މިއަހަރުގެ މަޓާޓޯ މޯލްޑިވްސް ޓްރެވަލް އެވޯޑް ރަސްމީކޮށް އިފްތިތާޙްކޮށް، ޓްރެވަލް އެވޯޑް ހަފްލާގެ ޕާޓްނަރުންނާއެކު އެއްބަސްވުމުގައި ސޮއިކޮށްފިއެވެ.
މިއާއެކު މަޓާޓޯ މޯލްޑިވްސް ޓްރެވަލް އެވޯޑަށް ނަން ހުށަހެޅުމުގެ ފުރުސަތު މިހާރުވަނީ ހުޅުވާލާފައެވެ.
މިއެވޯޑްގެ މިއަހަރުގެ ގޯލްޑް ސްޕޮންސަރުންގެ ތެރޭގައި ޕަބްލިކް ސަރވިސް މީޑިއާ ހިމެނޭ. އަދި ޓްރެވަލް އެވޯޑްގެ އޮފިޝަލް ބްރޯޑްކާސްޓިންގ ޕާޓްނަރަކީ ޕަބްލިކް ސަރވިސް މީޑިއާގެ، މޯލްޑިވްސް ޓީވީއެވެ.
ޕާޓްނަރުންނާއި އެކު ސޮއިކުރުމަށް ހުޅުލޭ އައިލެންޑު ހޮޓެލްގައި ބޭއްވި ޙަފްލާގައި، މިއަހަރުގެ އެވޯޑް ހަފްލާގެ 17 ޕާޓްނަރަކާއެކު ވަނީ އެއްބަސްވުމުގައި ސޮއިކޮށްފައެވެ.
މިއަހަރުގެ އެވޯޑް ހަފްލާގެ ޓައިޓަލް ސްޕޮންސަރއަކީ މޯލްޑިވްސް އެއަރޕޯޓްސް ކޮންޕެނީ ލިމިޑެޓު. ޕީއެސްއެމްގެ އިތުރުން މަޓާޓޯ މޯލްޑިވްސް ޓްރެވަލް އެވޯޑް ޝޯވްގެ ގޯލްޑް ސްޕޮންސަރުންނަކީ އެލިއާ އިންވެސްޓްމަންޓް ޕްރައިވެޓް ލިމިޑެޓާއި ދިރާގެވެ.
ޕާޓުނަރުންނާއި އެކު ސޮއިކުރުމަށް ބޭއްވި ހަފްލާގެ ތެރެއިން ޕީއެސްއެމް ނިއުސްއަށް ދެއްވި އިންޓަރވިއުއެއްގައި މާޓާޓޯގެ ރައީސް އަބްދުﷲ ޤިޔާސް ވިދާޅުވީ މިއަހަރުގެ އެވޯޑްޝޯވް ކުރީ އަހަރުތަކަށް ވުރެ ފުރިހަމަ ވާނެ ކަމަށް. އެގޮތުން އެވޯޑްތަކަށް ވާދަ ކުރާ ފަރާތްތައް ޖަޖް ކުރުމަށް އެކުލަވާލާ ޕެނަލްގައި ރާއްޖެއިން ބޭރުގެ ފަރާތްތަށްވެސް ހިމެނޭނެ ކަމަށް އޭނާ ވިދާޅުވިއެވެ.
އަދި އެވޯޑް ހަފްލާއަށް ދުނިޔޭގެ މަޝްހޫރު ސެލެބްރިޓީސް ގެނައުމަށް މަސައްކަތް ކުރަމުންދާ ކަމަށްވެސް ޤިޔާސް ވިދާޅުވިއެވެ.
މަޓާޓޯ މޯލްޑިވްސް ޓްރެވަލް އެވޯޑްގެ މިއަހަރުގެ ގޯލްޑް ސްޕޮންސަރުންގެ ތެރޭގައި ހިމެނޭ ޕަބްލިކް ސަރވިސް މީޑިއާގެ މެނޭޖިންގ ޑިރެކްޓަރ އިބްރާހީމް ޚަލީލް ވަނީ މަޓާޓޯއިން ކުރަމުން އަންނަ މަސައްކަތްތައް ފާހަގަކުރައްވައި ތައުރީފްކުރައްވާފައި. އެގޮތުން މިއަހަރުގެ އެވޯޑް ޝޯވް އަކީ ކުލަގަދަ ފުރިހަމަ ޙަފްލާއަކަށް ވާނެކަމަށް އުންމީދުކުރައްވާކަމަށްވެސް ޚަލީލް ވިދާޅުވިއެވެ.
މިއަހަރުގެ މަޓާޓޯ މޯލްޑިވްސް ޓްރެވަލް އެވޯޑް ހަފްލާގެ ޕާޓުނަރުންގެތެރޭގައި ހިމެނޭ މޯލްޑިވްސް އެއާޕޯޓްސް ކޮމްޕެނީއާއި ދިރާގުންވެސް ވަނީ މިފަދަ އެވޯޑް ހަފްލާއެއް ކުރިއަށް ގެންދިޔުމުގައި ބައިވެރިވުމުގެ ފުރުސަތު ލިބުމަކީ އުފަލެއްކަން ފާހަގަކޮށްފައި. އެގޮތުން މިއީ ރާއްޖޭގެ ފަތުރުވެރިކަން ކުރިއެރުވުމަށް ކުރެވޭ މަސައްކަތުގައި އެކުންފުނިތަކަށްވެސް ބައިވެރިވުމަށް ލިބޭ ފުރުސަތެއްކަމަށް ދިރާގާއި އެމްއޭސީއެލްއިން ވަނީ ބުނެފައެވެ.
މަޓާޓޯ މޯލްޑިވްސް ޓްރެވަލް އެވޯޑްސްގެ ގާލާ އިވެންޓު ބޭއްވުމަށް ހަމަޖެހިފައިވަނީ އަންނަ ނޮވެމްބަރމަހުގެ ބާވީސްވަނަ ދުވަހު އަދާރަން ސިލެކްޓް ހުދުރަންފުށީގައި. މިއަހަރު އެވޯޑް ހަފްލާގައި ތަފާތު އެކި ބައިތައް އަހަރުގެ އެކި ހިސާބުތަކުގައި ކުރިއަށްދާނެ. އެގޮތުން ޕީޕަލްސް އެޑިޝަން ބޭއްވުމަށް ހަމަޖެހިފައިވަނީ އަންނަ ޖުލައިމަހުގެ ތެރޭގައި ބާއްވާ ޓީޓީއެމް ފެއަރގެ ގާލާ އިވެންޓުގައެވެ.