މަޓާޓޯ މޯލްޑިވްސް ޓްރެވަލް އެވޯޑްސްގެ ގެސްޓްހައުސް އެޑިޝަނަން ނަން ހުށަހެޅުމުގެ ފުރުސަތު ހުޅުވާލައިފިއެވެ.
މަޓާޓޯއިން މަޢުލޫމާތުދޭ ގޮތުގައި ގެސްޓްހައުސްތަކަށް ޚާއްސަކޮށްގެން ބާއްވާ އެވޯޑު ޙަފްލާ އަންނަ އޮކްޓޫބަރުމަހުގެތެރޭ ބޭއްވުމަށް ހަމަޖެހިފައިވާ ކަމަށާއި، ގެސްޓްހައުސް އެވޯޑަށް ނަން ހުށަހެޅުމުގެ ފުރުސަތު އަންނަ މަހުގެ 15 ވަނަ ދުވަހުގެ ނިޔަލަށް ހުޅުވާލާފައިވާ ކަމަށެވެ.
މަޓާޓޯ މޯލްޑިވްސް ޓްރެވަލް އެވޯޑްސްގެ ގެސްޓްހައުސް އެޑިޝަނާ ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން ޑެޕިއުޓީ ސެކްރެޓަރީ ޖެނެރަލް އަސްރާ ނަސީމް ވިދާޅުވީ، ގެސްޓްހައުސް އެޑިޝަނުގައި ޖުމްލަ ފަނަރަ ކެޓަގަރީ ހިމެނޭނެ ކަމަށެވެ. އޭގެތެރޭގައި ލީޑިން ގެސްޓްހައުސް، ލީޑިންގް ހެރިޓޭޖް ގެސްޓްހައުސް ފަދަ ކެޓަގަރީތައް ހިމެނޭނެ ކަމަށެވެ.
އަސްރާ ވިދާޅުވީ އެވޯޑް ހަފްލާއަށް ނަން ހުށަހެޅުމުގެ ފުރުސަތު ރާއްޖޭގައި ގެސްޓްހައުސް ހިންގާ ހުރިހާ ފަރާތްތަކަށް ހުޅުވާލާފައިވާ ކަމަށެވެ. އަދި ގެސްޓްހައުސް އެވޯޑަށް ނަން ހުށަހަޅާ ފަރާތްތަކުގެ ތެރެއިން ޓްރިޕް އެޑްވައިޒަރގެ ރިވިއުތަކަށް ބެލުމަށްފަހު ޝޯޓް ލިސްޓު ކުރާ ފަރާތްތަކަށް އޮންލައިންކޮށް އަދި އެސްއެމްއެސް މެދުވެރިކޮށް ވޯޓު ދިނުމުގެ ފުރުސަތު ހުޅުވާލާނެ ކަމަށެވެ.
ޓާޓޯއިން ވަނީ ހުސްވި މަހުތެރޭ މަޓާޓޯ މޯލްޑިވްސް ޓްރެވަލް އެވޯޑްސްގެ ޕީޕަލްސް އެޑިޝަން ބާއްވާފައެވެ. އަދި މަޓާޓޯ މޯލްޑިވްސް ޓްރެވަލް އެވޯޑްސްގެ ގާލާ ހަފްލާ ބޭއްވުމަށް ހަމަޖެހިފައިވަނީ މިއަހަރުގެ ނޮވެމްބަރުމަހުތެރޭ ކަމަށް މަޓާޓޯއިން މައުލޫމާތުދެއެވެ.