މިއަހަރުގެ މޭ މަހުގެ ނިޔަލަށް ބައި މިލިއަނައަކަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފިއެވެ. މިއީ މިދިޔަ އަހަރުގެ މިމުއްދަތާ އަޅާބަލާއިރު %5.8 އިތުރު ޢަދަދެކެވެ.
ޓޫރިޒަމް މިނިސްޓްރީން ޢާއްމުކޮށްފައިވާ މޭ މަހުގެ ތަފާސްހިސާބުތައް ދައްކާގޮތުން، މިއަހަރުގެ މޭމަހުގެ ނިޔަލަށް 572000 އަށް ވުރެ ގިނަ ފަތުރުވެރިން ރާއްޖެއަށްވަނީ ޒިޔާރަތްކޮށްފައެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 540887 ފަތުރުވެރިންނެވެ.
މިމުއްދަތުގައި ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ޔޫރަޕްގެ ޤައުމުތަކުންނެވެ. އެގޮތުން އެ ސަރަޙައްދުގެ ޤައުމުތަކުން ރާއްޖެއަށް 290000 އަށް ވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.
ތަފާސް ހިސާބުތައް ދައްކާގޮތުން މޭމަހު ރާއްޖެއަށް ޒިޔާރަތްކޮށްފައިވަނީ 93491 ފަތުރުވެރިންނެވެ. މިއީ މިދިޔަ އަހަރުގެ މޭ މަހާ އަޅާ ބަލާއިރު، %0.3 އިތުރު ޢަދަދެކެވެ.
މޭމަހު ރާއްޖެއަށް ފަތުރުވެރިން ޒިޔާރަތްކޮށްފައިވާ ޢަދަދު އިތުރުވި މިންވަރަށް ކުޑަ ކުރިއެރުމެއް ލިބުނު މައިގަނޑު ސަބަބަކީ ރާއްޖެއަށް އެންމެ ގިނަ ޢަދަދަކަށް ފަތުރުވެރިން ޒިޔާރަތްކުރާ ޤައުމުތަކުގެ ތެރޭގައި ހިމެނޭ ޖަރުމަންވިލާތް، ޗައިނާ އަދި އިނގިރޭސިވިލާތް ފަދަ ޤައުމުތަކުން އައި ފަތުރުވެރިންގެ ޢަދަދު މޭމަހު ދަށްވެފައިވުމެވެ.
މޭމަހު ރާއްޖެއަށް އައި ފަތުރުވެރިންގެ ޢަދަދު އިތުރުވެފައިވާ ޤައުމުތަކުގެ ތެރޭގައި، އިޓަލީ، އިންޑިއާ، ރަޝިއާ، އެމެރިކާ ހިމެނެއެވެ.
މި ޤައުމުތަކުގެ ތެރެއިން އެންމެ ބޮޑު ކުރިއެރުމެއް ލިބިފައިވަނީ އިންޑިއާއިން ރާއްޖެއައި ފަތުރުވެރިންގެ ޢަދަދަށެވެ. މިއަހަރުގެ މޭމަހު އިންޑިއާއިން އަށްހާހަށްވުރެ ގިނަފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ މިދިޔަ އަހަރުގެ މޭ މަހާ އަޅާ ބަލާއިރު %21.7 އިތުރު ޢަދަދެކެވެ.