މޯލްޑިވްސް ފައިނޭންޝަލް އެކްސްޕޯ"ގައި ތިރީހަށްވުރެ ގިނަ ސްޓޯލް ހިމެނޭނެ ކަމަށް މޯލްޑިވްސް މަނިޓަރީ އޮތޯރިޓީން ހާމަކޮށްފިއެވެ.
އަންނަ ޖުލައިމަހުގެ ހަޔަކުން އަށަކަށް ދަރުބާރުގޭގައި ބޭއްވުމަށް ހަމަޖެހިފައިވާ މޯލްޑިވްސް ފައިނޭންޝަލް އެކްސްޕޯއަކީ އާއްމުންގެ މެދުގައި މާލީ އަދި އިޤްތިޞާދީ ކަންކަމާ ބެހޭގޮތުން ހޭލުންތެރިކުރުމާއި، އާއްމުންނާއި މާލީ އިދާރާތަކުގެ ގުޅުން އިތުރަށް ބަދަހި ކުރުމަށް މަގުފަހިކުރުންކަރުމުގެ މަޤްސަދުގައި ބާއްވާ އެކްސްޕޯއެކެވެ.
މި އެކްސްޕޯގައި ގެދޮރު ގަތުމަށާއި، ގެދޮރު ޢިމާރާތްކުރުމަށް ހުރި ފުރުޞަތުތަކާއި، މާލީ އިދާރާތަކުން އެކަމަށް ފައިނޭންސް ހޯދޭނެ ގޮތްތަކާއި ބެހޭގޮތުން މައުލޫމާތު ދިނުމަށް ވަނީ ހަމަޖެހިފައެވެ. ހައުސިންގ ޑިވެލޮޕްމަންޓް ކޯރޕަރޭޝަން، އެޗްޑީސީ އާ ގުޅިގެން ބާއްވާ މި އެކްސްޕޯގެ މިއަހަރުގެ ތީމްއަކީ، "ހައުސިން އެންޑް ފައިނޭންސް"އެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން، އެމްއެމްއޭގެ އެގްޒެކްޓިވް ޑިރެކްޓަރު މަރިޔަމް ނަޖީލާ ވިދާޅުވީ، އެކްސްޕޯގެ ތެރެއިން އާއްމުންނަށް ހުޅުވާލައިގެން ސެމިނަރތަކެއް ކުރިއަށް ގެންދިޔުމަށް ރާވާފައިވާ ކަމަށެވެ.
އަދި މި ސެމިނަރތަކުގައި ބައިވެރިވާން ބޭނުންވާ އާއްމުންގެ ފަރާތްތަކަށް ރެޖިސްޓްރީ ކުރުމުގެ ފުރުސަތު މިހާރު އެ ފުރުސަތު ހުޅުވާލެވިފައިވާ ކަމަށް ނަޖީލާ ވިދާޅުވިއެވެ.
ފައިނޭންޝަލް އެކްސްޕޯއާ ގުޅޭގޮތުން މައުލޫމާތުދެއްވަމުން އެޗްޑީސީގެ ޑިރެކްޓަރ އޮފް ފައިނޭންސް އަލީ ޝަރީފް ވިދާޅުވީ، އެޗްޑީސީގެ ތެރެއިން މި އެކްސްޕޯގެ ތެރެއިން " ބިލްޑިންގ ސްމާޓް ސިޓިޒެން" ގެ ނަމުގައި ޚާއްސަ ކެމްޕެއިނެއް ކުރިއަށް ގެންދިޔުމަށް ހަމަޖެހިފައިވާ ކަމަށެވެ.
ފައިނޭންޝިއަލް އެކްސްޕޯގައި ރާއްޖޭގެ މާލީ ދާއިރާގައި ހަރަކާތްތެރިވާ ކުންފުނިތަކާއި މުވާސަލާތީ ޙިދުމަތްދޭ ކުންފުނިތަކުން ބައިވެރިވާނެ، އަދި އެޗްޑީސީއާ އެކު ކޮންސްޓްރަކްޝަން ކުންފުނިތަކާއި، ރިއަލް އެސްޓޭޓް ޑިވެލޮޕަރުންނާއި، އިންޓީރިއަ ޑިޒައިނަރުން ބައިވެރިވާނެއެވެ.