށްފިއެވެ.
އެގޮތުން އާދީއްތަ ދުވަހުން ފެށިގެން މިމަހުގެ 19 ވަނަ ދުވަހުގެ ނިޔަލަށް މިތަކެތި ހޯލްސޭލްކޮށް ވިއްކުމަށް ހަމަޖެހިފައިވަނީ އެސްޓީއޯ ސުޕަމާޓް ހޯލްސޭލް ސެންޓަރުންނެވެ. އަދި މިމަހުގެ 20 ވަނަ ދުވަހުން ފެށިގެން ފިޔާ، ބިސް އަދި އަލުވީގެ ހޯލްސޭލް ވިޔަފާރި ކުރިޔަށް ގެންދިޔުމަށް ހަމަޖެހިފައިވަނީ ބޮޑުތަކުރުފާނު މަގުގައި ހުންނަ އެސްޓީއޯގެ 2 ނަންބަރު ކޮށިން ކަމަށް އެސްޓީއޯއިން ހާމަކުރެއެވެ. މިތަން ހުޅުވިފައި ހުންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު އަށްގަޑި ތިރީހުން ހަވީރު ހަތަރުގަޑި ސުންމިނެޓަށް ކަމަށާއި ރޯދަމަސް ފެށުމުން ދެ ނަންބަރު ކޮށި ހުޅުވިފައި ހުންނާނީ ހުކުރު ދުވަސް ފިޔަވައި ކޮންމެ ދުވަހެއްގެވެސް ހެނދުނު ދިހަ ގަޑި ސުންމިނެޓުން މެންދުރު ބާރަ ގަޑި ސުންމިނެޓަށް އަދި މެންދުރުފަހު އެއްގަޑި ސުންމިނެޓުން ތިންގަޑި ސުން މިނެޓަށް ކަމަށް އެސްޓީއޯއިން މައުލޫމާތުދެއެވެ.