ޔޫރަޕްގެ ޤައުމުތަކުން ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޢަދަދަށް ލިބުނު ބޮޑު ކުރިއެރުމާއިއެކު، އޭޕްރީލްމަހު ރާއްޖެއަށް ޒިޔާރަތްކުރި ފަތުރުވެރިންގެ މުޅި ޖުމްލަ ޢަދަދު %16 އިތުރު ވެއްޖެއެވެ.
އޭޕްރީލްމަހު ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޢަދަދު އިތުރުވެފައިމިވަނީ މިއަހަރުގެ މާރޗުމަހު ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޢަދަދު މިދިޔަ އަހަރުގެ މާރޗުމަހާ އަޅާ ބަލާއިރު %2 ދަށްވުމަށްފަހުއެވެ.
ޓޫރިޒަމް މިނިސްޓްރީން ޢާއްމުކޮށްފައިވާ ތަފާސްހިސާބުތައް ދައްކާގޮތުން މިއަހަރުގެ އޭޕްރީލްމަހު ރާއްޖެއަށް 119،774 ފަތުރުވެރިން ޒިޔާރަތްކޮށްފައިވާއިރު، މިދިޔަ އަހަރުގެ އޭޕްރީލްމަހު ރާއްޖެއަށް ޒިޔާރަތްކޮށްފައިވަނީ 103،493 ފަތުރުވެރިންނެވެ.
އޭޕްރީލްމަހު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ޔޫރަޕްގެ ޤައުމުތަކުންނެވެ. އެގޮތުން ޔޫރަޕުން 61،0000އަށްވުރެ ގިނަ ފަތުރުވެރިން ރާއްޖެއަށް އައިސްފައިވެއެވެ. މިއީ މިދިޔަ އަހަރުގެ އޭޕްރީލްމަހާ އަޅާ ބަލާއިރު %30 އިތުރުޢަދަދެކެވެ. ޔޫރަޕުން ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވާ ޤައުމުތަކަކީ، ޖަރުމަންވިލާތް، އިނގިރޭސިވިލާތް، އިޓަލީވިލާތް އަދި ރަޝިއާއެވެ.
މިހުރިހާ މާރކެޓަކުންވެސް ރާއްޖެއަށް އައި ފަތުރުވެރިންގެ ޢަދަދަށް ވަނީ ބޮޑެތި ކުރި އެރުންތައް ލިބިފައެވެ. އަދި މީގެއިތުރުން، ސުވިޒަރލޭންޑުންވެސް އޭޕްރީލްމަހު ރާއްޖެއަށް ޒިޔާރަތްކުރި ފަތުރުވެރިންގެ ޢަދަދަށް ބޮޑު ކުރިއެރުމެއް ލިބިފައިވާ ކަން ތަފާސް ހިސާބުތަކުން ފާހަގަކޮށްލެވެއެވެ.
ޗައިނާއިން އައި ފަތުރުވެރިންގެ ޢަދަދު އޭޕްރީލް މަހުވެސް ވަނީ ދަށަށް ގޮސްފައެވެ. އެގޮތުން އޭޕްރީލްމަހު ރާއްޖެއަށް އެޤައުމުން 20،900 ގިނަ ފަތުރުވެރިން ޒިޔާރަތްކޮށްފައިވާއިރު މިއީ މިދިޔަ އަހަރުގެ އޭޕްރީލްމަހާ އަޅާ ބަލާއިރު %15 ދަށް ޢަދަދެކެވެ. މި ދަށްވުމާ އެކުވެސް އެއް ޤައުމަކުން ރާއްޖެއަށް އެންމެ ގިނަ ޢަދަދަކަށް ފަތުރުވެރިން ޒިޔާރަތްކުރާ ޤައުމަކީ އަދިވެސް ޗައިނާކަން ފާހަގަކޮށްލެވެއެވެ.
މާޗުމަހުގެތެރޭގައި، ރާއްޖޭގައި އެޗްވަން އެންވަން ފުލޫ ފެތުރުމާ ގުޅިގެން މެދުއިރުމަތީގެ ޤައުމުތަކުން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދަށް އޭގެ އަސަރުކޮށްފައިވާކަމަށް ލަފާކުރެވޭ. އެގޮތުން ހުސްވި އޭޕްރީލްމަހުވެސް ރާއްޖެއަށް މެދުއިރުމަތީގެ ޤައުމުތަކުން ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޢަދަދުވަނީ %4 ދަށަށް ގޮސްފައެވެ.
މިއަހަރުގެ އޭޕްރީލްމަހުގެ ނިޔަލަށް ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޢަދަދަށްވެސް ވަނީ އެދެވޭ ކުރިއެރުމެއް ލިބިފައެވެ. އެގޮތުން މިއަހަރުގެ އޭޕްރީލްމަހުގެ ނިޔަލަށް ރާއްޖެއަށް 478،000އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، މިއީ ހުސްވި އަހަރުގެ މި މުއްދަތާ އަޅާ ބަލާއިރު %7 އިތުރު ޢަދަދެކެވެ.