ފެލިވަރުގައި ތަރައްޤީކުރާ ޕައުޗު ޕްލާންޓުގައި ބަންދުކުރާ މަސް ގަންނާނެ ބޭރުގެ ކުންފުނިތައް ހަމަޖައްސައި، އެފަރާތްތަކާއެކު ކޮންޓްރެކްޓްތައް ހަދާފައިވާކަމަށް އެސްޓީއޯގެ މެނޭޖިންގ ޑިރެކްޓަރ އަޙްމަދު ޝަހީރު ވިދާޅުވެއްޖެއެވެ.
އެސްޓީއޯގެ ސަބްސިޑަރީ ކުންފުނި މިފްކޯގެ، މަސް ބަންދުކުރާ ކާރުހާނާއެއް ހިންގާ ޅ. އަތޮޅު ފެލިވަރުގައި ތަރައްޤީކުރާ ޕައުޗު ޕްލާންޓު ތަރައްޤީކުރުމުގެ މަސައްކަތް މިއަހަރުގެ ނޮވެމްބަރުމަހުގެ ތެރޭގައި ނިމޭނެކަމަށް ޝަހީރު ވިދާޅުވިއެވެ. އަދި އެތަން ތަރައްޤީކުރުމުގެ މަސައްކަތް ނިމުމުން އެތަނުން މަސް ބޭރުގެ ކުންފުނިތަކަށް އެކްސްޕޯޓު ކުރަން ފަށާނެކަމަށްވެސް ޝަހީރު ވިދާޅުވިއެވެ.
ޝަހީރު ވިދާޅުވީ އެންމެ ގިނައިން މަސް ބާނާ ސީސަންގައި މިފްކޯއަށް މަސްވެރިންގެ އަތުން ދަތިކަމެއް ނެތި މަސްގަނެވޭނެ އިންތިޒާމްތައް ހަމަޖެއްސުމުގެ މަސައްކަތް ކުރަމުން އަންނަކަމަށެވެ. އެގޮތުން މިފްކޯގެ އައިސް ޕްލާންޓުތައް ރަނގަޅުކޮށް، އިތުރު އައިސް ޕްލާންޓުތައް ޤާއިމްކުރުމުގެ މަސައްކަތް ކުރަމުންދާ ކަމަށް ޝަހީރު ވިދާޅުވިއެވެ.
މިފްކޯއިން ވަނީ ހުސްވި އަހަރުގެ ތެރޭގައި ފެލިވަރު މަސް ފެކްޓަރީ އަޕްގްރޭޑްކޮށްފައެވެ. އެގޮތުން އެތަނުގައި ޒަމާނީ މެޝިންތައް ބަހައްޓައި، ކެޕޭސިޓީ ވަނީ އިތުރުކޮށްފައެވެ.